29 October 2026
SHIJI MK
Image Credit: Getty Images
ചായ പലരുടെയും ദിനചര്യയുടെ ഭാഗമാണ്. എന്നാല്‍ ചില ശീലങ്ങള്‍ അസിഡിറ്റി, വയറുവീക്കം, ദഹനസംബന്ധമായ അസ്വസ്ഥതകള്‍ എന്നിവയ്ക്ക് കാരണമാകാം.
ചായപ്പൊടി കൂടുതല്‍ നേരം വെള്ളത്തിലിട്ട് തിളപ്പിക്കുകയോ കപ്പില്‍ ടീ ബാഗ് ദീര്‍ഘനേരം മുക്കിവെക്കുകയോ ചെയ്യുന്നത് ചായയിലെ കഫീന്റെയും ടാനിനുകളുടെയും അളവ് വര്‍ധിപ്പിക്കാം. ഇത് വയറിലെ അസ്വസ്ഥതയ്ക്കും അസിഡിറ്റിക്കും കാരണമാകാം.
രാവിലെ എഴുന്നേറ്റ ഉടന്‍ വെറും വയറ്റില്‍ ചായ കുടിക്കുന്നത് ചിലരില്‍ ഓക്കാനം, നെഞ്ചെരിച്ചില്‍, വയറുവേദന തുടങ്ങിയ പ്രശ്‌നങ്ങളുണ്ടാക്കാം.
ദിവസവും പലതവണ പഞ്ചസാര ചേര്‍ത്ത ചായ കുടിക്കുന്നത് ശരീരത്തിലെ പഞ്ചസാരയുടെ ആകെ ഉപയോഗം വര്‍ധിപ്പിക്കുന്നു. ദീര്‍ഘകാലം അമിതമായി പഞ്ചസാര ഉപയോഗിക്കുന്നത് അമിതവണ്ണത്തിനും കരളില്‍ കൊഴുപ്പ് അടിയുന്നതിനുമുള്ള സാധ്യത വര്‍ധിപ്പിക്കാം.
കൂടുതല്‍ പാല്‍ ചേര്‍ത്ത ചായ ചിലരില്‍ വയറുവീക്കം, ഗ്യാസ്, ദഹനക്കേട് തുടങ്ങിയ പ്രശ്‌നങ്ങളുണ്ടാക്കാം. പ്രത്യേകിച്ച് ലാക്ടോസ് ദഹിപ്പിക്കാന്‍ ബുദ്ധിമുട്ടുള്ളവര്‍ക്ക് ഇത്തരം അസ്വസ്ഥതകള്‍ അനുഭവപ്പെടാം.
ഭക്ഷണത്തോടൊപ്പമോ ഭക്ഷണം കഴിച്ച ഉടനെയോ ചായ കുടിക്കുന്നത് ഭക്ഷണത്തിലെ ഇരുമ്പിന്റെ ആഗിരണം കുറയ്ക്കാം. പ്രത്യേകിച്ച് സസ്യാഹാരത്തില്‍ നിന്നുള്ള ഇരുമ്പിന്റെ ആഗിരണത്തെ ചായയിലെ പോളിഫിനോളുകള്‍ ബാധിക്കാം.
ദിവസം മുഴുവന്‍ നിരവധി കപ്പ് ചായ കുടിക്കുന്ന ശീലം കഫീന്റെ അളവ് വര്‍ധിപ്പിക്കാം. ഇത് ചിലരില്‍ ഉറക്കക്കുറവ്, അസിഡിറ്റി, ഹൃദയമിടിപ്പ് കൂടുക, അസ്വസ്ഥത എന്നിവയ്ക്ക് കാരണമാകാം.
ചായയില്‍ വെള്ളമുണ്ടെങ്കിലും ദാഹം മാറ്റാന്‍ ചായയെ മാത്രം ആശ്രയിക്കുന്നത് നല്ല ശീലമല്ല. ആവശ്യത്തിന് സാധാരണ വെള്ളവും കുടിക്കണം. ശരീരത്തില്‍ ജലാംശം കുറയുന്നത് മലബന്ധത്തിന് കാരണമാകാം.