02 November 2026
SHIJI MK
Image Credit: Getty Images
ചായയ്‌ക്കൊപ്പം ബിസ്‌കറ്റ് കഴിക്കുന്നത് പലരുടെയും പതിവാണ്. എന്നാല്‍ പാക്കറ്റ് ബിസ്‌കറ്റുകളില്‍ മൈദ, പഞ്ചസാര, കൊഴുപ്പ് എന്നിവ കൂടുതലായിരിക്കാം. ഡൈജസ്റ്റീവ്, മള്‍ട്ടിഗ്രെയിന്‍ എന്നിങ്ങനെ പേരുള്ള ബിസ്‌കറ്റുകളിലും ഇവ അടങ്ങിയിരിക്കാം.
ഇന്ത്യന്‍ അടുക്കളകളില്‍ തന്നെ ബിസ്‌കറ്റിന് പകരം കഴിക്കാവുന്ന പോഷകസമൃദ്ധമായ നിരവധി സ്‌നാക്കുകളുണ്ട്. പ്രോട്ടീന്‍, ഫൈബര്‍, ആരോഗ്യകരമായ കൊഴുപ്പ് എന്നിവ അടങ്ങിയ ഇവ വിശപ്പ് നിയന്ത്രിക്കാനും കൂടുതല്‍ നേരം വയറുനിറഞ്ഞ തോന്നല്‍ നല്‍കാനും സഹായിക്കും.
പ്രോട്ടീനും ഫൈബറും ധാരാളമുള്ള ലളിതമായ സ്‌നാക്കാണ് വറുത്ത കടല. കൂടുതല്‍ നേരം വയറുനിറഞ്ഞ തോന്നല്‍ നല്‍കാനും ദഹനത്തെ സഹായിക്കാനും ഇത് ഉപകരിക്കും.
ഫോക്‌സ് നട്ട്സ് എന്നും അറിയപ്പെടുന്ന മഖാനയില്‍ പ്രോട്ടീന്‍, ഫൈബര്‍, മഗ്‌നീഷ്യം, ഫോസ്ഫറസ് തുടങ്ങിയ പോഷകങ്ങള്‍ അടങ്ങിയിട്ടുണ്ട്. അല്‍പം മഞ്ഞള്‍പ്പൊടി, കുരുമുളക്, ചാറ്റ് മസാല എന്നിവ ചേര്‍ത്ത് വറുത്തെടുക്കാം.
മുളപ്പിച്ച ചെറുപയര്‍ പ്രോട്ടീനും ഫൈബറും വിറ്റാമിനുകളും ലഭിക്കുന്ന മികച്ച സ്‌നാക്കാണ്. സവാള, തക്കാളി, വെള്ളരിക്ക, മല്ലിയില, നാരങ്ങാനീര് എന്നിവ ചേര്‍ത്ത് സാലഡായി കഴിക്കാം.
അവല്‍, നിലക്കടല, വറുത്ത കടല, കറിവേപ്പില, മസാലകള്‍ എന്നിവ ചേര്‍ത്ത് തയാറാക്കുന്ന പോഹ ചിവ്ഡ ബിസ്‌കറ്റിന് പകരം കഴിക്കാവുന്ന സ്‌നാക്കാണ്. എണ്ണ കുറച്ച് വീട്ടില്‍ തയാറാക്കുമ്പോള്‍ പോഷകമൂല്യം വര്‍ധിപ്പിക്കാം.
കുതിര്‍ത്ത് അരച്ച ചെറുപയര്‍ ഉപയോഗിച്ച് തയാറാക്കുന്ന ദോശ പോലുള്ള വിഭവമാണ് മൂങ്ങ് ദാല്‍ ചില്ല. പ്രോട്ടീന്‍ സമ്പുഷ്ടമായ ഇതില്‍ കാരറ്റ്, ചീര, സവാള തുടങ്ങിയ പച്ചക്കറികള്‍ ചേര്‍ത്താല്‍ പോഷകമൂല്യം കൂടും.
പുതിയ തേങ്ങയില്‍ ഫൈബറും ആരോഗ്യകരമായ കൊഴുപ്പും ചില ധാതുക്കളും അടങ്ങിയിട്ടുണ്ട്. മിതമായ അളവില്‍ കഴിക്കുന്നത് വിശപ്പ് നിയന്ത്രിക്കാന്‍ സഹായിക്കും.