ചൂടിനെ തോൽപ്പിക്കാൻ  ഒരു ഗ്ലാസ് മോര്! ഇങ്ങനെ ഉണ്ടാക്കി നോക്കൂ

എല്ലാ വീടുകളിലും തൈര് എപ്പോഴും ഉണ്ടാകാറുണ്ട്. വേനലായാൽ തൈരിൻ്റെ ആവശ്യകത കൂടുകയും ചെയ്യും. വെറും മോരിന് പകരം ഒരു വെറൈറ്റി നോക്കിയാലോ.

വെറുതെ മോരും വെള്ളം കുടിക്കുന്നതിന് പകരം ശരീരത്തിന് ഉണർവും ഔഷധഗുണവും നൽകുന്ന ഒരു സ്പെഷ്യൽ സംഭാരം തയ്യാറാക്കി നോക്കാം.

പുളിയില്ലാത്ത കട്ടത്തൈര്, തണുത്ത വെള്ളം, കാന്താരി മുളക്/പച്ചമുളക്, ഇഞ്ചി, കറിവേപ്പില, ചെറിയ ഉള്ളി, നാരകത്തിന്റെ ഇല, ഉപ്പ് എന്നിവയാണ് ആവശ്യമായ ചേരുവകൾ.

ആദ്യം ഒരു മിക്സിയുടെ ജാറിലോ കല്ലിലോ ഇട്ട് ഇഞ്ചി, കാന്താരി മുളക്, കറിവേപ്പില ചെറിയ ഉള്ളി  എന്നിവ ചതച്ചെടുക്കുക. ഇത് അമിതമായി അരഞ്ഞുപോകരുത്.

കട്ടത്തൈര് നന്നായി ഉടച്ചെടുക്കുക. മിക്സിയിൽ ഒരു സെക്കൻഡ് അടിച്ചാലും മതി. ഇതിലേക്ക് ചതച്ചുവെച്ചിരിക്കുന്ന ചേരുവകളും പാകത്തിന് ഉപ്പും ചേർക്കുക.

ശേഷം തണുത്ത വെള്ളം ഒഴിച്ച് നന്നായി ഇളക്കുക. അവസാനം നാരകത്തിൻ്റെ ഇല കൈകൊണ്ട് തിരുമ്മി ചേർത്താൽ സംഭാരത്തിന് നല്ല മണം കിട്ടും. രുചിയും മാറും.