മുടിയും നഖവും വെട്ടുമ്പോൾ വേദന ഇല്ലാത്തത് എന്തുകൊണ്ട്?

മുടിയും നഖവും മുറിക്കുമ്പോൾ യാതൊരു വേദനയും അനുഭവപ്പെടാറില്ല. ഇതിന് പിന്നിൽ ചില ശാസ്ത്രീയ കാരണങ്ങളുണ്ട്.

ഇവയുടെ പുറംഭാഗം കേരാറ്റിൻ എന്ന ശക്തമായ പ്രോട്ടീൻ കൊണ്ടാണ് നിർമ്മിച്ചിരിക്കുന്നത്. ഈ ഭാഗങ്ങളിൽ നാഡികളോ രക്തക്കുഴലുകളോ ഇല്ല.

വേദന വരണമെങ്കിൽ ശരീരത്തിൽ നാഡി അറ്റങ്ങൾ വേണം. മുറിവുണ്ടാകുമ്പോൾ ഇവ തലച്ചോറിലേക്ക് സന്ദേശം അയക്കുമ്പോഴാണ് വേദന തോന്നുന്നത്.

നഖം വളരെ ആഴത്തിൽ മുറിക്കുമ്പോഴോ, മുടി വേരോടെ പിഴുത് മാറ്റുമ്പോഴോ നമുക്ക് വേദന അനുഭവപ്പെടാറുണ്ട്. അതിന് കാരണമുണ്ട്,

മുടിയുടെയും നഖത്തിന്റെയും അടിഭാഗം ചർമ്മത്തിനുള്ളിലാണ്. ഈ ഭാഗങ്ങളിൽ ജീവനുള്ള കോശങ്ങളും നാഡികളും രക്തക്കുഴലുകളും ഉണ്ട്.