Food recipes in malayalam, Kerala Food Recipes, Cooking Recipes, Nutrition Tips in Malayalam

Rice Pakoda Recipe: ചോറ് ബാക്കി വന്നാൽ ഇനി ടെൻഷൻ വേണ്ട!; ചായക്കൊപ്പം കഴിക്കാൻ സൂപ്പർ റൈസ് പക്കോട

Neethu Vijayan — Sat, 12 Sep 2026 17:46:00 +0530

: ഉച്ചയ്ക്ക് ബാക്കി വന്ന ചോറ് എന്ത് ചെയ്യുമെന്നോർത്ത് വിഷമിക്കുന്ന വീട്ടമ്മമാരെ നമ്മൾ കണ്ടിട്ടുണ്ട്. ഇനി ചോറ് മിച്ചം വന്നാൽ ഒട്ടും ആശങ്കപ്പെടേണ്ട കാര്യമില്ല. ചായക്കൊപ്പം കറുമുറെ കഴിക്കാൻ നല്ല സ്വാദിഷ്ടമായ ക്രിസ്പി റൈസ് പക്കോട ഈ മിച്ചം വന്ന ചോറുകൊണ്ട് എളുപ്പത്തിൽ ഉണ്ടാക്കിയെടുക്കാം. കുട്ടികൾക്കും മുതിർന്നവർക്കും ഒരുപോലെ ഇഷ്ടപ്പെടുന്ന ഈ നാലുമണി പലഹാരം വളരെ കുറഞ്ഞ ചേരുവകൾ കൊണ്ട് മിനിറ്റുകൾക്കുള്ളിൽ തയാറാക്കിയാലോ. (Image Credit Source: Getty Images)

: ആവശ്യമായ ചേരുവകൾ: ചോറ് – ഒരു കപ്പ്, നന്നായി ഉടച്ചത്, സവാള – ഒന്ന്, പൊടിയായി അരിഞ്ഞത്, പച്ചമുളക് – രണ്ട്, പൊടിയായി അരിഞ്ഞത്, ഇഞ്ചി – ഒരു ചെറിയ സ്പൂൺ, വെളുത്തുള്ളി– ഒരു ചെറിയ സ്പൂൺ, കറിവേപ്പില – ഒരു വലിയ സ്പൂൺ, മല്ലിയില – രണ്ടു വലിയ സ്പൂൺ, മുളകുപൊടി– അര ചെറിയ സ്പൂൺ, ഗരംമസാലപ്പൊടി – അര ചെറിയ സ്പൂൺ, ജീരകം –അര ചെറിയ സ്പൂൺ, ഉപ്പ് – പാകത്തിന്, അരിപ്പൊടി – രണ്ടു വലിയ സ്പൂൺ, കടലമാവ് – മൂന്നു വലിയ സ്പൂൺ, എണ്ണ– ആവശ്യത്തിന് എന്നിവയാണ് ഇതിന് ആവശ്യമായ ചേരുവകൾ.

: പാകം ചെയ്യുന്ന വിധം: ഒരു ബൗളിലേക്ക് ബാക്കി വന്ന ചോറെടുത്ത് കൈകൊണ്ട് നന്നായി ഉടച്ചെടുക്കുക ഉടച്ചുവെച്ച ചോറിലേക്ക് അരിഞ്ഞുവെച്ച സവാള, പച്ചമുളക്, ഇഞ്ചി, കറിവേപ്പില, മല്ലിയില എന്നിവ ചേർക്കുക. ഇതിലേക്ക് മുളകുപൊടി, ഗരംമസാലപ്പൊടി, ജീരകം, ഉപ്പ് യോജിപ്പിച്ച ശേഷം അരിപ്പൊടിയും കടലമാവും ചേർത്തിളക്കി കട്ടിയുള്ള മാവ് തയാറാക്കണം. മാവ് അയഞ്ഞുപോയാൽ അല്പം കൂടി അരിപ്പൊടി ചേർക്കാവുന്നതാണ്.

: തയ്യാറാക്കി വച്ചിരിക്കുന്ന മാവിൽ നിന്ന് ചെറിയ ഉരുളകളായോ പക്കോടയുടെ ആകൃതിയിലോ എടുത്തു മാറ്റിവെക്കുക. ശേഷം ഗ്യാസ് കത്തിച്ച് പാനിൽ എണ്ണ ചൂടാക്കുക. പിന്നീട് തയാറാക്കിവെച്ച കൂട്ടുകൾ ഇടത്തരം തീയിൽ ഇട്ട് ഇരുവശവും സ്വർണ്ണനിറവും ക്രിസ്പിയും ആകുന്നത് വരെ വറുത്തെടുക്കുക. ചൂടോടെ തക്കാളി സോസിനൊപ്പമോ പുതിന ചട്ണിക്കൊപ്പമോ ചായയുടെ കൂടെ ഇത് കഴിക്കാവുന്നതാണ്.

: കുട്ടികൾക്ക് നാലുമണിക്ക് എന്ത് കൊടുക്കുമെന്ന് വിഷമിച്ചിരിക്കുന്ന അമ്മമാർക്ക് ഇത് നല്ലൊരു സീക്രട്ട് റെസിപ്പിയാണ്. അതുപോലെ ചോറ് കഴിക്കാൻ മടിയുള്ളവർക്കും ചോറ് കഴിച്ച് മടുത്തവർക്കും ഇത്തരം പലഹാരങ്ങൾ ട്രൈ ചെയ്യാം. പുറത്തുനിന്ന് ചായ പലഹാരം വാങ്ങി വയറ് മോശമാക്കുന്നതിലും വളരെ നല്ലൊരു ഓപ്ഷനാണ് ഇത്തരം റെസിപ്പികൾ.

Guava Halwa: വായിൽ അലിഞ്ഞുപോകും പേരയ്ക്ക ഹൽവ; മിനിറ്റുകൾക്കുള്ളിൽ തയാറാക്കാം റെസിപ്പി ഇതാ

Neethu Vijayan — Fri, 11 Sep 2026 18:59:00 +0530

: വൈറ്റമിൻ സി-യാൽ സമ്പുഷ്ടമായ പേരക്ക ആരോഗ്യ കാര്യത്തിലും വിവിധതരം വിഭവങ്ങൾ തയ്യാറാക്കാനും കേമനാണ്. പലരും പേരക്ക കിട്ടിയാൽ പച്ചയായിട്ടോ ഉപ്പും മുളകും കൂട്ടിയോ തിന്നുന്നതാണ് ശീലം. ചിലർ ഉപ്പിലിട്ട് കഴിക്കാറുമുണ്ട്. എന്നാൽ നിങ്ങൾ ഇതുവരെ പരീക്ഷിക്കാത്തതും കേട്ടിട്ടില്ലാത്തതുമായ ഒരു ഐറ്റമാണ് ഇവിടെ പറയാൻ പോകുന്നത്. പേരക്ക ഹൽവ. വിളഞ്ഞു പഴുത്ത നല്ല നാടൻ പേരയ്ക്ക വീട്ടിലുണ്ടെങ്കിൽ അല്പം വ്യത്യസ്തമായി രുചികരമായ ഒരു ഹൽവ തയാറാക്കി നോക്കിയാലോ. (Image Credit Source: Getty Images)

: വളരെ കുറഞ്ഞ ചേരുവകൾ കൊണ്ട് നമുക്ക് മിനിറ്റുകൾക്കുള്ളിൽ വീട്ടിൽ തന്നെ പെട്ടെന്ന് ഉണ്ടാക്കിയെടുക്കാവുന്ന ഒന്നാണ് പേരയ്ക്ക ഹൽവ. കുട്ടികൾക്കും മുതിർന്നവർക്കും ഒരുപോലെ ഇഷ്ടപ്പെടുന്ന ഈ മധുരപലഹാരത്തിന്റെ റെസിപ്പി ഒന്ന് അറിഞ്ഞുവച്ചോ. വീട്ടിൽ വിരുന്നുകാർ വരുമ്പോൾ കടകളിലേക്ക് ഓടാതെ നമ്മുടെ വീട്ടിലുണ്ടാക്കിയ ഇത്തരം പലഹാരങ്ങൾ വിളമ്പാൻ ഇനി മടിവേണ്ട. തയ്യാറാക്കുന്ന വിധം നോക്കാം.

: ആവശ്യമായ ചേരുവകൾ: നന്നായി പഴുത്ത പേരയ്ക്ക: 4-5 എണ്ണം, ശർക്കര അല്ലെങ്കിൽ പഞ്ചസാര: 1 കപ്പ് മധുരത്തിന് അനുസരിച്ച്, കോൺഫ്ലോർ : 2 ടേബിൾ സ്പൂൺ, നെയ്യ്: 3-4 ടേബിൾ സ്പൂൺ, ഏലയ്ക്കാപ്പൊടി: അര ടീസ്പൂൺ, അണ്ടിപ്പരിപ്പ്, മുന്തിരി: ആവശ്യത്തിന് എന്നിവയാണ് നമ്മുടെ പേരക്ക് ഹൽവ തയ്യാറാക്കാൻ ആവശ്യമായ ചേരുവകൾ.

: തയാറാക്കുന്ന രീതി: ആദ്യം തന്നെ നന്നായി കഴുകിയ പേരയ്ക്ക ചെറിയ കഷ്ണങ്ങളാക്കി മുറിച്ച് അല്പം വെള്ളം ചേർത്ത് വേവിച്ചെടുക്കുക. ഉടഞ്ഞുപോകാതെ സൂക്ഷിക്കണം. ചൂടെല്ലാം ആറി തണുത്ത ശേഷം ഇത് മിക്സിയിലിട്ട് നന്നായി അടിച്ചെടുക്കുക. അടിച്ചെടുത്ത പേരയ്ക്കയുടെ പൾപ്പ് ഒരു അരിപ്പ ഉപയോഗിച്ച് അരിച്ചെടുത്ത് അതിൻ്റെ കുരു പൂർണ്ണമായും മാറ്റുക. അരിച്ചെടുത്ത പേരയ്ക്ക പൾപ്പിലേക്ക് കോൺഫ്ലോറും ആവശ്യത്തിന് പഞ്ചസാരയോ ശർക്കരയുടെ ലായനിയോ ചേർത്ത് കട്ടകളില്ലാതെ നന്നായി ഇളക്കി യോജിപ്പിക്കുക.

: ഇനി ഒരു അടി കട്ടിയുള്ള പാത്രത്തിൽ അല്ലെങ്കിൽ നോൺസ്റ്റിക്ക് പാത്രത്തിലേക്ക് ഒരു സ്പൂൺ നെയ്യ് ഒഴിച്ച് തയാറാക്കിവെച്ചിരിക്കുന്ന മിക്സ് ഒഴിച്ച് ചെറിയ തീയിൽ തുടർച്ചയായി ഇളക്കുക. അടിയിൽ പിടിച്ച് കരിഞ്ഞുപോകാതെ ശ്രദ്ധിക്കണം. എപ്പോഴും മീഡിയം തീയിലിട്ട് വേണം ചെയ്യാൻ. മിക്സ് കുറുകി വരുമ്പോൾ ബാക്കിയുള്ള നെയ്യ് ഘട്ടം ഘട്ടമായി ചേർത്തുകൊടുക്കുക.

: മിക്സ് പാത്രത്തിൽ ഒട്ടാതെ വിട്ടു വരുന്ന പാകമാകുമ്പോൾ ഏലയ്ക്കാപ്പൊടിയും വറുത്ത അണ്ടിപ്പരിപ്പും ചേർക്കുക. ശേഷം തീ ഓഫ് ചെയ്യാം. പിന്നീട് നെയ്യ് തടവിയ ഒരു പ്ലേറ്റിലേക്കോ ട്രേയിലേക്കോ ഈ മിക്സ് മാറ്റി തണുക്കാൻ വയ്ക്കുക. തണുത്ത ശേഷം ഇഷ്ടമുള്ള ആകൃതിയിൽ കട്ട് ചെയ്ത് വിളമ്പാം. നല്ല രുചിയുള്ള വ്യത്യസ്തമായ ഒരു റെസിപ്പി റെഡി.

Inji Thayir Recipe: അഞ്ച് മിനിറ്റിൽ തയാറാക്കാം നാടൻ ഇഞ്ചി തൈര്: റെസിപ്പി അറിയാം

Neethu Vijayan — Thu, 10 Sep 2026 19:50:00 +0530

: ഉച്ചയൂണിന് എന്തുണ്ടാക്കും എന്നത് മിക്ക വീടുകളിലും വീട്ടമമ്മമാരെ കുഴപ്പിക്കുന്ന ഒരു പ്രശ്നമാണ്. ഇത്തരം സാഹചര്യങ്ങളെ മറികടക്കാൻ നമ്മുടെ മലയാളികൾക്ക് നിരവധി കൂട്ടുകളുണ്ട്. അത്തരത്തിൽ ഊണിന് മറ്റ് കറികളൊന്നും ഇല്ലെങ്കിലും വയറുനിറയെ ചോറുണ്ണാൻ സാധിക്കുന്ന ഒന്നാണ് പരമ്പരാഗത രീതിയിലുള്ള നാടൻ ഇഞ്ചി തൈര്. ദഹനത്തിനും ഏറെ ഉത്തമമായ ഈ വിഭവം വളരെ കുറഞ്ഞ സമയം കൊണ്ട് കുറഞ്ഞ ചേരുവകൾ ഉപയോഗിച്ച് വീട്ടിൽ തന്നെ തയ്യാറാക്കാം. (Image Credit Source: Getty Images)

: ആവശ്യമായ ചേരുവകൾ: ഇഞ്ചി: 2 ടേബിൾസ്പൂൺ ചെറുതായി കൊത്തി അരിഞ്ഞത്, പച്ചമുളക്: 2-3 എണ്ണം വട്ടത്തിൽ അരിഞ്ഞത്, കട്ടത്തൈര്: 1 കപ്പ് നന്നായി ഉടച്ചെടുത്തത്, ചെറിയ ഉള്ളി: 4-5 എണ്ണം ആവശ്യമെങ്കിൽ ചെറുതായി അരിഞ്ഞത്, കടുക്: 1/2 ടീസ്പൂൺ, വറ്റൽ മുളക്: 2 എണ്ണം, കറിവേപ്പില: 2 തണ്ട്, വെളിച്ചെണ്ണ: 1-2 ടേബിൾസ്പൂൺ, ഉപ്പ്: ആവശ്യത്തിന്, കായപ്പൊടി: ഒരു നുള്ളു ഇത്രയുമാണ് ഈ കൂട്ട് തയ്യാറാക്കാൻ ആവശ്യമായ ചേരുവകൾ.

: തയ്യാറാക്കുന്ന വിധം: നന്നായി ഉടച്ചെടുത്ത കട്ടത്തൈരിലേക്ക് ആവശ്യത്തിന് ഉപ്പും ഒരു നുള്ളു കായപ്പൊടിയും ചേർത്ത് നന്നായി ഇളക്കി മാറ്റിവെക്കുക. ഒരു പാനിൽ വെളിച്ചെണ്ണ ചൂടാക്കി കടുക് പൊട്ടിക്കുക. അതിലേക്ക് വറ്റൽ മുളകും കറിവേപ്പിലയും ചേർത്ത് മൂപ്പിക്കുക. അതിനുശേഷം ചെറുതായി അരിഞ്ഞ് വെച്ചിരിക്കുന്ന ഇഞ്ചി, പച്ചമുളക്, ചെറിയ ഉള്ളി എന്നിവ ചേർത്ത് നന്നായി വഴറ്റുക. ഇഞ്ചിയുടെ പച്ചമണം മാറി നേരിയ പൊൻനിറം ആകുന്നത് വരെ വഴറ്റണം.

: ഇഞ്ചി നന്നായി മൂത്തതിന് ശേഷം തീ ഓഫ് ചെയ്യുക. ഈ ചൂടാറിയ മിശ്രിതം തയ്യാറാക്കി വെച്ചിരിക്കുന്ന തൈരിലേക്ക് ഒഴിച്ച് നന്നായി ഇളക്കി യോജിപ്പിക്കുക. ചൂടുചോറിനൊപ്പം കട്ടത്തൈരിന്റെയും വറുത്ത ഇഞ്ചിയുടെയും സുഗന്ധമുള്ള ഈ ഇഞ്ചി തൈര് വിളമ്പാം. വയറിനും ദഹനത്തിനുമെല്ലാം വളരെ നല്ലൊരു വിഭവമാണിത്. ദിവസവും വ്യത്യസ്തമായ കറികൾ പരീക്ഷിക്കാൻ ആഗ്രഹിക്കുന്നവർക്ക് ഇത് ഒരു ദിവസം തയ്യാറാക്കാവുന്നതാണ്.

: ഇഞ്ചിയുടെയും തൈരിൻ്റെയും ഗുണങ്ങൾ: തൈരിലെ പ്രോബയോട്ടിക്സും ഇഞ്ചിയിലെ ആന്റി-ഇൻഫ്ലമേറ്ററി ഗുണങ്ങളും വയറിലെ ഗ്യാസ്, അസിഡിറ്റി, ദഹനക്കേട് എന്നിവ വളരെ വേഗത്തിൽ കുറയ്ക്കുന്നു. ഇഞ്ചിയിലെ ജിഞ്ചറോൾ ആന്റിഓക്‌സിഡന്റുകൾ പ്രദാനം ചെയ്യുമ്പോൾ തൈര് ശരീരത്തിന് ആവശ്യമായ നല്ല ബാക്ടീരിയകളെ നൽകി പ്രതിരോധശേഷി വർദ്ധിപ്പിക്കുന്നു. തൈരിലെ പ്രോട്ടീനും ഇഞ്ചിയുടെ മെറ്റബോളിസം വർദ്ധിപ്പിക്കാനുള്ള ശേഷിയും വിശപ്പ് നിയന്ത്രിക്കാനും അമിതഭാരം കുറയ്ക്കാനും സഹായിക്കും.

Mutta Choru Recipe: ബാക്കി വന്ന ചോറ് കളയല്ലേ! മുട്ടയിട്ടൊരു റെസിപ്പി; ഇത് പൊളിക്കും മക്കളേ

Neethu Vijayan — Wed, 09 Sep 2026 12:29:00 +0530

: ഉച്ചയ്ക്കോ തലേന്നോ വെച്ച ചോറ് ബാക്കി വന്നാൽ പിറ്റേന്ന് മനസ്സില്ലാതെ എടുത്തു കളയുന്നതാണ് നമ്മുടെ ശീലം. അല്ലെങ്കിൽ വെച്ചൂറ്റി കഴിക്കും. ഇനി അത് കളയണമെല്ലോ എന്ന പേടി വേണ്ട. വീട്ടിലുള്ള ലളിതമായ ചേരുവകളും കുറച്ച് മുട്ടയും ഉണ്ടെങ്കിൽ പത്ത് മിനിറ്റിൽ നാവിൽ കപ്പലോടിക്കുന്ന അടിപൊളി സ്പൈസി എഗ്ഗ് റൈസ് അഥവ നമ്മുടെ സ്വന്തം മുട്ട ചോറ് തയ്യാറാക്കാം. കുട്ടികൾക്കും മുതിർന്നവർക്കും ഒരുപോലെ ഇഷ്ടപ്പെടുന്ന ഈ വിഭവം എളുപത്തിൽ തയ്യാറാക്കാം. (Image Credit Source: Getty Images)

: ആവശ്യമായ ചേരുവകൾ: ചോറ് – 2 കപ്പ്, മുട്ട – 3 എണ്ണം, സവാള – 1 പൊടിയായി അരിഞ്ഞത്, പച്ചമുളക് – 2 വട്ടത്തിൽ അരിഞ്ഞത്, ഇഞ്ചി, വെളുത്തുള്ളി പേസ്റ്റ് – 1 ടീസ്‌പൂൺ, തക്കാളി – 1 ചെറുതായി അരിഞ്ഞത്, മഞ്ഞൾപ്പൊടി – 1/4 ടീസ്‌പൂൺ, മുളകുപൊടി – 1 ടീസ്‌പൂൺ, കുരുമുളകുപൊടി – 1/2 ടീസ്‌പൂൺ, ഗരം മസാല – 1/2 ടീസ്‌പൂൺ, കടുക്, കറിവേപ്പില, മല്ലിയില – ആവശ്യത്തിന്, വെളിച്ചെണ്ണ – 2 ടേബിൾ സ്പൂൺ, ഉപ്പ് – ആവശ്യത്തിന് എന്നിവയാണ് ആവശ്യമായ ചേരുവകൾ.

: തയ്യാറാക്കുന്ന വിധം: ഒരു ചീനച്ചട്ടിയിൽ അല്ലെങ്കിൽ പാനിൽ വെളിച്ചെണ്ണ ഒഴിച്ച് ചൂടാകുമ്പോൾ കടുകും കറിവേപ്പിലയും പച്ചമുളകും ഇട്ട് താളിക്കുക. ഇതിലേക്ക് പൊടിയായി അരിഞ്ഞ സവാളയും ഇഞ്ചി- വെളുത്തുള്ളി പേസ്റ്റും ആവശ്യത്തിന് ഉപ്പും ചേർത്ത് നല്ലതുപോലെ വഴറ്റുക. സവാള ലൈറ്റ് ബ്രൗൺ നിറമാകുമ്പോൾ തക്കാളി ചേർത്ത് മൃദുവാകുന്നതുവരെ വേവിക്കുക. തീ കുറച്ചുവെച്ച് മഞ്ഞൾപ്പൊടി, മുളകുപൊടി, ഗരം മസാല എന്നിവ ചേർത്ത് പച്ചമണം മാറുന്നത് വരെ ഇളക്കുക.

: വഴറ്റിയ മസാല പാനിന്റെ ഒരു വശത്തേക്ക് മാറ്റി വെച്ച്, ഒഴിവുള്ള ഭാഗത്തേക്ക് മുട്ട ഉടച്ചു ഒഴിക്കുക. ഇതിലേക്ക് അല്പം കുരുമുളകുപൊടിയും ഉപ്പും വിതറി സ്ക്രാംബിൾ ചെയ്ത് മുട്ട ചിക്കിയത് പോലെ എടുക്കുക. മുട്ട പാകമായി കഴിയുമ്പോൾ മസാലയുമായി നന്നായി യോജിപ്പിക്കുക. ഇതിലേക്ക് ബാക്കി വന്ന ചോറ് ചേർത്ത് നല്ല ഉയർന്ന തീയിൽ 2-3 മിനിറ്റ് ഇളക്കി യോജിപ്പിക്കുക. മുകളിലേക്ക് മല്ലിയില വിതറി തീ അണയ്ക്കാം. രുചികരമായ സ്പൈസി എഗ്ഗ് റൈസ് റെഡി.

: ബാക്കി വന്ന ചോറ് ഉപയോഗിച്ച് വെറൈറ്റിയായി പരീക്ഷിക്കാവുന്ന ഒരു ഐറ്റമാണിത്. ദിവസവും ചോറ് കഴിച്ച് മടുത്തവർക്കും എന്ത് കറിയുണ്ടാകുമെന്ന് ഓർത്ത് പേടിക്കുന്നവർക്ക് ഇത് നല്ലൊരു ഓപ്ഷനാണ്. കൂടാതെ കറിയായി സാലഡോ അച്ചാറോ മാത്രം മതിയാകും. അതിനാൽ ഇന്ന് തന്നെ നിങ്ങളുടെ വീട്ടിൽ ഇത് പരീക്ഷിച്ച് നോക്കൂ.

Fish Fry Masala Recipe: മീൻ വറുക്കുമ്പോൾ മസാല ഇങ്ങനെ തയ്യാറാക്കണം; കടകളിലെ അതേ ടേസ്റ്റ് ഉറപ്പ്

Neethu Vijayan — Sun, 06 Sep 2026 12:36:00 +0530

: വഴിയോരത്തുകൂടി പോകുമ്പോൾ കടകളിൽ നിന്ന് നല്ല കിടിലൻ മീൻ വറുക്കുന്നതിൻ്റെ മണം കിട്ടാറുണ്ട്. ഇത് വരുമ്പോൾ തന്നെ വായിലൂടെ കപ്പലോടിക്കാനുള്ള വെള്ളം വരും. പ്രത്യേകിച്ച് വിശന്നിരിക്കുകയാണെങ്കിൽ മീൻ വറുക്കുന്നതിൻ്റെ മണം വന്നാം സഹിക്കാൻ കഴിയില്ല. വീടുകളിൽ മീൻ വറുക്കുമ്പോൾ അതിന് രുചി കിട്ടണമെങ്കിൽ നല്ല മസാല ചേർത്ത് പെരട്ടിയെടുക്കണം. മസാല മോശമാണെങ്കിൽ മീൻ വറുത്താൽ യാതൊരു രുചിയോ മണമോ കിട്ടില്ല. (Image Credit Source: Getty Images)

: ചിലരുടെ പരാതി മസാല തേച്ചാലും മുഴുവൻ എണ്ണയിലേക്ക് വിട്ടുപോകുന്നുവെന്നത്. മീനിന്റെ പുറത്ത് നല്ല ക്രിസ്പിയായും ഉള്ളിൽ നല്ല ജ്യൂസിയായും മസാല പിടിച്ച് കിട്ടാൻ തട്ടുകടകളിലും റെസ്റ്റോറന്റുകളിലും ഉപയോഗിക്കുന്ന ആ പ്രത്യേക മസാലക്കൂട്ട് ഇനി വീട്ടിൽ തയ്യാറാക്കിയാലോ. നല്ല മൊരിഞ്ഞ മീൻ വറുത്തത് തയ്യാറാക്കുന്ന വിധം നമുക്ക് നോക്കാം.

: ആവശ്യമായ ചേരുവകൾ: കാശ്മീരി മുളകുപൊടി: 2 ടേബിൾസ്പൂൺ, സാധാരണ മുളകുപൊടി: 1/2 ടീസ്പൂൺ എരിവ് കൂടുതൽ വേണമെങ്കിൽ മാത്രം, മഞ്ഞൾപ്പൊടി: 1/2 ടീസ്പൂൺ, കുരുമുളകുപൊടി: 1/2 ടീസ്പൂൺ, ഇഞ്ചി-വെളുത്തുള്ളി പേസ്റ്റ്: 1 ടേബിൾസ്പൂൺ, ചെറുനാരങ്ങ നീര് / വിനാഗിരി: 1 ടേബിൾസ്പൂൺ, അരിപ്പൊടി / കോൺഫ്ലോർ: 1 ടേബിൾസ്പൂൺ, വെളിച്ചെണ്ണ: 1 ടീസ്പൂൺ മസാല കുഴയ്ക്കാൻ, കറിവേപ്പില: ആവശ്യത്തിന് ചതച്ചത്, ഉപ്പ്: ആവശ്യത്തിന് എന്നിവയാണ് ആവശ്യമായ ചേരുവകൾ.

: തയ്യാറാക്കുന്ന വിധം: മീൻ കഴുകി വൃത്തിയാക്കിയ ശേഷം വശങ്ങളിൽ ആഴത്തിൽ വരഞ്ഞെടുക്കുക. ഇത് മസാല ഉള്ളിലേക്ക് പിടിക്കാൻ സഹായിക്കും. ഒരു പാത്രത്തിൽ മുളകുപൊടി, മഞ്ഞൾപ്പൊടി, കുരുമുളകുപൊടി, ഇഞ്ചി-വെളുത്തുള്ളി പേസ്റ്റ്, അരിപ്പൊടി അല്ലെങ്കിൽ കോൺഫ്ലോർ, ആവശ്യത്തിന് ഉപ്പ്, ചെറുനാരങ്ങ നീര് എന്നിവയെടുക്കുക. ഈ മസാലപ്പൊടികളിലേക്ക് ഒരല്പം വെളിച്ചെണ്ണയും ചതച്ച കറിവേപ്പിലയും ചേർത്ത് കുറച്ച് വെള്ളം മാത്രം ഒഴിച്ച് കട്ടിയുള്ള പേസ്റ്റ് പരുവത്തിൽ കുഴച്ചെടുക്കുക. മസാല വെള്ളമായി പോകരുത്.

: തയ്യാറാക്കിയ മസാല പേസ്റ്റ് മീനിന്റെ എല്ലാ ഭാഗത്തും വരഞ്ഞ വശങ്ങളിലും നന്നായി തേച്ചുപിടിപ്പിക്കുക. മസാല പുരട്ടിയ മീൻ കുറഞ്ഞത് 20 മുതൽ 30 മിനിറ്റ് വരെ മാറ്റി വെക്കുക. ഫ്രിഡ്ജിൽ വെച്ചാൽ മസാല കൂടുതൽ ഉറച്ചുനിൽക്കും. ഒരു പാനിലേക്ക് ആവശ്യത്തിന് വെളിച്ചെണ്ണ ഒഴിച്ച് ചൂടാകുമ്പോൾ കറിവേപ്പില വിതറി മീൻ കഷ്ണങ്ങൾ ഇടുക. മീഡിയം ഫ്ലേമിൽ വെച്ച് ഇരുവശവും നന്നായി മൊരിയിച്ചെടുക്കുക.

Masala Chai Recipe: ഒരു കപ്പ് കുടിച്ചാൽ, ചുറ്റുമുള്ളതൊന്നും കാണില്ല!; തനി നാടൻ മസാല ചായ വീട്ടിലുണ്ടാക്കാം

Neethu Vijayan — Sat, 05 Sep 2026 21:44:00 +0530

: നല്ല തണുപ്പുള്ള മഴയത്ത് വീടിൻ്റെ ഓരം ചേർന്നിരുന്നു ഒരു ഗ്ലാസ് ചായ കുടിക്കാൻ ഇഷ്ടമില്ലാത്ത് മലയാളികൾ ചുരുക്കമാണ്. പ്രത്യേകിച്ച് ഒരു മസാല ചായയാണെങ്കിൽ. ദിവസവും മൂന്നും നാലും നേരം ചായ കുടിക്കാൻ ഇഷ്ടമുള്ളവരാണ് നമ്മൾ. എന്നാൽ ഇനി വൈകുന്നേരങ്ങളിലെ ക്ഷീണം മാറ്റാൻ ചൂടുള്ള ഒരു കപ്പ് മസാല ചായ തന്നെ ആയിക്കോട്ടെ. സുഗന്ധവ്യഞ്ജനങ്ങളുടെ മണവും രുചിയും നിറഞ്ഞ നാടൻ കേരള സ്റ്റൈൽ മസാല ചായ ഹോട്ടൽ രുചിയിൽ വീട്ടിൽ തയ്യാറാക്കുന്നത് എങ്ങനെയെന്ന് നോക്കാം. (Image Credit Source: Getty Images)

: ആവശ്യമായ ചേരുവകൾ: പാൽ: 2 കപ്പ്, വെള്ളം: 1 കപ്പ്, ചായപ്പൊടി: 2-3 ടേബിൾ സ്പൂൺ കടുപ്പം കൂടിയ പൊടി, പഞ്ചസാര: ആവശ്യത്തിന്, ഏലക്ക: 3 എണ്ണം, ഗ്രാമ്പൂ: 2 എണ്ണം, കറുവപ്പട്ട: 1 ചെറിയ കഷ്ണം, ഇഞ്ചി: 1 ചെറിയ കഷ്ണം ചതച്ചത്, കുരുമുളക്: 3-4 മണികൾ എന്നിവയാണ് നല്ല നാടൻ മസാല ചായ ഉണ്ടാക്കാൻ ആവശ്യമായ ചേരുവകൾ. ഇവയെല്ലാം ചേർന്നാൽ മാത്രമെ ഗുണവും മണവും രുചിയും ഒരുപോലെ കിട്ടുകയുള്ളൂ.

: തയ്യാറാക്കുന്ന വിധം: ഏലക്ക, ഗ്രാമ്പൂ, കറുവപ്പട്ട, കുരുമുളക് എന്നിവ ഒരു ഇടികല്ലിൽ വെച്ച് തരിതരിപ്പായി ചതച്ചെടുക്കുക അല്ലെങ്കിൽ മിക്സിയുടെ ജാറിലിട്ട് ഒന്ന് പൊടിച്ചെടുക്കുക. ഒരു പാത്രത്തിൽ ഒരു കപ്പ് വെള്ളമെടുത്ത് തിളപ്പിക്കുക. വെള്ളം തിളച്ചു തുടങ്ങുമ്പോൾ ചതച്ചുവെച്ച ഇഞ്ചിയും മസാലക്കൂട്ടും അതിലേക്ക് ചേർക്കുക. 2-3 മിനിറ്റ് ഇടത്തരം തീയിൽ തിളപ്പിച്ച് മസാലയുടെ ഗുണവും മണവും വെള്ളത്തിലേക്ക് ഇറങ്ങാൻ സമയം നൽകുക.

: ഇനി ഇതിലേക്ക് ചായപ്പൊടി ചേർത്ത് നന്നായി തിളപ്പിക്കുക. ചായ തിളച്ച് നല്ല നിറം വരുമ്പോൾ എടുത്തുവച്ചിരിക്കുന്ന രണ്ടു കപ്പ് പാൽ ഒഴിക്കുക. പാൽ തിളച്ചു മുകളിലേക്ക് വരുമ്പോൾ തീ കുറച്ചു വെച്ച് 2 മിനിറ്റ് കൂടി വീണ്ടും തിളപ്പിക്കുക. ശേഷം മാത്രം ആവശ്യത്തിന് പഞ്ചസാര ചേർത്ത് ഇളക്കുക. ചായ നന്നായി തിളച്ച ശേഷം അടുപ്പിൽ നിന്ന് ഇറക്കി നന്നായി അരിച്ചെടുക്കുക.

: ഒരു ഗ്ലാസിൽ നിന്ന് മറ്റൊരു ഗ്ലാസിലേക്ക് അത്യാവശ്യം ഉയരത്തിൽ നിന്ന് ആറ്റി പതപ്പിച്ചെടുത്താൽ നല്ല കിടിലൻ തട്ടുകട മസാല ചായ റെഡി. എന്നും സാധാരണ പാൽച്ചായ കുടിച്ച് മടുത്തവർക്ക് വ്യത്യസ്തമായ രുചിയിലും എന്നാൽ ഗുണം ഒട്ടും കുറയാതെയും മസാല ചായ വീട്ടിലുണ്ടാക്കി കുടിക്കാവുന്നതാണ്. ഇങ്ങനെ തയ്യാറാക്കാൻ പഠിച്ചാൽ ഇടയ്ക്കിടെ കടകളിലേക്ക് ഓടേണ്ടി വരില്ല.

Sathukudi Juice: ഒരു സാത്തുക്കുടി എടുക്കട്ടെ…; ബെത്‌ലഹേം കുടുംബ യൂണിറ്റിലെ വൈറൽ ജ്യൂസ് വീട്ടിലുണ്ടാക്കാലോ

Neethu Vijayan — Sat, 05 Sep 2026 16:47:00 +0530

: ഗിരീഷ് എ ഡി സംവിധാനം ചെയ്ത നിവിൻ പോളി നായകനും മമിത ബൈജു നായികയുമായി എത്തിയ ‘ബെത്‌ലഹേം കുടുംബ യൂണിറ്റ്’ തീയേറ്ററുകളിൽ വലിയ തരംഗമാണ് സൃഷ്ടിക്കുന്നത്. ചിത്രത്തിലെ ‘സോൾമേറ്റ്‌സ് – ഒരു സത്തുകുടി പ്രണയം’ എന്ന കൊച്ചു ഷോർട്ട് ഫിലിമിലൂടെ മലയാളികൾ വീണ്ടും ഏറ്റെടുത്ത ഒരു പേരാണ് സത്തുകുടി. തമിഴ്നാട്ടിലും തെക്കൻ കേരളത്തിലും ജനപ്രിയമായ ഈ പേര് കേൾക്കുമ്പോൾ പഴയ മോഹൻലാൽ-ഫാസിൽ ചിത്രമായ ‘ചന്ദ്രലേഖ’യിലെ തമാശ രംഗങ്ങളും ചിലർക്കെങ്കിലും ഓർമ്മവന്നേക്കാം. (Image Credit Source: Getty Images)

: എന്താണ് ഈ വിചിത്രമായ പേരിന് പിന്നിലെ രഹസ്യം? സംഗതി വേറെയൊന്നുമല്ല, നമ്മൾ ദാഹമകറ്റാൻ സ്ഥിരമായി കുടിക്കുന്ന മൊസാമ്പി അഥവാ മധുരനാരങ്ങ തന്നെയാണ് ഈ സത്തുകുടി. തമിഴ് വാക്കുകളിൽ നിന്നാണ് ഈ പേരിന്റെ ഉത്ഭവം. തളർച്ചയും നിർജ്ജലീകരണവും മാറ്റാൻ ഏറ്റവും മികച്ച പ്രകൃതിദത്ത പാനീയമാണ് സാത്തുകുടി ജ്യൂസ് അഥവ നമ്മുടെ സ്വന്തം മൊസാമ്പി ജ്യൂസ്. ഇനി സാത്തുക്കുടിയെന്ന് കേട്ട് ആരും അത്ഭുതപെടേണ്ട നല്ല കിടിലൻ ടേസ്റ്റിൽ വൈറൽ ജ്യൂസ് വീട്ടിലുണ്ടാക്കാം.

: ആവശ്യമായ ചേരുവകൾ: സാത്തുക്കുടി അഥവ മൊസാമ്പി: 3-4 എണ്ണം, പഞ്ചസാര / തേൻ: ആവശ്യത്തിന്, ഐസ് ക്യൂബുകൾ: ആവശ്യത്തിന്, ചെറിയ ഒരു കഷ്ണം ഇഞ്ചി ചതച്ചത് ആവശ്യമെങ്കിൽ മാത്രം, ഉപ്പ്: ഒരു നുള്ള്, ചെറുനാരങ്ങ നീര്: അര ടീസ്പൂൺ എന്നിവയാണ് നല്ലൊരു കിടിലൻ രുചിയിൽ സാത്തുക്കുടി ജ്യൂസ് ഉണ്ടാക്കാൻ ആവശ്യമായ ചേരുവകൾ. ഏത് ചൂട് സമയത്തും കുടിക്കാൻ പറ്റുന്ന ഇത് ആരോഗ്യ ഗുണങ്ങളിലും മുൻ പന്തിയിലാണ്.

: തയ്യാറാക്കുന്ന വിധം: സാത്തുക്കുടിയുടെ (മൊസാമ്പി) പുറത്തെ പച്ച അല്ലെങ്കിൽ മഞ്ഞ നിറത്തിലുള്ള തൊലിയും ഉള്ളിലെ വെളുത്ത പാടയും അതിനുള്ളിലെ കുരുവും പൂർണ്ണമായി നീക്കം ചെയ്യുക. വെളുത്ത പാടയോ നാരുകളോ വിത്തോ അരഞ്ഞുപോയാലാണ് ജ്യൂസിന് കയ്പ്പ് വരുന്നത്. ബ്ലെൻഡറിലേക്ക് മൊസാമ്പി ആവശ്യത്തിന് പഞ്ചസാര (അല്ലെങ്കിൽ തേൻ), ഒരു നുള്ള് ഉപ്പ്, ചതച്ചുവച്ച ഇഞ്ചി, ഐസ് ക്യൂബുകൾ എന്നിവ ചേർക്കുക.

: മിക്സി തുടർച്ചയായി അടിക്കാതെ 2-3 തവണ പൾസ് ചെയ്ത് മാത്രം അടിച്ചെടുക്കുക. ശേഷം ഒരു അരിപ്പ ഉപയോഗിച്ച് ജ്യൂസ് അരിച്ചെടുക്കുക. അവസാന തുള്ളി വരെ സ്പൂൺ കൊണ്ട് അമർത്തി നീര് മാത്രമായി മാറ്റുക. നല്ലൊരു ഗ്ലാസിലേക്ക് കുറച്ച് ഐസ് ക്യൂബുകൾ ഇട്ട് അതിലേക്ക് ഫ്രഷ് സാത്തുക്കുടി ജ്യൂസ് ഒഴിച്ച് മുകളിൽ അല്പം ചെറുനാരങ്ങ നീര് കൂടി ഒഴിച്ച് (വേണമെങ്കിൽ) തണുപ്പോടെ കുടിച്ചു നോക്കൂ. ഉന്മേഷവും ആരോഗ്യവും വീണ്ടെടുത്തത് പോലെ നിങ്ങൾക്ക് തോന്നും.

Rusk Ice Cream: റസ്ക് വെച്ച് ഐസ്ക്രീമോ? അതും ഇത്ര എളുപ്പത്തിൽ!; ഇതാ കിടിലൻ റെസിപ്പി

Neethu Vijayan — Fri, 04 Sep 2026 12:25:00 +0530

: വൈകിട്ട് നാലുമണി ചായക്കൊപ്പം കഴിക്കാൻ വാങ്ങിയ റസ്ക് പാത്രത്തിൽ ബാക്കിയുണ്ടോ? എന്നും റസ്ക് കഴിച്ച് മടുത്തവരാണെങ്കിൽ അതുപയോഗിച്ച് കട്ലറ്റ് മാത്രമല്ല വേറെയും ചിലതുണ്ടാക്കാം. കടകളിൽ നിന്ന് വാങ്ങുന്നതിനേക്കാൾ രുചികരവും ക്രീമിയുമായ ഐസ്ക്രീം ഇനി വീട്ടിൽ തന്നെ തയ്യാറാക്കാം. വിരുന്നുകാർ വരുമ്പോഴോ കുട്ടികൾക്കോ പെട്ടെന്ന് ഉണ്ടാക്കികൊടുക്കാൻ പറ്റിയ ഈ സിംപിൾ റസ്ക് ഐസ്ക്രീം റെസിപ്പി എങ്ങനയെന്ന് നോക്കാം. (Image Credit Source: Getty Images)

: ആവശ്യമായ ചേരുവകൾ: റസ്ക്- 6 – 8 എണ്ണം, പാൽ: 2 കപ്പ് നല്ല കട്ടിയുള്ള പാൽ, പഞ്ചസാര: ½ കപ്പ് നിങ്ങളുടെ മധുരത്തിനനുസരിച്ച്, ഫ്രഷ് ക്രീം: ½ കപ്പ് അല്ലെങ്കിൽ 2 ടേബിൾസ്പൂൺ പാൽപ്പൊടി, വാനില എസ്സെൻസ്: 1 ടീസ്പൂൺ, ഡ്രൈ ഫ്രൂട്ട്സ് അണ്ടിപ്പരിപ്പ്, ബദാം, പിസ്ത: അലങ്കരിക്കാൻ ആവശ്യത്തിന് എന്നിവയാണ് ഈ സിമ്പിൾ ഐസ്ക്രീം തയ്യാറാക്കാൻ ആവശ്യമായ ചേരുവകൾ. ഇവ എങ്ങനെ തയ്യാറാക്കാമെന്ന് പരിശോധിക്കാം.

: തയ്യാറാക്കുന്ന വിധം: ആദ്യം റസ്ക് ചെറിയ കഷ്ണങ്ങളാക്കി മിക്സിയുടെ ജാറിലിട്ട് നന്നായി പൊടിച്ചെടുക്കുക. ഒരു പാത്രത്തിൽ പാൽ ഒഴിച്ച് തിളപ്പിക്കാൻ വെക്കുക. പാൽ തിളച്ചു വരുമ്പോൾ അതിലേക്ക് പഞ്ചസാര ചേർത്ത് നന്നായി ഇളക്കി കൊടുക്കാം. പഞ്ചസാര നന്നായി അലിഞ്ഞതിന് ശേഷം തീ കുറച്ചുവെക്കണം. എന്നിട്ട് തയ്യാറാക്കി വെച്ചിരിക്കുന്ന റസ്ക് പൊടി പാലിലേക്ക് ചേർത്ത് കട്ടയില്ലാതെ നന്നായി ഇളക്കി യോജിപ്പിക്കുക. മിശ്രിതം പെട്ടെന്ന് കട്ടിയായി വരും.

: റസ്ക് മിശ്രിതം കുറുക്കി എടുത്ത ശേഷം അടുപ്പിൽ നിന്ന് മാറ്റി പൂർണ്ണമായും തണുക്കാൻ വെക്കുക. തണുത്ത മിശ്രിതം മിക്സിയുടെ വലിയ ജാറിലേക്ക് മാറ്റുക. ഇതിലേക്ക് ഫ്രഷ് ക്രീമും വാനില എസ്സെൻസും ചേർത്ത് 1-2 മിനിറ്റ് നന്നായി അടിച്ചെടുക്കുക. ഇങ്ങനെ അടിക്കുമ്പോൾ ഐസ്ക്രീമിന് നല്ല സാഫ്റ്റ്‌നെസ്സും ക്രീമി ടെക്സ്ചറും നൽകും. വേണമെങ്കിൽ അല്പം ഏലക്ക് പൊടി ചേർക്കാവുന്നതാണ്.

: ഈ മിശ്രിതം ഒരു എയർടൈറ്റ് കണ്ടെയ്നറിലേക്ക് മാറ്റി, മുകളിൽ കുറച്ച് ഡ്രൈ ഫ്രൂട്ട്സ് വിതറി അടച്ച് 6 മുതൽ 8 മണിക്കൂർ വരെ ഫ്രീസറിൽ വെക്കുക. ശേഷം പുറത്തെടുക്കുമ്പോൾ നല്ല അടിപൊളി ക്രീമി റസ്ക് ഐസ്ക്രീം റെഡിയായിട്ടുണ്ടാകും. നന്നായി തണുത്ത ഇത് കട്ട് ചെയ്ത് തണുപ്പോടെ കഴിച്ചു നോക്കൂ, റസ്ക് കൊണ്ടുണ്ടാക്കിയതാണെന്ന് ആരും പറയില്ല.

Pappadam Recipe: ചോറിന് വേറെ കറി ഒന്നും വേണ്ടിവരില്ല! പപ്പടം കൊണ്ട് ഇങ്ങനെ ചെയ്തു നോക്കൂ

Neethu Vijayan — Thu, 03 Sep 2026 17:37:00 +0530

: ഊണ് കഴിക്കാൻ കറികളൊന്നുമില്ലെന്ന് ഓർത്ത് ഇനി ആരും സങ്കടപ്പെടേണ്ട. ഓണത്തിന് വാങ്ങിയ പപ്പടത്തിൻ്റെ ബാക്കി വീട്ടിലുണ്ടെങ്കിൽ ഒരു കഷ്ണം ഉള്ളിയും മാത്രം മതി അഞ്ചേ അഞ്ച് മിനിറ്റിൽ ചോറുണ്ണാൻ മനോഹരമായ ഒരു നാടൻ വിഭവം തയ്യാറാക്കാം. ‘പപ്പടം തോരൻ’ അല്ലെങ്കിൽ ‘പപ്പടം ഉപ്പേരി’ എന്ന് വിളിക്കുന്ന ഈ വിഭവം വളരെ എളുപ്പത്തിൽ എങ്ങനെ ഉണ്ടാക്കാമെന്ന് നോക്കാം. (Image credit source: Social Media)

: ആവശ്യമായ ചേരുവകൾ: പപ്പടം – 5 അല്ലെങ്കിൽ 6 എണ്ണം, ചെറിയ ഉള്ളി (കൊച്ചുള്ളി) – 8-10 എണ്ണം പൊടിയായി അരിഞ്ഞത്, പച്ചമുളക് – 2 എണ്ണം വട്ടത്തിൽ അരിഞ്ഞത്, വെളുത്തുള്ളി – 3 അല്ലി ചതച്ചത്, കടുക് – 1/2 ടീസ്പൂൺ, വറ്റൽ മുളക് – 2 എണ്ണം, തേങ്ങ ചിരകിയത് – 3 ടേബിൾ സ്പൂൺ, മഞ്ഞൾപ്പൊടി – 1/4 ടീസ്പൂൺ, മുളകുപൊടി – 1/2 ടീസ്പൂൺ, വെളിച്ചെണ്ണ, കറിവേപ്പില, ഉപ്പ് – ആവശ്യത്തിന് എന്നിവയാണ് ആവശ്യമായ ചേരുവകൾ.

: തയ്യാറാക്കുന്ന വിധം: ആദ്യം പപ്പടം നല്ല വെളിച്ചെണ്ണയിൽ വറുത്തെടുക്കുക. തണുത്ത ശേഷം ഇവ കൈകൊണ്ട് ഒരുപാടങ്ങ് പൊടിയാതെ ചെറുതായി ഉടച്ചുവെക്കുക. ഒരു പാനിൽ അല്പം വെളിച്ചെണ്ണ ഒഴിച്ച് ചൂടാകുമ്പോൾ കടുകും വറ്റൽ മുളകും കറിവേപ്പിലയും ഇട്ട് പൊട്ടിക്കുക. ഇതിലേക്ക് അരിഞ്ഞുവെച്ച ചെറിയ ഉള്ളി, പച്ചമുളക്, ചതച്ച വെളുത്തുള്ളി എന്നിവ ചേർത്ത് ഗോൾഡൻ ബ്രൗൺ നിറമാകുന്നതുവരെ നന്നായി വഴറ്റുക.

: തീ കുറച്ചുവെച്ച ശേഷം മഞ്ഞൾപ്പൊടിയും മുളകുപൊടിയും ചേർത്ത് പച്ചമണം മാറുന്നത് വരെ ഇളക്കുക. പപ്പടത്തിൽ ഉപ്പുള്ളതിനാൽ മസാലയ്ക്ക് ആവശ്യമായ അല്പം ഉപ്പ് മാത്രം ചേർക്കുക. ഇനി ചിരകിയ തേങ്ങ ചേർത്ത് ഒരു മിനിറ്റ് ഇളക്കി യോജിപ്പിക്കുക. അവസാനമായി ഉടച്ചുവെച്ചിരിക്കുന്ന പപ്പടം ഇതിലേക്ക് ഇട്ട് നന്നായി ഇളക്കി യോജിപ്പിച്ച് തീ ഓഫ് ചെയ്യാം.

: ചൂടോടെ കഴിക്കുമ്പോൾ പപ്പടത്തിന്റെ ക്രിസ്പിയായിട്ടുള്ള രീതിയും മസാലയുടെ രുചിയും ചേർന്ന് ചോറിന് വേറെ ഒരു കറിയുടെയും ആവശ്യമുണ്ടാകില്ല. പെട്ടെന്ന് അതിഥികൾ വരുമ്പോഴും കറികൾ ഇല്ലാത്തപ്പോഴും ട്രൈ ചെയ്യാൻ പറ്റിയ ഏറ്റവും മികച്ച നാടൻ റെസിപ്പിയാണിത്. തീർച്ചയായും നിങ്ങൾക്ക് ഇത് പരീക്ഷിച്ച് നോക്കാവുന്നതാണ്.

Pineapple Thoran: പൈനാപ്പിൾ തോരൻ കഴിച്ചിട്ടുണ്ടോ! വേറെ ലെവലാണ്; ഒന്ന് പരീക്ഷിച്ച് നോക്കൂ

Neethu Vijayan — Wed, 02 Sep 2026 11:47:00 +0530

: പൈനാപ്പിൾ ജ്യൂസ് അടിച്ച് കുടിക്കുന്നതാണ് നമ്മുടെ ശീലം. പച്ചടി പുളിശേരി തുടങ്ങി സദ്യകളിലെ ചില വിഭവങ്ങളിൽ പൈനാപ്പിളിന് സ്ഥാനമുണ്ട്. എന്നാൽ നിങ്ങൾ ഇതുവരെ പരീക്ഷിക്കാത്ത ഊണിനുമൊപ്പം വിളമ്പാൻ പറ്റിയ, മധുരവും എരിവും പുളിയും പാകത്തിന് ചേർന്ന ഒരു വെറൈറ്റി വിഭവമാണ് പൈനാപ്പിൾ തോരൻ. എന്നും കഴിക്കുന്ന പച്ചക്കറി തോരനുകളിൽ നിന്ന് വ്യത്യസ്തമായ രുചിക്കൂട്ടാണിത്. വളരെ കുറഞ്ഞ സമയം കൊണ്ട് വീട്ടിൽ തയ്യാറാക്കാൻ പറ്റിയ ഈ റെസിപ്പി ഒന്ന് പരീക്ഷിച്ചാലോ. (Image Credit Source: Getty Images)

: ആവശ്യമായ ചേരുവകൾ: പൈനാപ്പിൾ ചെറുതായി അരിഞ്ഞത്- 2 കപ്പ്, തേങ്ങ ചിരകിയത്- 1 കപ്പ്, പച്ചമുളക്- 2-3 എണ്ണം, മഞ്ഞൾപ്പൊടി- 1/2 ടീസ്പൂൺ, മുളകുപൊടി- 1/2 ടീസ്പൂൺ, കടുക്- 1 ടീസ്പൂൺ, ചെറിയ ഉള്ളി- ഒരു അഞ്ച് ആറ് എണ്ണം, വറ്റൽ മുളക്- 2 എണ്ണം, കറിവേപ്പില- ഒരു തണ്ട്, വെളിച്ചെണ്ണ- ആവശ്യത്തിന്, ഉപ്പ്- ആവശ്യത്തിന് എന്നിവയാണ് പൈനാപ്പിൾ തോരന് ആശ്യമായ ചേരുവകൾ.

: തയ്യാറാക്കുന്ന വിധം: ആദ്യം തന്നെ ഒരു ഇടത്തരം പൈനിപ്പിൾ വൃത്തിയാക്കി ചെറുതായി അരിഞ്ഞു വയ്ക്കുക. ചിരകിവെച്ച തേങ്ങ, പച്ചമുളക്, മഞ്ഞൾപ്പൊടി, മുളകുപൊടി എന്നിവ ചേർത്ത് മിക്സിയുടെ ചെറിയ ജാറിൽ ഒന്നു ചതച്ചെടുക്കുക. അരഞ്ഞു പോകാതെ ശ്രദ്ധിക്കണം. ശേഷം ഒരു ഒരു പാനിൽ എണ്ണ ചൂടാക്കി കടുക് പൊട്ടിക്കുക. കറിവേപ്പില, ചെറിയ ഉള്ളി, പച്ചമുളക് എന്നിവ ചെറുതായി അരിഞ്ഞത് അതിലേക്ക് ചേർക്കുക. ചെറിയ ഉള്ളി മൃദുവാകുന്നതുവരെ വഴറ്റുക.

: വേണമെങ്കിൽ ചെറുതായി അരിഞ്ഞുവെച്ച പൈനാപ്പിൾ കഷണങ്ങൾ ആവശ്യത്തിന് ഉപ്പും അല്പം വെള്ളവും ചേർത്ത് ഒരു ചീനച്ചട്ടിയിലോ പാനിലോ വേവിക്കാം. ശേഷം ഉള്ളി വഴറ്റിയതിലേക്ക് പൈനാപ്പിൾ ചേർത്ത് ചതച്ചുവെച്ച തേങ്ങക്കൂട്ട് ഇതിന്റെ മുകളിലേക്ക് ഇട്ട് കുറച്ച് സമയം അടച്ചുവെച്ച് വേവിക്കുക. ആവി വന്ന ശേഷം മൂടി തുറന്ന് പൈനാപ്പിളും തേങ്ങയും നന്നായി ഇളക്കി യോജിപ്പിച്ച് വെള്ളമയം പൂർണ്ണമായും വറ്റിച്ചെടുക്കുക.

: പൈനാപ്പിൾ അധികം വേവിക്കുന്നത് ഒഴിവാക്കുക എങ്കിൽ മാത്രമെ തോരന് രുചിയുണ്ടാകു. വിരുന്നുകാർ വീട്ടിൽ വരുമ്പോൾ ഇത്തരം വെറാറ്റി റെസിപ്പി നിങ്ങൾക്ക് പരീക്ഷിക്കാവുന്നതാണ്. വിറ്റാമിനുകളും ആന്റിഓക്സിഡന്റുകളും എൻസൈമുകളും ധാരാളമായി അടങ്ങിയിട്ടുള്ള ഒരു പോഷകഗുണമുള്ള ഫലമാണ് പൈനാപ്പിൾ. പൈനാപ്പിളിൽ അടങ്ങിയിരിക്കുന്ന ബ്രോമെലെയ്ൻ എന്ന എൻസൈം പ്രോട്ടീനുകളെ വേഗത്തിൽ ദഹിപ്പിക്കാനും ദഹനസംബന്ധമായ പ്രശ്നങ്ങൾ പരിഹരിക്കാനും സഹായിക്കുന്നു.

Omelette Recipe: തേങ്ങ ചിരകിയിട്ട മുട്ട പൊരിച്ചത് കഴിച്ചിട്ടുണ്ടോ? അപാര ടേസ്റ്റാണ്!

Neethu Vijayan — Sat, 29 Aug 2026 19:07:00 +0530

: മുട്ട പൊരിച്ചത് ഇഷ്ട്ടമില്ലാത്തവർ ആരാണുള്ളത്. ചോറിനൊപ്പം മറ്റ് കറികളൊന്നുമില്ലെങ്കിലും ഒരു മുട്ട പൊരിച്ചതുണ്ടെങ്കിൽ ഊണ് കുശാലാകും. പല വെറൈറ്റിയിലൊക്കെ ഇത് പരീക്ഷിക്കാറുണ്ട് നമ്മൾ മലയാളികൾ. മുട്ട ചിക്കിയെടുക്കുന്നതും അതിലെ ഒരു കൂട്ടാണ്. സാധാരണ മുട്ട പൊരിക്കുന്നതിൽ നിന്ന് വ്യത്യസ്തമായി, അൽപ്പം തേങ്ങ ചിരകിയതും ചേർത്തൊരു നാടൻ മുട്ട പൊരിച്ചത് ട്രൈ ചെയ്താലോ. ചോറിനൊപ്പവും ചപ്പാത്തിക്കൊപ്പവും കഴിക്കാൻ അപാര രുചിയാണ് ഇതിന്. വളരെ കുറഞ്ഞ സമയം കൊണ്ട് എളുപ്പത്തിൽ ഇത് തയ്യാറാക്കാം. (Image Credit Source: Getty Images)

: ആവശ്യമായ ചേരുവകൾ: മുട്ട- രണ്ട് എണ്ണം, തേങ്ങ ചിരകിയത്- 3-4 ടേബിൾ സ്പൂൺ, സവാള അരിഞ്ഞത്- 1 ചെറുത്, പച്ചമുളക് അരിഞ്ഞത്- 2 എണ്ണം, ഇഞ്ചി, വെളുത്തുള്ളി ചതച്ചത്- ½ ടീസ്പൂൺ (ആവശ്യമെങ്കിൽ), കുരുമുളകുപൊടി- ½ ടീസ്പൂൺ, മഞ്ഞൾപ്പൊടി- ¼ ടീസ്പൂൺ, കറിവേപ്പില, ഉപ്പ്, വെളിച്ചെണ്ണ- ആവശ്യത്തിന് എന്നിവയാണ് ഈ വെറൈറ്റി മുട്ട പൊരിച്ചതിന് ആവശ്യമായിട്ടുള്ളത്.

: ഉണ്ടാക്കുന്ന വിധം: ഒരു പാത്രത്തിലേക്ക് രണ്ടു മുട്ട പൊട്ടിച്ചൊഴിക്കുക. അതിലേക്ക് ചിരകിയ തേങ്ങ, അരിഞ്ഞ സവാള, പച്ചമുളക്, ഇഞ്ചി-വെളുത്തുള്ളി ചതച്ചത്, കറിവേപ്പില, മഞ്ഞൾപ്പൊടി, കുരുമുളകുപൊടി, ആവശ്യത്തിന് ഉപ്പ് എന്നിവ ചേർക്കുക. ഒരു ഫോർക്ക് അല്ലെങ്കിൽ സ്പൂൺ ഉപയോഗിച്ച് ചേരുവകളെല്ലാം നന്നായി യോജിപ്പിച്ച് പതുക്കെ അടിച്ചെടുക്കുക. കുരുമുളക് പൊടി കട്ടയായി കിടക്കരുത്. നന്നായി അടിക്കുക.

: പാനിൽ അല്പം വെളിച്ചെണ്ണ ഒഴിച്ച് ചൂടാകുമ്പോൾ തയ്യാറാക്കിയ മിശ്രിതം ഒഴിച്ച് കൊടുക്കുക. ചെറിയ തീയിൽ വെച്ച് ഇരുവശവും നല്ല പൊൻനിറമാകുന്നത് വരെ തിരിച്ചും മറിച്ചുമിട്ട് പൊരിച്ചെടുക്കുക. ചൂട് ചായയ്ക്കൊപ്പമോ ഉച്ച ഊണിനൊപ്പമോ കഴിക്കാൻ പറ്റിയ അടിപൊളി റെസിപ്പിയാണിത്. നിങ്ങൾക്ക് ചപ്പാത്തിക്കൊപ്പവും ഇത് കഴിക്കാം. ഇതുവരെ കിട്ടാത്ത മറ്റൊരു രുചി നിങ്ങൾക്ക് ഇതിൽ നിന്ന് കിട്ടും.

: എപ്പോഴും ഇത് തയ്യാറാക്കുമ്പോൾ പുതുതായി ചിരകിയ തേങ്ങ ഉപയോഗിക്കു. അതിനാകും രുചി കൂടുതൽ. ഓംലെറ്റ് മറിച്ചിടാൻ ബുദ്ധിമുട്ടായതിനാൽ അധികം തേങ്ങ ചിരകി ചേർക്കരുത്. ഓംലെറ്റ് ഇടത്തരം-കുറഞ്ഞ തീയിൽ വേവിക്കുന്നത് മുട്ട തുല്യമായി വേവാൻ സഹായിക്കും. സാധാരണ പാചക എണ്ണയ്ക്ക് പകരം വെളിച്ചെണ്ണ ഉപയോഗിക്കുക. സവാളയ്ക്ക് പകരം ചെറിയ ഉള്ളി ചേർക്കാവുന്നതാണ്. കൂടാതെ മല്ലിയിലയും ചേർക്കാം.

Healthy Low Oil Onam Sadhya: വില കൂടുതലാണേ! എണ്ണ കുറച്ച് ഹെൽത്തിയായി ഓണസദ്യ ഉണ്ടാക്കാം

Neethu Vijayan — Sun, 23 Aug 2026 20:31:00 +0530

: ഓണക്കാലത്ത് വെളിച്ചെണ്ണയ്ക്കും നിത്യോപയോഗ സാധനങ്ങൾക്കും വില കുതിച്ചുയരുന്നത് സാധാരണമാണ്. എന്നാൽ ഈ സാഹചര്യത്തിൽ വീട്ടമ്മമാരുടെയും കുടുംബങ്ങളുടെയും പ്രധാന ആശങ്കയാണ് സദ്യയുടെ ബജറ്റ് തന്നെയാണ്. എന്നാൽ, എണ്ണയുടെയും തേങ്ങയുടെയും അളവ് കുറച്ചുകൊണ്ട് ബജറ്റിലൊതുങ്ങുന്നതും, അതുപോലെ ആരോഗ്യകരവുമായ ഓണസദ്യ എളുപ്പത്തിൽ തയ്യാറാക്കാം. കൊളസ്ട്രോളും കലോറിയും പേടിക്കാതെ വയറുനിറയെ കഴിക്കാമെന്നതാണ് ഇതിന്റെ മറ്റൊരു പ്രത്യേകത. (Image Credit Source: Getty Images)

: എയർ ഫ്രയർ അല്ലെങ്കിൽ ഓവൻ: കായവറുത്തതും ശർക്കര വരട്ടിയും പപ്പടവും ലിറ്റർ കണക്കിന് വെളിച്ചെണ്ണയിൽ മുക്കി വറുക്കുന്നതാണ് സദ്യയിലെ പ്രധാന ചെലവ്. പപ്പടം എണ്ണയിൽ വറുക്കുന്നതിന് പകരം അടുപ്പിലെ തീയിലോ മൈക്രോവേവിലോ ചുട്ടെടുക്കാം. ഏത്തക്കായ അരിഞ്ഞ് നേരിയ തോതിൽ വെളിച്ചെണ്ണ തളിച്ച ശേഷം എയർ ഫ്രൈയറിലോ ഓവനിലോ ബേക്ക് ചെയ്താൽ ക്രിസ്പിയായ ചിപ്സ് കുറഞ്ഞ എണ്ണയിൽ തയ്യാറാക്കാം.

: പച്ചക്കറികൾ എണ്ണയിൽ വഴറ്റുന്നതിന് പകരം ഉപ്പും മഞ്ഞൾപ്പൊടിയും ചേർത്ത് ആവിയിൽ വേവിച്ചെടുക്കുക. ഇത് എണ്ണയുടെ ഉപയോഗം 80 ശതമാനം വരെ കുറയ്ക്കാനും പച്ചക്കറികളിലെ പോഷകഗുണം നിലനിർത്താനും സഹായിക്കും. തീയാൽ, വറുത്തരച്ച സാമ്പാർ എന്നിവയ്ക്ക് തേങ്ങയും വറ്റൽമുളകും എണ്ണയിൽ വറുത്തെടുക്കേണ്ടി വരും. ഇതിന് പകരം, വറുത്തരയ്ക്കാത്ത സാമ്പാർ തയ്യാറാക്കുക.

: വെള്ളരിയോ കുമ്പളങ്ങയോ ഉപയോഗിച്ച് കുറഞ്ഞ തേങ്ങയിൽ മോരുകൂട്ടാൻ അല്ലെങ്കിൽ പച്ചടി ഉണ്ടാക്കുക. ഇത് എണ്ണച്ചെലവ് കുറയ്ക്കുകയും ദഹനത്തിന് സഹായിക്കുകയും ചെയ്യും. കാളനും ഓലനുമെല്ലാം എണ്ണയിൽ വഴറ്റുന്നതിന് പകരം ചെറിയ അളവിൽ പച്ചവെളിച്ചെണ്ണ ഒടുവിൽ തിളപ്പിച്ചു വാങ്ങിവെക്കുമ്പോൾ മാത്രം ഒഴിച്ച് മണം വരുത്തുക. ഓലനിൽ എണ്ണയേക്കാൾ പ്രധാനം വെളിച്ചെണ്ണയുടെ പച്ചമണമാണ്. അതിനാൽ കുറച്ചു തുള്ളി പച്ചവെളിച്ചെണ്ണ ഒടുവിൽ ഒഴിച്ചാൽ മതിയാകും.

: പായസം തയ്യാറാക്കുമ്പോൾ നെയ്യിൽ വറുത്തിടുന്നത് പരമാവധി കുറയ്ക്കുക. അണ്ടിപ്പരിപ്പും മുന്തിരിയും ഡ്രൈ റോസ്റ്റ് ചെയ്ത് ചേർത്താൽ നെയ്യിന്റെ ഉപയോഗം പൂർണ്ണമായി ഒഴിവാക്കാം. ഇത്തവണത്തെ ഓണത്തിന് വെളിച്ചെണ്ണയുടെ വിലവർദ്ധനവിനെ തടഞ്ഞുകൊണ്ട് ബജറ്റിലൊതുങ്ങുന്ന ഓണസദ്യ നമുക്ക് തയ്യാറാക്കാം.

Sarkara Varatti Recipe: ഒട്ടിപ്പിടിക്കാതെ, നല്ല ക്രിസ്പിയായി ശർക്കര വരട്ടി കിട്ടണോ? ഇതാ രഹസ്യക്കൂട്ട്

Neethu Vijayan — Sun, 23 Aug 2026 16:21:00 +0530

: ഓണസദ്യയുടെ ഇലയിൽ ആദ്യം വിളമ്പുന്ന നാടൻ വിഭവങ്ങളിൽ ഒന്നാണ് ശർക്കര വരട്ടി. ശർക്കര വരട്ടിയും ഉപ്പേരിയും ഇലതുമ്പിൽ വച്ചാൽ മാത്രമെ സദ്യയുടെ പൂർണത ലഭിക്കു. സദ്യ കഴിക്കുന്നതിന് മുമ്പായി തന്നെ അവ രണ്ടും അകത്താക്കുക എന്നതാണ് മലയാളികളുടെ ശീലം. എന്നാൽ പലപ്പോഴും വീട്ടിൽ തയ്യാറാക്കുമ്പോൾ ശർക്കര പാനി കട്ടിയായി ഒട്ടിപ്പിടിക്കുകയോ, കായ മൃദുവായി പോവുകയോ ചെയ്യാറുണ്ട്. കടകളിൽ നിന്ന് വാങ്ങുന്ന അതേ ക്രിസ്പി ടെക്സ്ചറിലും രുചിയിലും ശർക്കര വരട്ടി വീട്ടിൽ എങ്ങനെ ഉണ്ടാക്കാമെന്ന് നോക്കാം. (Image credit source: social media)

: ചേരുവകൾ: പച്ച നേന്ത്രക്കായ- 1 കിലോഗ്രാം (നല്ല മൂപ്പുള്ളത്), ശർക്കര- 500-600 ഗ്രാം, വെളിച്ചെണ്ണ- വറുക്കാൻ ആവശ്യത്തിന്, ചുക്കുപൊടി -1 ടേബിൾസ്പൂൺ, ഏലക്കാപ്പൊടി- 1 ടീസ്പൂൺ, ജീരകപ്പൊടി -1/2 ടീസ്പൂൺ, പൊടിച്ച പഞ്ചസാര- 2 ടേബിൾസ്പൂൺ, വറുത്ത അരിപ്പൊടി- 1.5 ടേബിൾസ്പൂൺ, മഞ്ഞൾപ്പൊടിയും ഉപ്പും- കായ കഴുകാൻ ആവശ്യത്തിന് എന്നിവയാണ് രുചിയൂറും ശർക്കരവരട്ടിക്ക് ആവശ്യമായ ചേരുവകൾ.

: തയ്യാറാക്കുന്ന വിധം: നേന്ത്രക്കായയുടെ തൊലി കളഞ്ഞ് ഉപ്പും മഞ്ഞൾപ്പൊടിയും കലക്കിയ വെള്ളത്തിൽ 10 മിനിറ്റ് ഇട്ടുവെക്കുക. ശേഷം വെള്ളം പൂർണ്ണമായും തുടച്ചെടുത്ത് അര ഇഞ്ച് കട്ടിയിൽ ചതുരക്കഷണങ്ങളാക്കുക. ശേഷം ചീനച്ചട്ടിയിൽ വെളിച്ചെണ്ണ ചൂടാക്കി, അരിഞ്ഞുവച്ചിരിക്കുന്ന കായ ഇടുക. തീ മീഡിയം ഫ്ലേമിൽ വെച്ച് കായ നന്നായി കിലുകിലെ മൊരിയുന്നത് വരെ വറുത്തെടുത്ത് മാറ്റിവെക്കുക. ശർക്കര അര കപ്പ് വെള്ളത്തിൽ ഉരുക്കി അരിച്ചെടുക്കുക.

: ഈ പാനി വീണ്ടും അടുപ്പത്തുവെച്ച് നല്ല കട്ടിയുള്ള വിരലിൽ തൊട്ടുനോക്കിയാൽ നൂലുപോലെ വരുന്നത് ആകുന്നത് വരെ തിളപ്പിക്കുക. ഇതിലേക്ക് ചുക്കുപൊടി, ഏലക്കാപ്പൊടി, ജീരകപ്പൊടി എന്നിവ ചേർത്ത് ഇളക്കുക. ശർക്കര പാനി പാകമായാൽ വറുത്ത കായ ഇതിലേക്ക് ചേർത്ത് വേഗത്തിൽ ഇളക്കുക. ശർക്കര കഷണങ്ങളിൽ പിടിച്ച് തുടങ്ങുമ്പോൾ തന്നെ തീ ഓഫാക്കുക. ഉടൻ തന്നെ വറുത്ത അരിപ്പൊടിയും പൊടിച്ച പഞ്ചസാരയും മുകളിലേക്ക് വിതറി തുടർച്ചയായി ഇളക്കിക്കൊണ്ടിരിക്കുക.

: ശർക്കര പാനി ചൂടോടെ ഇരിക്കുമ്പോൾ അരിപ്പൊടിയും പഞ്ചസാരയും വിതറുന്നത് അധികമുള്ള ഈർപ്പം വലിച്ച് ഓരോ കഷണവും വിട്ടുനിൽക്കാൻ സഹായിക്കും. അതുപോലെ തന്നെ ശർക്കര പാനി അയഞ്ഞുപോയാൽ ശർക്കര വരട്ടി കുഴഞ്ഞുപോകും. ഒരു നൂൽ പരുവം എത്തുന്നത് വരെ മാത്രം തിളപ്പിക്കുക. കായ വറുക്കുമ്പോൾ വലിയ തീയിൽ വറുക്കരുത്. ഉള്ളിൽ വെന്ത് നല്ല ക്രിസ്പിയായാൽ മാത്രമേ ദിവസങ്ങളോളം കേടുകൂടാതെ ഇരിക്കൂ.

Onam Special Apple Kichadi: ഓണ സദ്യയിലെ പുതിയ താരം! ‘ആപ്പിൾ കിച്ചടി’ മിനിറ്റുകൾക്കുള്ളിൽ ഉണ്ടാക്കാം; ഇതാ റെസിപ്പി

Neethu Vijayan — Wed, 19 Aug 2026 12:19:00 +0530

: ഓണസദ്യയിൽ ഒഴിച്ചുകൂടാനാവാത്ത ഒന്നാണ് കിച്ചടിയും പച്ചടിയും. സ്ഥിരം ബീറ്റ്‌റൂട്ട്, പൈനാപ്പിൾ, അല്ലെങ്കിൽ പാവയ്ക്ക കിച്ചടികൾ ഉണ്ടാക്കി മടുത്തവർക്ക് ഇത്തവണ വേറൊരു വെറൈറ്റി റെസിപ്പി ട്രൈ ചെയ്താലോ… അതേ ഇത്തവണത്തെ ഓണം സദ്യയുടെ ഭംഗിയും രുചിയും ഇരട്ടിയാക്കുന്ന ഇൻസ്റ്റന്റ് ആപ്പിൾ കിച്ചടി മിനിറ്റുകൾക്കുള്ളിൽ എങ്ങനെ തയ്യാറാക്കാമെന്ന് നമുക്ക് നോക്കാം. (Image Credit Source: Getty Images)

: ചേരുവകൾ: ആപ്പിൾ: 1 എണ്ണം ചെറിയ കഷണങ്ങളായി അരിഞ്ഞത്, തൈര്: 1 കപ്പ് നല്ല കട്ടത്തൈര്, പച്ചമുളക്: 2 എണ്ണം, തേങ്ങ ചിരകിയത്: 1/2 കപ്പ്, കടുക്: 1/2 ടീസ്പൂൺ അരയ്ക്കാൻ, 1/2 ടീസ്പൂൺ താളിക്കാൻ, ജീരകം: 1/4 ടീസ്പൂൺ, വറ്റൽ മുളക്: 2 എണ്ണം, കറിവേപ്പില: ആവശ്യത്തിന്, വെളിച്ചെണ്ണ: 1 ടേബിൾ സ്പൂൺ, ഉപ്പ്: ആവശ്യത്തിന് എന്നിവയാണ് ആപ്പിൾ കിച്ചടിക്ക് ആവശ്യമായ ചേരുവകൾ.

: തയ്യാറാക്കുന്ന വിധം: ആദ്യം തന്നെ അരപ്പ് തയ്യാറാക്കാം. ചിരകിയ തേങ്ങ, പച്ചമുളക്, ജീരകം, അര ടീസ്പൂൺ കടുക് എന്നിവ ആവശ്യത്തിന് വെള്ളം ചേർത്ത് നല്ല മൃദുവായി അരച്ചെടുക്കുക. ഒരു പാത്രത്തിൽ ചെറിയ കഷണങ്ങളാക്കി അരിഞ്ഞുവച്ച ആപ്പിളും കാൽ കപ്പ് വെള്ളവും അല്പം ഉപ്പും ചേർത്ത് അടച്ചുവെച്ച് 2-3 മിനിറ്റ് വേവിക്കുക. ആപ്പിൾ കൂടുതൽ വെന്ത് ഉടഞ്ഞുപോകാതെ ശ്രദ്ധിക്കണം. ചെറിയ രീതിക്ക് കടിക്കാൻ കിട്ടണം.

: വെന്ത ആപ്പിളിലേക്ക് തയ്യാറാക്കിവെച്ച തേങ്ങാ അരപ്പ് ചേർത്ത് ചെറുതീയിൽ നന്നായി ഇളക്കുക. അരപ്പിന്റെ പച്ചമണം മാറും വരെ 1-2 മിനിറ്റ് ചൂടാക്കുക. ഇതിലേക്ക് കട്ട ഉടച്ച തൈര് ചേർത്ത് ഇളക്കി തീ അണയ്ക്കുക. മറ്റൊരു ചെറിയ പാനിൽ വെളിച്ചെണ്ണ ചൂടാക്കി കടുക് പൊട്ടിക്കുക. വറ്റൽ മുളകും കറിവേപ്പിലയും ചേർത്ത് മൂപ്പിച്ച് കിച്ചടിയിലേക്ക് ഒഴിക്കുക. താളിപ്പ് കരിഞ്ഞുപോകാതെ ശ്രദ്ധിക്കണം.

: മധുരവും നേരിയ പുളിയുമുള്ള ആപ്പിൾ തിരഞ്ഞെടുക്കുന്നതാണ് കിച്ചടിക്ക് ഏറ്റവും അനുയോജ്യം. ആപ്പിൾ അരിഞ്ഞ ഉടൻ അല്പം ഉപ്പുവെള്ളത്തിൽ മുക്കിവെച്ചാൽ കറുത്തുപോകുന്നത് തടയാൻ സാധിക്കും. തൈര് ചേർത്ത ശേഷം കിച്ചടി വീണ്ടും തിളപ്പിക്കരുത്. കാരണം തൈര് പിരിഞ്ഞുപോകാൻ സാധ്യതയുണ്ട്. ബീറ്റ്‌റൂട്ടിന് പകരം ഈ ഓണത്തിന് ഒരു വെറൈറ്റിക്ക് ആപ്പിൾ കിച്ചടി തന്നെ തയ്യാറാക്കിക്കോളൂ.

Onam Special Palada: ഈ ഓണത്തിന് വൈറൽ കുക്കർ പായസം; എളുപ്പത്തിൽ പാലട പായസം തയ്യാറാക്കാം

Neethu Vijayan — Tue, 18 Aug 2026 11:23:00 +0530

: ഓണസദ്യയിലെ പ്രധാന ആകർഷണം സദ്യയുടെ അവസാനം ഇലയിലേക്ക് ചൂടോടെ വിളമ്പുന്ന നല്ല മധുരമൂറന്ന പായസമാണ്. പലതരം പായസം ഉണ്ടെങ്കിലും പാലട പായസത്തിൻ്റെ തട്ട് താണ് തന്നെയിരിക്കും. കാരണം ഇതിനോട് ഇഷ്ടമുള്ളവരാണ് ഏറെയും. അങ്ങനെയെങ്കിൽ ഈ ഓണത്തിന് വൈറലായ പിങ്ക് നിറത്തിലുള്ള പാലട പായസം തയ്യാറാക്കിയാലോ. മണിക്കൂറുകളോളം പാൽ തിളപ്പിച്ചു കുറുകി ഉണ്ടാക്കുന്ന പരമ്പരാഗത രീതിക്ക് പകരം, പ്രഷർ കുക്കർ ഉപയോഗിച്ച് മിനിറ്റുകൾക്കുള്ളിൽ അതേ രുചിയിലും നിറത്തിലും പാലട പായസം എങ്ങനെ തയ്യാറാക്കാമെന്ന് നോക്കാം. (IMAGE CREDIT SOURCE: SOCIAL MEDIA)

: ആവശ്യമായ ചേരുവകൾ: പാലട അട: ½ കപ്പ് നല്ലതുപോലെ കഴുകി ഊറ്റിവെച്ചത്, പാൽ: 1 ലിറ്റർ, പഞ്ചസാര: ¾ കപ്പ് മധുരത്തിനനുസരിച്ച് അളവ് കൂട്ടുകയോ കുറയ്ക്കുകയോ ചെയ്യാം, വെള്ളം: ½ കപ്പ്, നെയ്യ്: 1 ടേബിൾസ്പൂൺ, ഏലയ്ക്കാപ്പൊടി, കിസ്മിസ് – മുന്തിരി ആവശ്യമുണ്ടെങ്കിൽ മാത്രം എന്നിവയാണ് വളരെ എളുപ്പത്തിൽ തയ്യാറാക്കാവുന്ന കുക്കർ പായസത്തിൻ്റെ ആവശ്യമായ ചേരുവകൾ.

: തയ്യാറാക്കുന്ന വിധം: ആദ്യം തന്നെ അട കഴുകുക. ശേഷം ഒരു പാത്രത്തിൽ വെള്ളം നന്നായി തിളപ്പിക്കുക. അതിലേക്ക് കഴുകി വെച്ച അട ചേർക്കുക. ഒന്ന് തിളക്കുമ്പോൾ ഗ്യാസ് ഓഫ്‌ ചെയ്ത് പാത്രം അടച്ച് വയ്ക്കുക. 10-15 മിനിറ്റിന് ശേഷം അട പച്ചവെള്ളത്തിൽ 3- 4 പ്രാവശ്യം കഴുകി വെള്ളം തോരാനായി വയ്ക്കുക. പിന്നീട് ആദ്യം തന്നെ പഞ്ചസാര കുക്കറിലിട്ട് കാരമലൈസ് ചെയ്യുക. പഞ്ചസാര അലിഞ്ഞ് ബ്രൗൺ നിറത്തിൽ വരുമ്പോൾ പാലൊഴിച്ച് നന്നായി ഇളക്കുക. അപ്പോൾ തന്നെ പാലിൻ്റെ നിറം മാറുന്നത് നിങ്ങൾക്ക് കാണാനാകും.

: ശേഷം കുക്കർ അടയ്ക്കാം. കുക്കറിന്റെ അടപ്പ് അടച്ച്, വിസിൽ ഇട്ട് മീഡിയം തീയിൽ വെയ്ക്കുക. ഒരു വിസിൽ വന്ന ഉടൻ തന്നെ തീ ഏറ്റവും കുറച്ച് വെയ്ക്കുക. കുറഞ്ഞ തീയിൽ 20 മുതൽ 25 മിനിറ്റ് വരെ വേവിക്കുക. ഈ സമയത്ത് പാൽ പതുക്കെ വെന്ത് കുക്കറിനുള്ളിൽ വെച്ച് തന്നെ നല്ല മനോഹരമായ പിങ്ക് നിറമായി മാറും. 25 മിനിറ്റിനു ശേഷം അടുപ്പ് ഓഫ് ചെയ്ത്, കുക്കറിലെ പ്രഷർ പൂർണ്ണമായും പോകുന്നതുവരെ കാത്തിരിക്കുക.

: ശേഷം തുറന്ന് അതിലേക്ക് വേവിച്ച് വച്ച അട ചേർത്ത് വീണ്ടും ചെറുതീയിൽ ഇളക്കി കൊടുക്കുക. അട കുക്കറിൻ്റെ അടിയിൽ ഒട്ടിപിടിക്കാതെ ശ്രദ്ധിക്കണം. അതുപോലെ തന്നെ അതിലേക്ക് രണ്ട് ടീസ്പൂൺ നെയ്യ് ഒഴിച്ചുകൊടുക്കുക. വേണമെങ്കിൽ അല്പം ഏലയ്ക്കാ പൊടിയും ചേർക്കാം. ശേഷം നന്നായി ഇളക്കി കൊടുക്കുക. യഥാർത്ഥ പാലട പായസത്തിന് ഏലക്കയോ അണ്ടിപ്പരിപ്പോ ചേർക്കാറില്ല. നിങ്ങൾക്ക് വേണമെങ്കിൽ അവ കൂടി ചേർത്ത് വിളമ്പാവുന്നതാണ്.

Onam Special Rasam: നാവിൽ കപ്പലോടും ഓണം സദ്യ രസം! രഹസ്യ രസം പൊടി കൂട്ട് എളുപ്പത്തിൽ ഉണ്ടാക്കാം

Neethu Vijayan — Sat, 15 Aug 2026 17:28:00 +0530

: ഓണസദ്യയുടെ സമൃദ്ധി പൂർണ്ണമാകണമെങ്കിൽ ഒടുവിൽ വയറു തണുപ്പിക്കുന്ന ഒരു ഗ്ലാസ് ചൂടു രസം അത് നിർബന്ധമാണ്. കടയിൽ നിന്ന് വാങ്ങുന്ന രസം പൊടിയെക്കാൾ ഇരട്ടി രുചിയിൽ, കല്യാണ സദ്യകളിലൊക്കെ കിട്ടുന്ന അതേ മണത്തോടും രുചിയോടും കൂടി വീട്ടിൽ തന്നെ രസം പൊടിയും രസവും നമുക്ക് തയ്യാറാക്കിയാലോ? ഇത്തവണത്തെ ഓണത്തിന് സദ്യ കഴിക്കാൻ ഇരിക്കുന്നവരെ ഞെട്ടിച്ചുകൊണ്ട് ദാ ഇങ്ങനെ ഒരു ഐറ്റം തയ്യാറാക്കിക്കോ. (Image Credit Source: Getty Images)

: നാടൻ രസം പൊടി: മല്ലി – 1 കപ്പ്, തുവരപ്പരിപ്പ്– ½ കപ്പ്, കുരുമുളക് – ½ കപ്പ്, ജീരകം – ½ കപ്പ്, ഉണക്കമുളക്– 10-12 എണ്ണം, കായം – 1 ചെറിയ കഷ്ണം (അല്ലെങ്കിൽ ½ ടീസ്പൂൺ പൊടി), കറിവേപ്പില – 2 തണ്ട് എന്നിവയാണ് ചേരുവകൾ. ഒരു ചീനച്ചട്ടിയിൽ എണ്ണ ഒഴിക്കാതെ മല്ലിയും തുവരപ്പരിപ്പും കുറഞ്ഞ തീയിൽ ചെറുതായി മൂപ്പിച്ചെടുക്കുക. ഇതിലേക്ക് കുരുമുളക്, ജീരകം, ഉണക്കമുളക്, കായം, കറിവേപ്പില എന്നിവ ചേർത്ത് നല്ല മണം വരുന്നത് വരെ വറുക്കുക. കരിഞ്ഞുപോകരുതേ. ചൂടാറിയ ശേഷം മിക്സിയുടെ ജാറിലിട്ട് തരിതരിപ്പായി പൊടിച്ചെടുക്കാം.

: സ്പെഷ്യൽ രസം ചേരുവകൾ: തക്കാളി – 2 എണ്ണം (പൊടിയായി അരിഞ്ഞത്), വാളൻപുളി – ഒരു നെല്ലിക്ക വലുപ്പത്തിൽ വെള്ളത്തിൽ കുതിർത്തത്, തയ്യാറാക്കി വെച്ച രസം പൊടി – 1.5 മുതൽ 2 ടീസ്പൂൺ വരെ, വെളുത്തുള്ളി – 5-6 അല്ലി (ചതച്ചത്), മഞ്ഞൾപ്പൊടി – ½ ടീസ്പൂൺ, പച്ചമുളക് – 2 എണ്ണം നീളത്തിൽ കീറിയത്, കായപ്പൊടി – ഒരു നുള്ള്, ഉപ്പ് – ആവശ്യത്തിന്, മല്ലിയില, കറിവേപ്പില – ആവശ്യത്തിന്, കടുക്, വറ്റൽമുളക്, വെളിച്ചെണ്ണ – താളിക്കാൻ.

: ഒരു പാത്രത്തിൽ അരിഞ്ഞു വെച്ച തക്കാളി, പച്ചമുളക്, കുതിർത്ത പുളിവെള്ളം, മഞ്ഞൾപ്പൊടി, ഉപ്പ്, രണ്ട് കപ്പ് വെള്ളം എന്നിവ ചേർത്ത് തക്കാളി നന്നായി വെന്തുടയുന്നത് വരെ തിളപ്പിക്കുക. തക്കാളി വെന്ത ശേഷം ചതച്ച വെളുത്തുള്ളിയും വീട്ടിൽ തയ്യാറാക്കി വെച്ച രസം പൊടിയും ചേർക്കുക. രസം പൊടി ചേർത്ത ശേഷം വീണ്ടും തിളച്ച് മറിഞ്ഞു പോകരുത്. രസം നന്നായി തിളച്ചു പതഞ്ഞു വരുമ്പോൾ തന്നെ തീ കുറച്ച് മല്ലിയിലയും കറിവേപ്പിലയും ഒരു നുള്ള് കായപ്പൊടിയും വിതറി അടുപ്പിൽ നിന്നും വാങ്ങിവെക്കുക.

: മറ്റൊരു പാനിൽ വെളിച്ചെണ്ണ ചൂടാക്കി കടുകും വറ്റൽമുളകും കറിവേപ്പിലയും താളിച്ച് രസത്തിലേക്ക് ഒഴിക്കുക. അല്പം സമയം പാത്രം അടച്ചുവെച്ച ശേഷം വിളമ്പാം. ചൂടു ചോറിനൊപ്പം ഈ രസം കൂടി ഉണ്ടെങ്കിൽ ഓണ സദ്യ കേമമാകും. ഓണസദ്യ കഴിച്ച ശേഷം മധുരമുള്ള പായസത്തിന് ശേഷവും ഒരു ഗ്ലാസ് രസം കുടിക്കുന്നത് ദഹനത്തിനും വയറു വീർക്കുന്നതിനും എല്ലാം വളരെ നല്ലതാണ്.

Cheera Payasam: ചീര ഉണ്ടോ? തോരനല്ല, ഇന്ന് അടിപൊളി പായസം ഉണ്ടാക്കിക്കോ… റെസിപ്പി ഇതാ

Nithya Vinu — Fri, 14 Aug 2026 10:34:00 +0530

പായസം ഇഷ്ടമില്ലാത്തവരായി ആരുംതന്നെയുണ്ടാകില്ല. പാൽ പായസം, അട, പ്രഥമൻ... തുടങ്ങി ലിസ്റ്റ് അങ്ങ് നീളും. കൂടാതെ അല്പം വെറൈറ്റി പായസങ്ങളും രുചിച്ച് നോക്കാൻ മലയാളികൾ മടിക്കാറില്ല. ഇന്ന് അതുപോലെ ഒരു വെറൈറ്റി പായസം കുടിച്ചാലോ? ചോറിനൊപ്പം തോരൻ തയ്യാറാക്കാനായി മാറ്റിവെച്ച ചീര ഉണ്ടോ, എങ്കിൽ ഇന്ന് തോരന് പകരം അല്പം ചീര പായസം കുടിക്കാം. പച്ചച്ചീരയും പാലും അണ്ടിപ്പരിപ്പും ചേർത്ത് മിനിറ്റുകൾക്കുള്ളിൽ തയാറാക്കാവുന്ന ഈ വിഭവം കുട്ടികൾക്കും മുതിർന്നവർക്കും ഒരുപോലെ ഇഷ്ടപ്പെടും. റെസിപ്പി ഇതാ...

ചീര പായസം

ആവശ്യമായ ചേരുവകൾ

പച്ചച്ചീര: ആവശ്യത്തിന് (നന്നായി കഴുകി വൃത്തിയാക്കിയത്)
പാൽ: 1/2 കപ്പ്
പഞ്ചസാര: 3 വലിയ സ്പൂൺ
നെയ്യ്: 3 ടേബിൾസ്പൂൺ
അണ്ടിപ്പരിപ്പ് : ആവശ്യത്തിന്
മുന്തിരി: ആവശ്യത്തിന്
ഏലക്ക: 3 എണ്ണം
അരി / പായസ അരി: 3 സ്പൂൺ

തയാറാക്കുന്ന വിധം

കുതിർത്ത അരിയും കഴുകി വൃത്തിയാക്കിയ ചീരയും ഏലക്കയും അല്പം വെള്ളം ചേർത്ത് മിക്സിയിൽ നന്നായി അരച്ചെടുക്കുക.
ഒരു പാത്രത്തിൽ പാലും ആവശ്യത്തിന് വെള്ളവും ഒഴിച്ച് നന്നായി തിളപ്പിക്കുക.
പാൽ നന്നായി തിളച്ചുവരുമ്പോൾ അരച്ചുവെച്ചിരിക്കുന്ന ചീര-അരി കൂട്ട് ഇതിലേക്ക് ഒഴിച്ച് ഇളക്കുക.
മിശ്രിതം കുറുകി വരുമ്പോൾ ആവശ്യത്തിന് പഞ്ചസാര ചേർത്ത് നന്നായി യോജിപ്പിക്കുക.
മറ്റൊരു ചെറിയ പാനിൽ നെയ്യ് ചൂടാക്കി അണ്ടിപ്പരിപ്പും മുന്തിരിയും വറുത്തെടുക്കുക.
വറുത്തെടുത്ത അണ്ടിപ്പരിപ്പും മുന്തിരിയും നെയ്യോടെ പായസത്തിലേക്ക് ഒഴിച്ച് നന്നായി ഇളക്കി തീ അണയ്ക്കാം.
രുചികരമായ പച്ചച്ചീര പായസം തയാർ! ചൂടോടെയോ തണുപ്പിച്ചോ ഇത് വിളമ്പാം.

ALSO READ: ഓണസദ്യ കേമമാക്കാൻ സ്‌പെഷ്യൽ ‘കാരറ്റ് സേമിയ പായസം! മിനിറ്റുകൾക്കുള്ളിൽ തയ്യാർ

ചീര- ആരോഗ്യഗുണങ്ങൾ

പോഷകങ്ങളുടെ കാര്യത്തിൽ മുൻപന്തിയിൽ നിൽക്കുന്ന ഒരു ഇലക്കറിയാണ് ചീര. വിറ്റാമിനുകൾ, ധാതുക്കൾ, ആന്റിഓക്‌സിഡന്റുകൾ എന്നിവയാൽ സമ്പന്നമായ ചീര ദിവസേനയുള്ള ഭക്ഷണക്രമത്തിൽ ഉൾപ്പെടുത്തുന്നത് ആരോഗ്യം മെച്ചപ്പെടുത്താൻ ഏറെ സഹായിക്കും. ചീരയിൽ ഉയർന്ന അളവിൽ ഇരുമ്പ് അടങ്ങിയിട്ടുണ്ട്. ഇത് രക്തത്തിലെ ഹീമോഗ്ലോബിന്റെ അളവ് വർദ്ധിപ്പിക്കാനും രക്തക്കുറവ് മൂലം ഉണ്ടാകുന്ന ക്ഷീണം തടയാനും സഹായിക്കുന്നു.

ചീരയിൽ അടങ്ങിയിരിക്കുന്ന വിറ്റാമിൻ എ, ല്യൂട്ടിൻ, സെയാക്സാന്തിൻ എന്നിവ കണ്ണിന്റെ ആരോഗ്യത്തിന് അത്യന്താപേക്ഷിതമാണ്. പ്രായമാകുമ്പോൾ ഉണ്ടാകുന്ന തിമിരം, കാഴ്ചമങ്ങൽ തുടങ്ങിയ പ്രശ്നങ്ങൾ തടയാൻ ഇത് സഹായിക്കും. എല്ലുകളുടെയും പല്ലുകളുടെയും ബലത്തിന് ആവശ്യമായ കാൽസ്യം, വിറ്റാമിൻ കെ എന്നിവ ചീരയിൽ ധാരാളമുണ്ട്. ഓസ്റ്റിയോപൊറോസിസ് പോലുള്ള അസ്ഥി രോഗങ്ങളെ പ്രതിരോധിക്കാൻ ചീred ഡയറ്റിൽ ഉൾപ്പെടുത്തുന്നത് നല്ലതാണ്.

വിറ്റാമിൻ സി യഥേഷ്ടം അടങ്ങിയിട്ടുള്ളതിനാൽ ശരീരത്തിന്റെ രോഗപ്രതിരോധ ശേഷി വർദ്ധിപ്പിക്കാനും അണുബാധകളിൽ നിന്ന് സംരക്ഷണം നൽകാനും ചീര സഹായിക്കുന്നു. ചീരയിൽ കലോറി വളരെ കുറവും നാരുകൾ കൂടുതലുമാണ്. ഇത് ദഹനം മെച്ചപ്പെടുത്തുകയും മലബന്ധം തടയുകയും ചെയ്യുന്നു. അതുപോലെ, കുറഞ്ഞ കലോറിയുള്ളതിനാൽ ശരീരഭാരം കുറയ്ക്കാൻ ആഗ്രഹിക്കുന്നവർക്ക് മികച്ച ഭക്ഷണമാണിത്.

English Summary:

Cheera/ Spinach Paayasam Simple Recipe. Spinach is a highly nutritious leafy vegetable that is rich in vitamins, minerals, and antioxidants. Including spinach in the daily diet can help improve overall health and well-being. It is also particularly known for its high iron content, making it a valuable addition to a balanced diet.

Independence Day Recipe: അല്പം തേങ്ങയുണ്ടോ? ഈ സ്വാതന്ത്ര്യദിനം മധുരമുള്ളതാക്കാം! മിനിറ്റുകൾക്കുള്ളിൽ സ്പെഷ്യൽ ബർഫി

Neethu Vijayan — Thu, 13 Aug 2026 17:14:00 +0530

ഇന്ത്യ 80-ാമത് സ്വാതന്ത്ര്യദിനം (Independence Day 2026) ആഘോഷിക്കാൻ ഒരുങ്ങുകയാണ്. നാടെങ്ങും സ്വാതന്ത്ര്യദിനം ആഘോഷങ്ങൾക്കായി തയ്യാറെടുത്ത് കഴിഞ്ഞിരിക്കുന്നു. ഏത് സ്പെഷ്യൽ ദിവസമായാലും നമ്മുക്ക് അത് പൂർണമാകണമെങ്കിൽ ഭക്ഷണത്തിലും അതിൻ്റെ നിറവും രുചിയും ഉണ്ടായിരിക്കണം. രാജ്യത്തിന് സ്വാതന്ത്ര്യം ലഭിച്ച ഈ ദിവസം നമുക്ക് ഇഷ്ടമുള്ള ആഹാരം പാകം ചെയ്ത് കഴിക്കുന്നതും ആഘോഷത്തിൻ്റെ ഭാഗം തന്നെയാണ്. ഒരു കാലത്ത് നമുക്ക് സാധിക്കാത്തത് എന്തും ആരുടെയും അനുവാദമില്ലാതെ ചെയ്യുക എന്നത് തന്നെയാണ് സ്വാതന്ത്ര്യം എന്നതുകൊണ്ട് ഉദ്ദേശിക്കുന്നത്.

ALSO READ: ഓണത്തിന് പ്രമേഹമുള്ളവർക്കും പായസം ഏറെ കുടിക്കാം!; ശ്രദ്ധിക്കേണ്ട കാര്യങ്ങൾ

അങ്ങനെയെങ്കിൽ ഇക്കൊല്ലത്തെ സ്വാതന്ത്ര്യദിനാഘോഷങ്ങൾക്ക് മാറ്റുകൂട്ടാൻ നമുക്ക് വീടുകളിൽ കുട്ടികൾക്കും മുതിർന്നവർക്കും ഒരുപോലെ ഇഷ്ടപ്പെടുന്ന മധുരപലഹാരങ്ങൾ തയാറാക്കിയാലോ. പൊതുവെ ഉത്തരേന്ത്യൻ സംസ്ഥാനങ്ങളിലാണ് ഇത്തരത്തിലുള്ള മധുരപരഹാരങ്ങൾ തയ്യആറാക്കുന്നത്. എന്നാൽ നമ്മൾ വിചാരിച്ചാൽ വളരെ ഈസിയായി അതേ രുചിയിൽ തന്നെ അവ വീട്ടിലുണ്ടാക്കാൻ സാധിക്കുന്നതാണ്. അടുക്കളയിലുള്ള വളരെ കുറഞ്ഞ ചേരുവകൾ മാത്രം ഉപയോഗിച്ച് 10 മിനിറ്റിനുള്ളിൽ തയാറാക്കാവുന്ന ഒന്നാണ് തേങ്ങാ ബർഫി. സ്വാതന്ത്ര്യ ദിനമായതിനാൽ തന്നെ ത്രിവർണ്ണ നിറത്തിലാകാം ഇന്നത്തെ ബർഫി. ഇതാ തയ്യാറാക്കുന്ന വിധം.

ബർഫി തയ്യാറാക്കാൻ ആവശ്യമായ ചേരുവകൾ

കുങ്കുമപ്പൂ (ആവശ്യത്തിന്) ത്രിവർണപതാകയിലെ ഓറഞ്ച് നിറം ലഭിക്കാനാണ് ഇത് ചേർക്കുന്നത്. കുങ്കുമപ്പൂ ഇല്ലെങ്കിൽ ഫുഡ് കളറും ഉപയോഗിക്കാം.

ചിരകിയ തേങ്ങ: 1 കപ്പ് (വെളുത്ത ഭാഗം മാത്രം)

കണ്ടൻസ്ഡ് മിൽക്ക്: ½ കപ്പ്

ഓറഞ്ച് ഫുഡ് കളർ: ഒരു തുള്ളി

ഏലയ്ക്കാപ്പൊടി: ½ ടീസ്പൂൺ

ത്രിവർണപതാകയിലെ വെളുത്ത ഭാഗത്തിന്:

ചിരകിയ തേങ്ങ: 1 കപ്പ്

കണ്ടൻസ്ഡ് മിൽക്ക്: ½ കപ്പ്

ഏലയ്ക്കാപ്പൊടി: ½ ടീസ്പൂൺ

ത്രിവർണപതാകയിലെ പച്ച ഭാഗത്തിന്:

ചിരകിയ തേങ്ങ: 1 കപ്പ്

കണ്ടൻസ്ഡ് മിൽക്ക്: ½ കപ്പ്

പച്ച ഫുഡ് കളർ: കുറച്ച് തുള്ളി

ഏലയ്ക്കാപ്പൊടി: ½ ടീസ്പൂൺ

പിസ്ത: പൊടിയായി അരിഞ്ഞത്

ബദാം: നേർത്ത കഷ്ണങ്ങളാക്കിയത്

ബർഫി തയാറാക്കുന്ന വിധം

ഓരോ നിറത്തിനുമുള്ള ചിരകിയ തേങ്ങ, കണ്ടൻസ്ഡ് മിൽക്ക്, ഏലയ്ക്കാപ്പൊടി, അതത് ഫുഡ് കളറുകൾ എന്നിവ വേവ്വേറെ പാത്രങ്ങളിൽ എടുക്കുക. ഒരു പാൻ അടുപ്പത്തുവെച്ച് ഓരോ കൂട്ടും വേവ്വേറെ ചെറുതീയിൽ 3-4 മിനിറ്റ് നന്നായി ഇളക്കി പാത്രത്തിൽ നിന്ന് വിട്ടു വരുന്ന പരുവത്തിലാക്കി മാറ്റിവെക്കുക. ശേഷം നെയ്യ് പുരട്ടിയ ഒരു ട്രേയിലോ തട്ടത്തിലോ ആദ്യം പച്ച നിറത്തിലുള്ള കൂട്ട് സമചതുരത്തിൽ പരത്തി നന്നായി അമർത്തുക വയ്ക്കുക. അതിനു മുകളിലായി വെളുത്ത നിറത്തിലുള്ള കൂട്ട് രണ്ടാമത്തെ പാളിയായി വക്കാം. ഏറ്റവും മുകളിലായി ഓറഞ്ച് നിറത്തിലുള്ള കൂട്ട് മൂന്നാമത്തെ പാളിയായി വെച്ച് അവസാനിപ്പിക്കാം. ആവശ്യമെങ്കിൽ ഏറ്റവും മുകളിലായി പൊടിയായി അരിഞ്ഞ പിസ്തയും ബദാം കഷ്ണങ്ങളും വിതറുക. ചൂടാറിയ ശേഷം അല്ലെങ്കിൽ അരമണിക്കൂർ ഫ്രിഡ്ജിൽ വെച്ച് തണുപ്പിച്ച ശേഷം നിങ്ങൾക്ക് ഇഷ്ടമുള്ള ആകൃതിയിൽ മുറിച്ചെടുത്ത് കഴിക്കാം.

English Summary:

Independence Day 2026, Here’s a simple recipe using coconut, condensed milk and a few basic ingredients. Know how to make Easy Homemade Special Tricolour Coconut Barfi Recipe in malayalam.