CBSE CTET 2026: സിടെറ്റ് പരീക്ഷയ്ക്ക് പോകുമ്പോള്‍ എന്തൊക്കെ ശ്രദ്ധിക്കണം? ഇക്കാര്യങ്ങള്‍ മറക്കരുത്‌

Representational Image

സെൻട്രൽ ടീച്ചർ എലിജിബിലിറ്റി ടെസ്റ്റ് (സിടെറ്റ്) നാളെ ആരംഭിക്കും. ഫെബ്രുവരി 7, ഫെബ്രുവരി 8 തീയതികളിൽ രാജ്യത്തുടനീളമുള്ള 140 നഗരങ്ങളിലായാണ് പരീക്ഷ നടക്കുന്നത്. സെൻട്രൽ ബോർഡ് ഓഫ് സെക്കൻഡറി എജ്യുക്കേഷൻ (സിബിഎസ്ഇ) അഡ്മിറ്റ് കാര്‍ഡ് കഴിഞ്ഞ ദിവസം പുറത്തുവിട്ടിരുന്നു. ഉദ്യോഗാർത്ഥികൾക്ക് ctet.nic.in എന്ന ഔദ്യോഗിക വെബ്‌സൈറ്റിലൂടെ അഡ്മിറ്റ് കാർഡ് ഡൗൺലോഡ് ചെയ്യാൻ കഴിയും.

ഔദ്യോഗിക വെബ്‌സൈറ്റിലെ ഹോം പേജിലുള്ള അഡ്മിറ്റ് കാർഡിനായുള്ള ലിങ്കിൽ ക്ലിക്ക് ചെയ്യണം. അതിനുശേഷം, അപേക്ഷകർ അപേക്ഷാ നമ്പർ, ജനനത്തീയതി എന്നിവയുൾപ്പെടെ അവരുടെ ലോഗിൻ ക്രെഡൻഷ്യലുകൾ നൽകണം.

ഉദ്യോഗാർത്ഥികൾ ആദ്യ ഷിഫ്റ്റിന്‌ രാവിലെ 7.30 നും രണ്ടാം ഷിഫ്റ്റിന്‌ ഉച്ചയ്ക്ക് 12.30 നും പരീക്ഷാ കേന്ദ്രത്തിൽ റിപ്പോർട്ട് ചെയ്യണം. നിശ്ചിത സമയത്തിന് ശേഷം എത്തുന്ന ഉദ്യോഗാര്‍ത്ഥികളെ പരീക്ഷ എഴുതാന്‍ അനുവദിക്കില്ല. സിബിഎസ്ഇ സിടിഇടി പരീക്ഷാ സിറ്റി സ്ലിപ്പ് ജനുവരി 24 ന് പുറത്തിറക്കിയിരുന്നു.

Also Read: Kerala SSLC Exam: കണക്ക് കടുപ്പമാണോ? എ പ്ലസ് ഉറപ്പാക്കാൻ പഠിച്ചു തുടങ്ങേണ്ട പ്രധാന ഭാഗങ്ങൾ ഇതാ

അഡ്മിറ്റ് കാർഡിലെ നിര്‍ദ്ദേശങ്ങള്‍ മുഴുവന്‍ വായിക്കുകയും പാലിക്കുകയും വേണം. യാത്ര ആസൂത്രണം ചെയ്യുന്നതിനും അവസാന നിമിഷത്തെ ആശയക്കുഴപ്പം ഒഴിവാക്കുന്നതിനും അഡ്മിറ്റ് കാർഡിൽ പരാമർശിച്ചിരിക്കുന്ന പരീക്ഷാ കേന്ദ്രത്തെക്കുറിച്ചുള്ള വിശദാംശങ്ങള്‍ വായിച്ചിരിക്കണം. ഹാൾ ടിക്കറ്റ് ഇല്ലാതെ പരീക്ഷാ കേന്ദ്രത്തിൽ പ്രവേശനം അനുവദിക്കില്ല.

പരീക്ഷാ തീയതി, ഷിഫ്റ്റ്, സമയം എന്നിവ ശ്രദ്ധാപൂർവ്വം പരിശോധിച്ച്‌ പരീക്ഷാ കേന്ദ്രത്തില്‍ നേരത്തെ എത്തുന്നതാണ് ഉചിതം. രാവിലെ 9:30 മുതൽ ഉച്ചയ്ക്ക് 12:00 വരെയാണ് ആദ്യ ഷിഫ്റ്റ്. ഉച്ചയ്ക്ക് 2:30 മുതൽ വൈകുന്നേരം 5:00 വരെയാണ് രണ്ടാമത്തെ ഷിഫ്റ്റ്. ഓരോ പേപ്പറിലും ഒരു മാർക്കിന് 150 മൾട്ടിപ്പിൾ ചോയ്‌സ് ചോദ്യങ്ങൾ ഉണ്ടായിരിക്കും. നവംബര്‍ 27 നായിരുന്നു രജിസ്‌ട്രേഷന്‍ ആരംഭിച്ചത്. ഡിസംബര്‍ 18 ന് അവസാനിച്ചു.