Drishyam 2 : ജോർജ്ജുകുട്ടിയെ ക്ലാസിക് ക്രിമിനലാക്കിയ രണ്ടാം ഭാഗം; ദൃശ്യം 2 ആദ്യമായി ബിഗ് സ്ക്രീനിലേക്കെത്തുന്നു

Mohanlal Drishyam 2

ദൃശ്യം 3യുടെ റിലീസ് നീട്ടിവെച്ചതിൽ ആശങ്കപ്പെട്ടിരിക്കുന്ന ആരാധകർക്ക് സന്തോഷ വാർത്ത. ദൃശ്യം സിനിമയുടെ രണ്ടാം പതിപ്പായ ദൃശ്യം 2 തിയറ്ററിലേക്കെത്തുന്നു. ഇതാദ്യമായിട്ടാണ് ദൃശ്യം 2 തിയറ്ററിൽ പ്രദർശനത്തിനെത്തുന്നത്. ചിത്രം ഏപ്രിൽ പത്താം തീയതി തിയറ്ററിൽ റിലീസ് ചെയ്യുമെന്ന് അറിയിച്ചിരിക്കുകയാണ് മോഹൻലാൽ. കോവിഡ് സമയത്ത് ഒരുക്കിയ ദൃശ്യം 2 നേരിട്ട് ഒടിടിയിൽ റിലീസാകുകയായിരുന്നു. ആമസോൺ പ്രൈം വീഡിയോയിലൂടെയായിരുന്നു ദൃശ്യം 2 അന്ന് ഒടിടിയിൽ എത്തിയത്.

ദൃശ്യം 3 റിലീസ് നീട്ടി

ഈ അവധിക്ക് തിയറ്ററിൽ എത്താൻ തയ്യാറെടുത്തിരുന്ന ദൃശ്യം 3ൻ്റെ റിലീസ് നീട്ടിയതോടെയാണ് അണിയറപ്രവർത്തകർ ചിത്രത്തിൻ്റെ രണ്ടാം ഭാഗത്തിൻ്റെ റിലീസുമായി രംഗത്തെത്തിയിരിക്കുന്നത്. ഈ വരുന്ന ഏപ്രിൽ രണ്ടിന് തിയറ്ററിൽ എത്തിക്കാനായിരുന്നു അണിയറപ്രവർത്തകർ തീരുമാനിച്ചിരുന്നത്. എന്നാൽ ഗൾഫ് രാജ്യങ്ങളിലെ പ്രതിസന്ധിയുടെ പശ്ചാത്തലത്തിൽ സിനിമയുടെ റിലീസ് നീട്ടിവെക്കുകയായിരുന്നു. മെയ് 21 മോഹൻലാലിൻ്റെ പിറന്നാളിനോട് അനുബന്ധിച്ച് ദൃശ്യം 3 തിയറ്ററിൽ എത്തുമെന്നാണ് അണിയറപ്രവർത്തകർ അറിയിച്ചിരിക്കുന്നത്.

ALSO READ : Mohanlal: എഐ വ്യാജ വീഡിയോ, എല്ലാ ലിങ്കുകളും ക്രോഡീകരിച്ച് അപേക്ഷ നൽകണം; മോഹൻലാലിനോട് ഡൽഹി ഹൈക്കോടതി

ദൃശ്യം 3 സിനിമ

2103ൽ ജീത്തു ജോസഫ്-മോഹൻലാൽ കൂട്ടുകെട്ടിൽ ആദ്യമായി പിറന്ന് ചരിത്രം കുറിച്ച ചിത്രമാണ് ദൃശ്യം. മോഹൻലാൽ ജോർജ്ജുകുട്ടിയായി എത്തി മലയാളക്കര ആകെ ഞെട്ടിച്ചുകൊണ്ട് ദൃശ്യം ബോക്സ്ഓഫീസിൽ ചരിത്രം കുറിച്ചിരുന്നു. ഏറ്റവും കൂടുതൽ ഭാഷകളിലേക്ക് റീമേക്ക് ചെയപ്പെട്ട മലയാളം ചിത്രമെന്ന പ്രത്യേകതയും ദൃശ്യത്തിനുണ്ട്. തുടർന്നാണ് സിനിമയുടെ രണ്ടാം ഭാഗം ദൃശ്യം 2 എന്ന പേരിൽ കോവിഡ് സമയത്തെത്തിയത്. ഒടിടി റിലീസായി നേരിട്ടെത്തിയ ചിത്രം പാൻ ഇന്ത്യ തലത്തിൽ ചർച്ചയായി. അതിന് ശേഷമാണ്ല മൂന്നാം ഭാഗവും പിറവിയെടുക്കുന്നത്.

ആശീർവാദ് സിനിമാസിൻ്റെ ബാനറിൽ ഒരുക്കുന്ന ചിത്രത്തിൻ്റെ റീമേക്ക് അവകാശങ്ങൾ എല്ലാം ബോളിവുഡ് നിർമാതാക്കളായ പനോരമ സ്റ്റുഡിയോസ് സ്വന്തമാക്കിയിരുന്നു. 150 കോടിയോളം ചിലവഴിച്ചാണ് പനോരമ സ്റ്റുഡിയോസ് ദൃശ്യം 3 സിനിമയുടെ റീമേക്ക്, അതിൻ്റെ ഡിജിറ്റൽ അവകാശം ബോളിവുഡ് നിർമാതാക്കൾ സ്വന്തമാക്കിയെന്നായിരുന്നു റിപ്പോർട്ടുകൾ. മോഹൻലാൽ അവതരിപ്പിക്കുന്ന ജോർജ്ജുകുട്ടിയുടെ ഭാര്യ റാണിയായി മീനയും മക്കളായി എസ്തേർ അനിലും അൻസിബ ഹസ്സനുമാണ് ചിത്രത്തിലെ പ്രധാനവേഷങ്ങളിലെത്തുന്നത്. ഇവർക്ക് പുറമെ ആശ ശരത്ത്, സിദ്ധിഖ്, മുരളി ഗോപി മറ്റ് നിരവധി പേർ സിനിമയുടെ ഭാഗമാകും.

സതീഷ് കുറുപ്പാണ് സിനിമയുടെ ക്യാമറ കൈകാര്യം ചെയ്തിരിക്കുന്നത്. വിനായകാണ് എഡിറ്റർ, അനിൽ ജോൺസൺ ആണ് ദൃശ്യം സിനിമയ്ക്ക് സംഗീതം നൽകിട്ടുള്ളത്. ഈ ഡിസംബറിലായിരുന്നു സിനിമയുടെ ചിത്രീകരണം പൂർത്തിയായത്. ഒരു മാസം കൊണ്ട് പോസ്റ്റ് പ്രൊഡക്ഷൻ ജോലികൾ പൂർത്തിയാക്കാനായിരുന്ന അണിയറപ്രവർത്തകർ തീരുമാനിച്ചിരുന്നത്.