ആരോഗ്യരംഗത്തെ എഐ വിപ്ലവവും രോഗി സുരക്ഷയും: ഡോ. സംഗീത റെഡ്ഡി സംസാരിക്കുന്നു

Dr Sangita Reddy

ആധുനിക ആരോഗ്യപരിചരണ രംഗത്ത് എഐ വരുത്തുന്ന മാറ്റങ്ങളെക്കുറിച്ചും രോഗി സുരക്ഷയെക്കുറിച്ചും വിശദമാക്കി അപ്പോളോ ഹോസ്പിറ്റൽസ് ജോയിന്റ് മാനേജിംഗ് ഡയറക്ടർ ഡോ. സംഗീത റെഡ്ഡി. 13-ാമത് ‘അപ്പോളോ ഇന്റർനാഷണൽ ഹെൽത്ത് ഡയലോഗിൽ’ ‘ന്യൂസ് 9 ലൈവി’ന് നല്‍കിയ അഭിമുഖത്തിലാണ്‌ അവർ ഈ കാര്യങ്ങൾ വിശദീകരിച്ചത്.

ഇന്ന് എഐയുടെ സഹായത്തോടെ ആരോഗ്യ പ്രശ്നങ്ങൾ മുൻകൂട്ടി കാണാനും അവ ഒഴിവാക്കാനും സാധിക്കുന്നുണ്ടെന്ന് അവര്‍ വ്യക്തമാക്കി. ഒരു രോഗിയുടെ ലാബ് റിപ്പോർട്ടില്‍ അപകടകരമായ സൂചനകള്‍ കണ്ടാൽ ഉടൻ തന്നെ അത് ഡോക്ടറുടെ ഫോണിലേക്ക് സന്ദേശമായി എത്തും.

ചികിത്സയിലെ കാലതാമസം ഒഴിവാക്കാനും ഗുരുതര സാഹചര്യങ്ങളിൽ നിന്ന് രോഗിയെ രക്ഷിക്കാനും ഇതുവഴി സാധിക്കും. സിടി സ്കാനുകളിൽ മസ്തിഷ്ക രക്തസ്രാവം പോലുള്ള ചില പ്രശ്‌നങ്ങള്‍ വേഗത്തിൽ തിരിച്ചറിയാൻ എഐക്ക് സാധിക്കുമെന്നും ഇത് വിലപ്പെട്ട സമയം ലാഭിക്കാൻ സഹായിക്കുമെന്നും ഡോ. സംഗീത റെഡ്ഡി വ്യക്തമാക്കി.

ആരോഗ്യരംഗത്തെ സാങ്കേതിക വിദ്യകളുടെ പ്രയോഗത്തിൽ ആഗോളനേതൃത്വത്തിലേക്ക് വരാൻ ഇന്ത്യയ്ക്ക് സാധിക്കുമെന്ന് അവര്‍ പ്രതീക്ഷ പ്രകടിപ്പിച്ചു. കുറഞ്ഞ ചെലവിൽ മികച്ച ചികിത്സ നൽകുന്നതിലൂടെ ‘ഹീൽ ഇൻ ഇന്ത്യ’ എന്ന ലക്ഷ്യം കൈവരിക്കാം. രാജ്യത്തെ യുവജനതയെ ആരോഗ്യരംഗത്ത് പരിശീലിപ്പിക്കുക വഴി ആഗോളരംഗത്ത്‌ സേവനം നൽകുന്ന ‘ഹീൽ ബൈ ഇന്ത്യ’ എന്ന ആശയവും ഡോ. സംഗീത റെഡ്ഡി മുന്നോട്ടുവെച്ചു.

ആശുപത്രികൾ എന്നത് ചികിത്സാ കേന്ദ്രങ്ങള്‍ എന്നതിലുപരി ആരോഗ്യവും സന്തോഷവും നിലനിർത്തുന്ന ഇടങ്ങളാകണം. ദീർഘവീക്ഷണമുള്ള നേതൃത്വവും സഹാനുഭൂതിയോടെയുള്ള സമീപനവും ഉണ്ടെങ്കിൽ സാങ്കേതികവിദ്യയുടെ സഹായത്തോടെ ആരോഗ്യരംഗത്ത് വിപ്ലവകരമായ മാറ്റങ്ങൾ കൊണ്ടുവരാനാകുമെന്നും ഡോക്ടര്‍ വ്യക്തമാക്കി.

അഭിമുഖത്തിന്റെ പൂര്‍ണരൂപം കാണാം