Bullet Train Ticket rate : ബുള്ളറ്റ് ട്രെയിനോ വിമാനയാത്രയോ? ടിക്കറ്റ് നിരക്കു നോക്കിയാൽ മെച്ചമേതെന്ന് വ്യക്തമാക്കി മന്ത്രി

Bullet Train

ന്യൂഡൽഹി: രാജ്യം ആകാംക്ഷയോടെ കാത്തിരിക്കുന്ന മുംബൈ-അഹമ്മദാബാദ് ബുള്ളറ്റ് ട്രെയിനിന്റെ ടിക്കറ്റ് നിരക്കുകൾ സംബന്ധിച്ച സൂചനകൾ പുറത്തുവിട്ട് റെയിൽവേ മന്ത്രി അശ്വിനി വൈഷ്ണവ്. നിലവിലുള്ള വിമാനയാത്രാ നിരക്കുകളോടും റെയിൽവേ നിരക്കുകളോടും മത്സരിക്കാവുന്ന വിധത്തിലായിരിക്കും ബുള്ളറ്റ് ട്രെയിനിലെ ടിക്കറ്റ് നിരക്കെന്ന് മന്ത്രി ലോക്സഭയിൽ അറിയിച്ചു. പി.സി. മോഹൻ, മാല റോയ്, കലാനിധി വീരസ്വാമി എന്നീ എം.പി.മാരുടെ ചോദ്യങ്ങൾക്ക് രേഖാമൂലം നൽകിയ മറുപടിയിലാണ് അദ്ദേഹം ഇക്കാര്യം വ്യക്തമാക്കിയത്.

മണിക്കൂറിൽ 320 കിലോമീറ്റർ വേഗതയിൽ സഞ്ചരിക്കാൻ കഴിയുന്ന വിധത്തിലാണ് 508 കിലോമീറ്റർ ദൈർഘ്യമുള്ള ഈ പാത രൂപകൽപ്പന ചെയ്തിരിക്കുന്നത്. ജപ്പാനിൽ നിന്നുള്ള സാങ്കേതിക-സാമ്പത്തിക സഹായത്തോടെയാണ് പദ്ധതി നടപ്പിലാക്കുന്നത്. ജാപ്പനീസ് റെയിൽവേയുടെ മാതൃകയിലാണെങ്കിലും ഇന്ത്യൻ കാലാവസ്ഥയ്ക്കും ആവശ്യങ്ങൾക്കും അനുസൃതമായ മാറ്റങ്ങൾ പദ്ധതിയിൽ വരുത്തിയിട്ടുണ്ടെന്ന് മന്ത്രി പറഞ്ഞു.

Also Read: Bengaluru Train: ബെംഗളൂരു ട്രെയിനുകള്‍ക്ക് നയന്ദഹള്ളിയില്‍ സ്റ്റോപ്പ്; യാത്രക്കാര്‍ സന്തോഷിച്ചാട്ടെ

മുംബൈ, താനെ, വിരാർ, ബോയിസാർ, വാപ്പി, ബില്ലിമോറ, സൂറത്ത്, ഭരൂച്, വഡോദര, ആനന്ദ്, അഹമ്മദാബാദ്, സബർമതി എന്നിങ്ങനെ 12 സ്റ്റേഷനുകൾ ഉണ്ടായിരിക്കും. പദ്ധതിക്കാവശ്യമായ 1389.5 ഹെക്ടർ ഭൂമിയും പൂർണ്ണമായും ഏറ്റെടുത്തു കഴിഞ്ഞു.

കുറഞ്ഞ ഇടവേളകളിൽ കൂടുതൽ സർവീസുകൾ നടത്താൻ കഴിയുന്ന വിധത്തിലാണ് ഇതിന്റെ ഡിസൈൻ. യാത്രാ സമയം ലാഭിക്കുന്നതിനൊപ്പം പ്രാദേശിക വികസനത്തിനും ബിസിനസ് വളർച്ചയ്ക്കും പദ്ധതി വലിയ തോതിൽ സഹായിക്കും.

ഗുജറാത്ത്, മഹാരാഷ്ട്ര സംസ്ഥാനങ്ങളിലൂടെയും ദാദ്ര-നാഗർ ഹവേലി കേന്ദ്രഭരണ പ്രദേശത്തിലൂടെയുമാണ് ഈ അതിവേഗ റെയിൽ പാത കടന്നുപോകുന്നത്. എല്ലാ നിയമപരമായ അനുമതികളും ലഭിച്ചതായും നിർമ്മാണ പ്രവർത്തനങ്ങൾ അതിവേഗം പുരോഗമിക്കുകയാണെന്നും കേന്ദ്രമന്ത്രി കൂട്ടിച്ചേർത്തു.