Viral Video: സ്ക്രീനിൽ ഒരു ക്ലിക്ക്, മുഖത്ത് ഒരായിരം വോൾട്ട്!; ബ്ലിങ്കിറ്റിൽ ആദ്യമായി ഓർഡർ ചെയ്ത അമ്മയുടെ ക്യൂട്ട് റിയാക്ഷൻ കണ്ടോ

Viral Video

സാങ്കേതികവിദ്യ എത്ര വളർന്നാലും, നമ്മുടെ അമ്മമാർ ഒരു പുതിയ കാര്യം പഠിച്ചെടുക്കുമ്പോൾ കിട്ടുന്ന ആ ഒരു ആവേശം ഒന്ന് വേറെ തന്നെയാണ്. അത്തരത്തിൽ ഒരു നിഷ്കളങ്കമായ സന്തോഷത്തിൻ്റെ വീഡിയോയാണ് ഇപ്പോൾ ഇൻ്റർനെറ്റിൽ വൈറലാകുന്നത്. സാധനങ്ങൾ വാങ്ങാൻ കടയിൽ പോകേണ്ടി വരുമെന്ന് കരുതിയിരുന്ന അമ്മയ്ക്ക് മുന്നിലേക്ക് മിനിറ്റുകൾക്കുള്ളിൽ ഓർഡർ ചെയ്ത സാധനങ്ങളെത്തുന്നു. ഓൺലൈൻ ഷോപ്പിംഗിൻ്റെ വേഗത കണ്ട് അമ്പരന്ന ആ അമ്മയുടെ സന്തോഷവും അത്ഭുതവുമാണ് ഇപ്പോൾ സോഷ്യൽ മീഡിയയിൽ ചിരി പടർത്തുന്നത്. ഡിജിറ്റൽ ഇന്ത്യയുടെ വേഗത സാധാരണക്കാരിലേക്ക് എങ്ങനെ എത്തുന്നു എന്നതിൻ്റെ ഏറ്റവും വലിയ നിഷ്കളങ്കവും സുന്ദരവുമായ കാഴ്ചയാണിത്.

പ്രണാലി എന്ന പെൺകുട്ടി തൻ്റെ ഇൻസ്റ്റാഗ്രാമിലൂടെ പങ്കുവെച്ച വീഡിയോയിലാണ് തൻ്റെ അമ്മയുടെ ക്യൂട്ടായിട്ടുള്ള റിയാക്ഷൻ കാണാൻ കഴിയുന്നത്. ആ അമ്മ ആദ്യമായി ബ്ലിങ്കിറ്റ് ആപ്പിലൂടെ സാധനങ്ങൾ ഓർഡർ ചെയ്യുന്നതാണ് വീഡിയോയിൽ. മകൾ പറഞ്ഞുതന്ന നിർദ്ദേശങ്ങൾക്കനുസരിച്ച് ഓരോ സ്റ്റെപ്പും ശ്രദ്ധയോടെ പൂർത്തിയാക്കിയ അമ്മ, ഒടുവിൽ ‘ഓർഡർ പ്ലേസ്ഡ്’ എന്ന സന്ദേശം സ്ക്രീനിൽ തെളിഞ്ഞതും കുഞ്ഞുങ്ങളെപ്പോലെ തുള്ളിച്ചാടുന്നതാണ് വീഡിയോയിലുള്ളത്.

ALSO READ: പാഴ്സൽ കണ്ട് ഞെട്ടി റാപ്പിഡോ ഡ്രൈവർ; ഇത് കടന്ന കൈയെന്ന് സോഷ്യൽ മീഡിയ

താൻ ഓർഡർ ചെയ്ത സാധനം മിനിറ്റുകൾക്കുള്ളിൽ വീട്ടിലെത്താൻ പോകുന്നു എന്ന തിരിച്ചറിവാണ് ആ അമ്മയിൽ ആവേശം ഉണർത്തിയത്. വെറുമൊരു ഡിജിറ്റൽ ഇടപാടിനെ സമൂഹ മാധ്യമങ്ങളിൽ ഒരു വലിയ ആഘോഷമാക്കി മാറ്റാൻ ആ അമ്മയുടെ നിഷ്കളങ്കമായ ചിരിക്ക് കഴിഞ്ഞു എന്നതാണ് ഈ വിഡിയോയുടെ പ്രത്യേകത. വീഡിയോ കണ്ടിരിക്കുന്നവരുടെ മുഖത്ത് നമ്മൾ പോലും അറിയാതെ ഒരു പുഞ്ചിരി വിടർത്താൻ ആ അമ്മയ്ക്ക് കഴിഞ്ഞു.

വീഡിയോ വൈറലായതോടെ ആയിരക്കണക്കിന് ആളുകളാണ് കമൻ്റുകളുമായി എത്തിയത്. “നമ്മുടെ അമ്മമാർ പുതിയ കാര്യങ്ങൾ പഠിക്കുന്നത് കാണുന്നത് തന്നെ ഒരു സന്തോഷമാണ്…” “മിനിറ്റുകൾക്കുള്ളിൽ ഡെലിവറി എത്തുന്ന ആപ്പുകൾ നമുക്ക് സൗകര്യമായിരിക്കാം, പക്ഷേ അവർക്കത് വലിയൊരു മാജിക് ആണ്!” എന്നിങ്ങനെ നീളുന്നു കമൻ്റുകൾ.