Kochi Metro: നാളെ രാവിലെ 7 മുതൽ കൊച്ചി മെട്രോ സർവീസ് ആരംഭിക്കും. മഴക്കാല സുരക്ഷ ഉറപ്പാക്കി കെഎംആർഎൽ

Kochi Metro

കൊച്ചി: യുപിഎസ്‌സി പരീക്ഷ എഴുതുന്ന ഉദ്യോഗാർഥികൾക്കായി കൊച്ചി മെട്രോ സർവീസുകളുടെ സമയത്തിൽ മാറ്റം വരുത്തി. ഞായറാഴ്ച (മേയ് 24) പരീക്ഷ നടക്കുന്നതിനാൽ ഉദ്യോഗാർഥികൾക്ക് പരീക്ഷാകേന്ദ്രങ്ങളിൽ സമയത്തിന് എത്തിച്ചേരുന്നതിനായി രാവിലെ 7 മണി മുതൽ തന്നെ സർവീസുകൾ ആരംഭിക്കും. ആലുവ, തൃപ്പൂണിത്തുറ എന്നീ സ്റ്റേഷനുകളിൽ നിന്ന് ഒരേസമയം സർവീസുകൾ ആരംഭിക്കുമെന്ന് കെഎംആർഎൽ (K M R L) അറിയിച്ചു.

മെട്രോ രണ്ടാം ഘട്ട നിർമാണ മേഖലകളിൽ മഴക്കാല സുരക്ഷ

മഴക്കാലം മുന്നിൽ കണ്ട് മെട്രോ രണ്ടാം ഘട്ട നിർമാണം നടക്കുന്ന സ്ഥലങ്ങളിൽ സുരക്ഷാ ക്രമീകരണങ്ങൾ കർശനമാക്കിയതായി കെഎംആർഎൽ വ്യക്തമാക്കി. പ്രധാന സുരക്ഷാ നടപടികൾ താഴെ പറയുന്നവയാണ്

• രാത്രികാല സുരക്ഷ: രാത്രിയിൽ വ്യക്തമായ കാഴ്ച ഉറപ്പാക്കാൻ ബാരിക്കേഡുകളുടെ അറ്റത്ത് അധിക റിഫ്ലക്ടറുകളും റിഫ്ലക്ടീവ് ടേപ്പുകളും സ്ഥാപിച്ചു. ബാരിക്കേഡുകൾ കൃത്യമായി പുനഃക്രമീകരിക്കുകയും ചെയ്തിട്ടുണ്ട്.
• സൂചനാ ബോർഡുകൾ: തിരിവുകളിലും ഡൈവർഷൻ നിലവിലുള്ള ഭാഗങ്ങളിലും കൃത്യമായ സൂചനാ ബോർഡുകൾ സ്ഥാപിച്ചു. ചിലയിടങ്ങളിൽ കാഴ്ച എളുപ്പമാക്കാൻ ബാരിക്കേഡുകളുടെ ഉയരം കുറച്ചിട്ടുണ്ട്.

Also Read – Kochi-Munnar Highway: കൊച്ചി-മൂന്നാര്‍ പാത മിനുങ്ങും തിളങ്ങും; എന്‍എച്ച് 85 നവീകരണം ഉടന്‍

• റോഡ് ക്രോസിങ്: നിർമാണം പൂർത്തിയായ സ്ഥലങ്ങളിലെ ബാരിക്കേഡുകൾ നീക്കം ചെയ്യും. വാഹനങ്ങൾക്കും യാത്രക്കാർക്കും കൂടുതൽ സ്ഥലങ്ങളിൽ റോഡ് ക്രോസിങ് സൗകര്യം ഏർപ്പെടുത്തും.
• ട്രാഫിക് വാർഡൻമാർ: വാഹന ഗതാഗത നിയന്ത്രണത്തിനും കാൽനട യാത്രക്കാരെ സഹായിക്കുന്നതിനുമായി മെട്രോ അലൈൻമെന്റിലുടനീളം അധിക ട്രാഫിക് വാർഡൻമാരെ വിന്യസിക്കും.

വെള്ളക്കെട്ട് ഒഴിവാക്കാൻ നടപടികൾ

മഴക്കാല മുന്നൊരുക്കങ്ങളുടെ ഭാഗമായി വെള്ളക്കെട്ട് സാധ്യതയുള്ള താഴ്ന്ന പ്രദേശങ്ങളിൽ വെള്ളം ഒഴുക്കിക്കളയാനുള്ള ജോലികൾ ആരംഭിച്ചു. കെഎംആർഎലിന്റെ നിയന്ത്രണത്തിലുള്ള കാനകളും അഴുക്കുചാലുകളും വൃത്തിയാക്കുന്ന ജോലികളും പുരോഗമിക്കുകയാണ്.

കരാറുകാർക്ക് കർശന നിർദേശം

മഴക്കാലം അവസാനിക്കുന്നതുവരെ റോഡുകളുടെ വശങ്ങളിൽ നിർമാണ സാമഗ്രികൾ സൂക്ഷിക്കരുതെന്ന് കരാറുകാർക്കും അനുബന്ധ ഏജൻസികൾക്കും കെഎംആർഎൽ കർശന നിർദേശം നൽകി. നിർമാണ സാമഗ്രികൾ സുരക്ഷിതമായ സ്ഥലങ്ങളിലേക്ക് മാറ്റണം.

എല്ലാ നിർമാണ കേന്ദ്രങ്ങളിലും അടിയന്തര സാഹചര്യങ്ങൾ നേരിടാൻ പരിശീലനം ലഭിച്ച സുരക്ഷാ ജീവനക്കാരെയും സാങ്കേതിക വിദഗ്ധരെയും ഉൾപ്പെടുത്തിയുള്ള എമർജൻസി റെസ്പോൺസ് ടീമുകളെ (Emergency Response Teams) സജ്ജമാക്കുമെന്നും കെഎംആർഎൽ അറിയിച്ചു. മഴക്കാല സുരക്ഷാ ക്രമീകരണങ്ങൾ നിരന്തരമായി വിലയിരുത്തി ഏകോപിപ്പിക്കും.

English Summary

To help UPSC aspirants reach their exam centers on time, Kochi Metro will begin its services early at 7:00 AM from Aluva and Tripunithura on Sunday, May 24. In preparation for the upcoming monsoon, KMRL has enhanced safety measures along its Phase II construction routes by adding reflectors to barricades, improving visibility, and clearing drains to prevent waterlogging. Additionally, extra traffic wardens will be deployed to assist pedestrians and manage traffic, while trained Emergency Response Teams will remain stationed at all construction sites.