Makaravilakku 2026: ശബരിമല മകരവിളക്ക്; ഗവിയിലെ ഈ റൂട്ടുകൾ വരും ദിവസങ്ങളിൽ അടച്ചിടും

Gavi

ശബരിമല മകരവിളക്ക് മഹോത്സവത്തിന് ഇനി രണ്ട് ദിവസം മാത്രമാണ് ബാക്കി നിൽക്കുന്നത്. മകരവിളക്കിനോട് അനുബന്ധിച്ച് ശബരിമലയിൽ ഭക്തരുടെ വലിയ തിരക്കാണ് അനുഭവപ്പെടുന്നത്. അതേസമയം ശബരിമലയിലെ മകരവിളക്ക് ഉത്സവത്തോടനുബന്ധിച്ചുള്ള സുരക്ഷാ ക്രമീകരണങ്ങളുടെ ഭാഗമായി നാല് ദിവസത്തേക്ക് ​ഗവി റൂട്ട് അടച്ചിടുമെന്ന് അധികൃതർ അറിയിച്ചിട്ടുണ്ട്. ഇന്ന് മുതൽ ജനുവരി 15 വരെയാണ് ആങ്ങമൂഴിയിലെ കൊച്ചാണ്ടി ചെക്ക് പോസ്റ്റ് വഴിയുള്ള യാത്ര നിരോധിക്കുക.

ഈ ദിവസങ്ങളിൽ ആങ്ങമൂഴിയിലെ കൊച്ചാണ്ടി ചെക്ക് പോസ്റ്റ് വഴിയുള്ള യാത്രകൾ ഒഴിവാക്കണമെന്നാണ് അറിയിപ്പ്. ഇതുകൂടാതെ കുമളിക്ക് സമീപമുള്ള ഇക്കോ-ടൂറിസം കേന്ദ്രം എല്ലാ വർഷവും ഉത്സവ സമയത്ത് അടച്ചിടാറുണ്ട്. അതേസമയം, സ്വകാര്യ വാഹനങ്ങളിൽ ഗവിയിൽ എത്താൻ ആഗ്രഹിക്കുന്നവർ മുൻകൂട്ടി ഓൺലൈനായി രജിസ്റ്റർ ചെയ്യേണ്ടതുണ്ട്. പത്തനംതിട്ട ജില്ലയിലെ ആങ്ങമൂഴി ചെക്ക് പോസ്റ്റിൽ നൽകുന്ന യാത്രാ പാസ് സ്വന്തമാക്കിയാൽ മാത്രമെ ഈ റൂട്ടിൽ യാത്ര അനുവദിക്കുകയുള്ളൂ.

ALSO READ: പൊൻമുടിയിലെ സീതാ തീർത്ഥത്തിൻ്റെ പ്രത്യേകത അറിയാമോ? മകര പൊങ്കാല എപ്പോൾ

കെഎസ്ആർടിസി ​ഗവി യാത്ര

പത്തനംതിട്ടയിൽ നിന്ന് ഗവിയിലേക്ക് ബസ് സർവീസുകൾ ലഭ്യമാണ്. കെഎസ്ആർടിസിയുടെ ബജറ്റ് ടൂറിസം യാത്രയും ഇവിടേക്ക് ഉണ്ടാകും. പുലർച്ചെ അഞ്ച് മണിക്ക് ആരംഭിച്ച് വൈകുന്നേരത്തോടെ അവസാനിക്കുന്ന ഏകദിന ട്രിപ്പുകളാണ് ഇവയിൽ പലതും. ഒറ്റ ദിവസത്തെ യാത്ര പ്ലാനിടുന്നവർക്ക് എന്തുകൊണ്ടും ഈ യാത്ര അനുയോദജ്യമാണ്. പൊന്മുടി, തെന്മല, കാപ്പുകാട്, ആഴിമല, കോവളം, മലക്കപ്പാറ, ചതുരംഗപ്പാറ, മാമലക്കണ്ടം, മറയൂർ, വട്ടവട, രാമക്കൽമേട്, വാഗമൺ, ഗവി എന്നിവടങ്ങളിലേക്കാണ് പാക്കേജുള്ളത്.

ഇന്ന് കേരളത്തിൽ ഏറ്റവും കൂടുതൽ ആളുകൾ പോകുന്നതും പോകുവാൻ ആഗ്രഹിക്കുന്നതുമായ ഇടങ്ങളിലൊന്നായി മാറിയിരിക്കുകയാണ് പത്തനംതിട്ട ജില്ലയിലെ ​ഗവി. ഓർഡിനറി എന്ന സിനിമയിലൂടെയാണ് ഈ നാട് ഏറ്റവും കൂടുതൽ ഹിറ്റായത്. കാടിൻറെ സൗന്ദര്യവും, നാടിൻ്റെ പച്ചപ്പും പ്രകൃതിയുടെ ആകർഷണവുമാണ് ​ഗവിയിലെ പ്രധാന ആകർഷണം.