Wayanad Poopoli: വയനാടൻ ‘പൂപ്പൊലി’ കാണണ്ടേ: ടിക്കറ്റ് ബുക്കിംഗ്, ബസ് സർവീസുകൾ, വിശദമായി അറിയാം

Wayanad Poopoli

വയനാടിന്റെ വർണോത്സവമായ പൂപ്പൊലിക്ക് നാളെ (ജനുവരി 1 2026) മുതൽ തുടക്കം. 15 ദിവസം നീണ്ടുനിൽക്കുന്ന ​ഗംഭീര പുഷ്പമേളയിൽ ഡാലിയ, സൂര്യകാന്തി, ഗ്ലാഡിയോലസ്, ആസ്റ്റർ, മാരിഗോൾഡ്, പെറ്റൂണിയ, ഡെൻഫീനിയ, പാൻസി, ട്യൂബ് റോസ്, സാൽവിയ, ഫ്‌ലോക്സ്, ഡയാന്തസ്, ഓർക്കിഡുകൾ, കാക്ടസുകൾ എന്നിവയുടെ പുഷ്‌പോദ്യാനങ്ങൾ, പുഷ്പാലങ്കാരങ്ങൾ എന്നിവ ആസ്വദിക്കാനാകും.

ഈ വർഷം, 350-ലധികം പുഷ്പങ്ങളാണ് മേളയിൽ ഉൾപ്പെടുത്തിയിരിക്കുന്നത്. 800-ലധികം ഇനങ്ങളുള്ള 2.5 ഏക്കർ റോസ് ഗാർഡൻ, ഒരു ഏക്കർ ഗ്ലാഡിയോലസ് ഗാർഡൻ എന്നിവയും ഇക്കൂട്ടത്തിൽ ഉൾപ്പെടുന്നു. ഇതുകൂടാതെ കാർഷിക ഉപകരണങ്ങൾ, കാർഷിക യന്ത്രങ്ങൾ, വിവിധ ഇനങ്ങളുടെ വിത്തുകൾ, കർഷകരിൽ നിന്നുള്ള ജൈവ ഉൽ‌പന്നങ്ങൾ, കർഷക-ഉൽ‌പാദക സംഘടനകൾ, കമ്പനികൾ എന്നിവയുൾപ്പെടെയുള്ള കാർഷിക ആവശ്യങ്ങളിൽ ശ്രദ്ധ കേന്ദ്രീകരിക്കുന്ന 200 ഓളം വാണിജ്യ സ്റ്റാളുകളും ഇവിടെ സജ്ജമാക്കിയിട്ടുണ്ട്.

ALSO READ: കോട്ടയത്തിത് പൂക്കാലം…; വീട്ടിലിരിക്കാതെ വേ​ഗം വിട്ടോ, സമയം അറിയാം

സിപ്‌ലൈൻ, ജയന്റ് വീൽ, മെറി-ഗോ-റൗണ്ട്, ചെയർ-സ്വിംഗ്-റൈഡ്, കുട്ടികൾക്കുള്ള കളിസ്ഥലം, വിനോദ കേന്ദ്രങ്ങൾ, മൃഗങ്ങളുടെയും പക്ഷികളുടെയും മേഖല എന്നിവയും പൂപ്പൊലിയിൽ മാറ്റ് കൂട്ടും. വയനാട്ടിലെ അമ്പലവയലിലാണ് പൂപ്പൊലി സ്ഥിതി ചെയ്യുന്നത്. കോഴിക്കോട്-ഊട്ടി റോഡിലെ വടുവൻചാലിൽ നിന്ന് വെറും 9 കിലോമീറ്റർ അകലെയാണിത്. വിനോദ സഞ്ചാര കേന്ദ്രങ്ങൾ ഉൾപ്പെടെയുള്ള മിക്ക സ്ഥലങ്ങളിൽ നിന്നും നിരവധി സ്വകാര്യ, കെഎസ്ആർടിസി ബസുകൾ സർവീസ് നടത്തുന്നുണ്ട്.

കെഎസ്ആർടിസിയുടെ ബജറ്റ് ടൂറിസം സെല്ലിൻ്റെ ഭാ​ഗമായിട്ടുള്ള പ്രത്യേക സർവീസുകളും പുഷ്പമേള നടക്കുന്ന സ്ഥലത്തേക്ക് സർവീസ് നടത്തുന്നുണ്ട്. പൂപ്പൊലിയിലേക്കുള്ള ടിക്കറ്റ് ഉൾപ്പെടുത്തിയാണ് കെഎസ്ആർടിസി സർവീസ് നടത്തുക. രാവിലെ 9 മുതൽ രാത്രി 10 വരെയാണ് ഇവിടേക്കുള്ള സന്ദർശന സമയം. ടിക്കറ്റ് കൗണ്ടറുകൾക്ക് പുറമെ, ഇക്കൊല്ലം മുതൽ സന്ദർശകർക്ക് ഓൺലൈനായും ടിക്കറ്റുകൾ ബുക്ക് ചെയ്യാനാകും.