Bengaluru Mango Price: ചൂടകറ്റാന് മാങ്ങ കഴിക്കാം, നടക്കില്ല ബെംഗളൂരുവില് പൊള്ളുംവില
Mango Price Hike in Bengaluru: വേനല് ആരംഭിക്കുമ്പോള് വലിയൊരു വിലക്കയറ്റത്തിനും ബെംഗളൂരു സാക്ഷ്യം വഹിക്കുന്നുണ്ട്. ഇളനീരിന് വില വര്ധിക്കാന് തുടങ്ങിയതിന് പിന്നാലെ, മറ്റൊരാളും തന്റെ കുതിപ്പ് ആരംഭിച്ചു.
ബെംഗളൂരുവില് ചൂട് കുത്തനെ ഉയരുകയാണ്. ചൂട് കൂടാന് തുടങ്ങിയതോടെ പഴവര്ഗങ്ങളുടെ ആവശ്യകതയും വര്ധിച്ചു. പഴങ്ങള് നേരിട്ടും ജ്യൂസാക്കിയുമെല്ലാം കഴിച്ചാണ് ആളുകള് ശരീരമൊന്ന് തണുപ്പിക്കുന്നത്. ഇത്തവണ നേരത്തെ എത്തിയ വേനല്ക്കാലം ബെംഗളൂരുവിലെ ജനങ്ങള്ക്ക് വലിയ സമ്മര്ദമാണ് സമ്മാനിക്കുന്നത്. (Image Credits: Getty Images)
എന്നാല് വേനല് ആരംഭിക്കുമ്പോള് വലിയൊരു വിലക്കയറ്റത്തിനും ബെംഗളൂരു സാക്ഷ്യം വഹിക്കുന്നുണ്ട്. ഇളനീരിന് വില വര്ധിക്കാന് തുടങ്ങിയതിന് പിന്നാലെ, മറ്റൊരാളും തന്റെ കുതിപ്പ് ആരംഭിച്ചു. നിലവില് 80 രൂപയാണ് നഗരത്തില് ഇളനീരിന്റെ വില. ഇതിന്റെ ചുവടുപിടിച്ച് മാമ്പഴത്തിന്റെ വിലയും കുതിക്കുന്നു.
48 രൂപ വരെ വിലയുണ്ടായിരുന്ന മാമ്പഴത്തിന് ഇപ്പോള് 200 രൂപയും അതിന് മുകളിലുമാണ് വില വരുന്നത്. ബംഗാനപള്ളി മാങ്ങയ്ക്ക് 120 രൂപ കിലോയ്ക്ക് വിലയുണ്ട്. അല്ഫോന്സ മാങ്ങയ്ക്ക് 192 രൂപയാണ്. റോ മാങ്ങകള്ക്ക് 147 നും 150നും ഇടയിലാണ് വില.
എന്നാല് ചൂട് ഉയരുന്നത് മാമ്പഴം ഉള്പ്പെടെയുള്ള പഴവര്ഗങ്ങളുടെ വില ഇനിയും ഉയര്ത്തുമെന്നാണ് വ്യാപാരികളുടെ പക്ഷം. ജ്യൂസിന്റെ ആവശ്യകതയാണ് മാമ്പഴത്തിന്റെ വില വര്ധിപ്പിക്കുന്നത്.
ശ്രീനിവാസപൂര്, കോലാര്, രാമനഗര, കൃഷ്ണഗിരി, ആന്ധ്രാപ്രദേശ് എന്നിവിടങ്ങളില് നിന്നാണ് ബെംഗളൂരുവിലേക്ക് മാമ്പഴമെത്തുന്നത്. കാലാവസ്ഥയില് സംഭവിക്കുന്ന മാറ്റം പഴത്തിന്റെ വിളവെടുപ്പിനെ സാരമായി ബാധിക്കാനിടയുണ്ട്.
