Petrol Price: വില കുതിക്കുന്നു, പെട്രോൾ ഉപയോഗം കുറയ്ക്കാൻ ചില തന്ത്രങ്ങൾ ഇതാ
Tips to Save Fuel: രാജ്യത്ത് ഇന്ധപ്രതിസന്ധി രൂക്ഷമായിരിക്കുകയാണ്. പെട്രോളിന്റെയും ഡീസലിന്റെയും വില വർദ്ധിക്കുന്നത് സാധാരണക്കാരെ ആശങ്കയിലാഴ്ത്തുന്നുണ്ട്. ഇത്തരത്തിൽ വില കുതിക്കുന്നന സാഹചര്യത്തിൽ വാഹനത്തിന്റെ മൈലേജ് വർദ്ധിപ്പിക്കാനും ഇന്ധനച്ചെലവ് കുറയ്ക്കാനും ഏറെ ശ്രദ്ധിക്കേണ്ടതുണ്ട്. ഇതിന് നിങ്ങളെ സഹായിക്കുന്ന ചില തന്ത്രങ്ങളുണ്ട്. അവ ഏതെല്ലാമെന്ന് നോക്കിയാലോ...
കൃത്യസമയത്തെ സർവീസിംഗ് ആണ് പ്രധാനം. വാഹനത്തിന്റെ എൻജിൻ കൃത്യസമയത്ത് സർവീസ് ചെയ്യുന്നത് മൈലേജ് നിലനിർത്താൻ സഹായിക്കും. അതുപോലെ എയർ ഫിൽട്ടറുകൾ വൃത്തിയാക്കുന്നതും എൻജിൻ ഓയിൽ കൃത്യമായ ഇടവേളകളിൽ മാറ്റുന്നതും ഇന്ധനക്ഷമത വർദ്ധിപ്പിക്കുന്നതാണ്.
ആഴ്ചയിലൊരിക്കലെങ്കിലും ടയർ പ്രഷർ പരിശോധിച്ച് കമ്പനി നിർദ്ദേശിക്കുന്ന അളവിൽ നിലനിർത്തുക. ടയറുകളിൽ വായുമർദ്ദം കുറവാണെങ്കിൽ അത് എൻജിന് കൂടുതൽ കരുത്ത് ഉപയോഗിക്കേണ്ട സാഹചര്യം ഒരുക്കും. ഇത് ഇന്ധന ഉപഭോഗം വർദ്ധിപ്പിക്കും.
അതുപോലെ അനാവശ്യ ഭാരങ്ങൾ ഒഴിവാക്കേണ്ടതാണ്. വാഹനത്തിന്റെ ഡിക്കിയിലോ റൂഫ് റാക്കറിലോ ഉള്ള അനാവശ്യ ഭാരം ഒഴിവാക്കുന്നത് മൈലേജ് കൂട്ടാൻ സഹായിക്കും. ഭാരം കൂടുന്തോറും എൻജിൻ കൂടുതൽ ഇന്ധനം വലിച്ചെടുക്കുന്നതാണ്.
അമിതവേഗം ഒഴിവാക്കുക. ശരിയായ വേഗതയിൽ ശരിയായി ഗിയർ ഉപയോഗിക്കുന്നത് ഇന്ധനക്ഷമത ഉറപ്പാക്കും. പെട്ടെന്ന് ആക്സിലറേറ്റർ കൊടുക്കുന്നതും ബ്രേക്ക് അമർത്തുന്നതും ഒഴിവാക്കാൻ ശ്രദ്ധിക്കുക.
സിഗ്നലുകളിലോ വലിയ ട്രാഫിക് ബ്ലോക്കുകളിലോ 30 സെക്കൻഡിൽ കൂടുതൽ വാഹനം നിർത്തിയിടേണ്ടി വന്നാൽ എൻജിൻ ഓഫ് ചെയ്യുക. ഇത് ഇന്ധനം ലാഭിക്കാൻ സഹായിക്കും. (Image Credit: PTI)
