Tips for keeping cool: വല്ലാത്ത ചൂടാണോ? എസിയില്ലാതെയും വീട് തണുപ്പിക്കാം, ചെയ്യേണ്ടത്…
How to Keep Your House Cool: പൊള്ളുന്ന വെയിലിൽ ഓരോ മലയാളികളും നട്ടംതിരിയുകയാണ്. വീടിനുള്ളിലെ ചൂട് കുറയ്ക്കാൻ എസിയെ അമിതമായി ആശ്രയിക്കുന്നത് വൈദ്യുതി ബില്ലും വർദ്ധിപ്പിക്കും. എന്നാൽ ചില വഴികളിലൂടെ എസി ഇല്ലാതെ തന്നെ വീടിനുള്ളിൽ തണുപ്പ് നിലനിർത്താൻ സാധിക്കുമെന്ന് അറിയാമോ?
വീടിന്റെ ഭിത്തികളിൽ ഉപയോഗിക്കുന്ന പെയിന്റ് ചൂടിനെ സ്വാധീനിക്കുന്നുണ്ട്. കടും നിറങ്ങൾ ചൂടിനെ ആഗിരണം ചെയ്യുമ്പോൾ വെള്ളയോ അല്ലെങ്കിൽ ഇളം നിറങ്ങളോ ചൂടിനെ പ്രതിഫലിപ്പിക്കുന്നു. ഇത് വീടിനുള്ളിലെ താപനില കുറയ്ക്കാൻ സഹായിക്കും.
പകൽ സമയത്ത് കടുത്ത ചൂടുള്ള വായു വീടിനുള്ളിലേക്ക് കടക്കാതിരിക്കാൻ ജനലുകളും വാതിലുകളും അടച്ചിടുക. എന്നാൽ വൈകുന്നേരമാകുന്നതോടെ ചൂട് കുറയുന്ന സമയത്ത് ജനലുകൾ തുറന്നിടുന്നത് വീടിനുള്ളിലെ ചൂട് പുറന്തള്ളാനും തണുത്ത വായു അകത്ത് കയറാനും സഹായിക്കും.
സൂര്യപ്രകാശം നേരിട്ട് വീടിനുള്ളിലേക്ക് അടിക്കുന്നത് തടയാൻ കട്ടിയുള്ള കർട്ടനുകൾ ഉപയോഗിക്കാം. ഇത് മുറിക്കുള്ളിലെ താപനില വലിയ അളവിൽ കുറയ്ക്കും. വെളുത്ത നിറത്തിലുള്ള കർട്ടനുകൾ വെളിച്ചത്തെ പ്രതിഫലിപ്പിക്കാൻ കൂടുതൽ മികച്ചതാണ്.
ലൈറ്റുകളും മറ്റ് ഇലക്ട്രോണിക് ഉപകരണങ്ങളും പ്രവർത്തിക്കുമ്പോൾ ചെറിയ അളവിൽ ചൂട് പുറപ്പെടുവിക്കുന്നുണ്ട്. പകൽ സമയത്ത് അനാവശ്യമായ ലൈറ്റുകളും ഉപകരണങ്ങളും ഓഫ് ചെയ്യുന്നത് മുറിയിലെ ചൂട് കുറയ്ക്കാൻ സഹായിക്കും.
വീടിനുള്ളിൽ വളർത്താൻ കഴിയുന്ന ഇൻഡോർ പ്ലാന്റുകൾ വായു ശുദ്ധീകരിക്കുക മാത്രമല്ല, മുറിക്കുള്ളിലെ ഈർപ്പം നിലനിർത്തുകയും തണുപ്പ് നൽകുകയും ചെയ്യുന്നു. ജനൽക്കലിലോ ബാൽക്കണിയിലോ ചെടികൾ വെക്കുന്നത് ചൂടിനെ തടയാൻ സഹായിക്കും.
വൈകുന്നേരങ്ങളിൽ വീടിന്റെ പരിസരത്തോ മുറ്റത്തോ വെള്ളം തളിക്കുന്നത് അന്തരീക്ഷത്തിലെ ചൂട് കുറയ്ക്കാൻ സഹായിക്കും. പഴയ രീതിയാണെങ്കിലും ഇത് വീടിനുള്ളിൽ തണുത്ത വായു ലഭിക്കാൻ ഇന്നും ഫലപ്രദമാണ്. (Image Credit: Getty Images)
