Paneer: പിരിഞ്ഞ പാലിൽ ഇതൊന്ന് ചേർക്കൂ, പനീർ റെഡി
How to Make Paneer at Home: എല്ലാവർക്കും ഏറെ പ്രിയപ്പെട്ട പാലുൽപന്നമാണ് പനീർ. എന്നാൽ കടകളിൽ നിന്ന് വാങ്ങുന്ന പനീറിനേക്കാൾ ഗുണമേന്മയുള്ളതും ഫ്രഷുമായ പനീർ വളരെ കുറഞ്ഞ സമയത്തിനുള്ളിൽ നമുക്ക് വീട്ടിൽ തന്നെ നിർമ്മിക്കാവുന്നതാണ്.
പാൽ പിരിഞ്ഞുപോയാലും ഇനി ടെൻഷൻ വേണ്ട. അടിപൊളി പനീർ തയ്യാറാക്കാം. അതിനായി പാൽ (പിരിഞ്ഞ പാലാണെങ്കിലും കുഴപ്പമില്ല), നാരങ്ങാനീര്, കോട്ടൺ തുണി (അരിച്ചെടുക്കാൻ) ഇത്രയും മാത്രം മതിയാകും.
സാധാരണ പാൽ ഉപയോഗിച്ചാണ് പനീർ ഉണ്ടാക്കുന്നതെങ്കിൽ പാൽ നന്നായി തിളപ്പിക്കുക. പാൽ പാത്രത്തിൽ തിളച്ചു വരുമ്പോൾ അതിലേക്ക് മൂന്നോ നാലോ ടീസ്പൂൺ നാരങ്ങാനീര് ചേർക്കുക. പാൽ പൂർണ്ണമായും പിരിഞ്ഞു വരുന്നത് വരെ ഇളക്കുക. പാൽ നന്നായി പിരിഞ്ഞു കട്ടകളായി മാറിയ ശേഷം ഒരു അരിപ്പയോ നേർത്ത കോട്ടൺ തുണിയോ ഉപയോഗിച്ച് ഇത് അരിച്ചെടുക്കുക.
പാലിലെ വെള്ളം പൂർണ്ണമായും വേർപെടുത്തണം. നാരങ്ങയുടെയോ വിനാഗിരിയുടെയോ പുളിപ്പ് മാറാനായി അരിച്ചെടുത്ത പനീർ കട്ടകൾ നല്ല തണുത്ത വെള്ളത്തിൽ ഒന്ന് കഴുകുന്നത് നല്ലതാണ്. തുണിയിൽ ബാക്കിയായ പനീർ കട്ടകൾ നന്നായി പിഴിഞ്ഞ് അതിലെ വെള്ളം പൂർണ്ണമായും കളയുക.
വെള്ളം കളഞ്ഞ ശേഷം തുണിയോടെ തന്നെ പനീർ ഒരു കിഴിയായി കെട്ടി ഒരു പരന്ന പാത്രത്തിലോ പലകയിലോ വയ്ക്കുക. ഇതിന് മുകളിലായി വെള്ളം നിറച്ച പാത്രം ഒരു മണിക്കൂർ നേരം വയ്ക്കുക. ഇത് പനീറിന് കൃത്യമായ ആകൃതിയും ഉറപ്പും നൽകാൻ സഹായിക്കും. ഒരു മണിക്കൂറിന് ശേഷം ഭാരം മാറ്റി തുണി അഴിക്കുക. ഇപ്പോൾ നല്ല ഉറപ്പുള്ള പനീർ തയ്യാറായിട്ടുണ്ടാകും.
ഇത് ആവശ്യാനുസരണം ചെറിയ കഷണങ്ങളായി മുറിച്ചെടുത്ത് കറികൾക്കായി ഉപയോഗിക്കാം. പാൽ തിളപ്പിക്കുമ്പോൾ തന്നെ പിരിഞ്ഞു പോയതാണെങ്കിൽ അതിലേക്ക് അല്പം കൂടി നാരങ്ങാനീര് ചേർത്ത് ബാക്കി ചെയ്യാവുന്നതാണ്. (Image Credit: Getty Images)
