Pink Salt Benefits: പിങ്ക് ഉപ്പ് ശരിക്കും നല്ലതാണോ? പരസ്യങ്ങൾ പറയാത്ത സത്യാവസ്ഥ ഇതാണ്
Pink Salt Benefits And Side Effects: ശരീരത്തിന് ആവശ്യമായ അളവിൽ ഈ ധാതുക്കൾ ലഭിക്കണമെങ്കിൽ നിങ്ങൾ കിലോക്കണക്കിന് ഉപ്പ് ദിവസവും കഴിക്കേണ്ടി വരും എന്നതും ഓർക്കണം. എന്ന് കരുതി അമിതമായി ഉപ്പ് കഴിക്കുന്നത് ഗുരുതരമായ ആരോഗ്യപ്രശ്നങ്ങളിലേക്ക് നയിക്കുകയും ചെയ്യും.
ശരീരം മെലിയാനും ഫിറ്റായിട്ടിരിക്കാനും വ്യായാമത്തോടൊപ്പം ഭക്ഷണകാര്യത്തിലും ശ്രദ്ധിക്കുന്നവർ ധാരാളമാണ്. അത്തരക്കാർ ഭക്ഷണത്തിൽ വരുത്തിയ മാറ്റങ്ങൾ പോലും ചിലപ്പോൾ അതിശയകരമായി തോന്നിയേക്കാം. അങ്ങനെ അടുത്തിടെ പ്രചാരത്തിലേറിയ ഒന്നാണ് പിങ്ക് സാൾട്ട് അഥവാ പിങ്ക് നിറത്തിലുള്ള ഉപ്പ്. ആരോഗ്യത്തിന് നല്ലതാണെന്ന് പരസ്യപ്രചാരണത്തിന് പിന്നാലെയാണ് ഇത് ആളുകൾക്കിടയിൽ ശ്രദ്ധനേടിയത്. (Image Credits: Getty Images)
ശരിക്കും ഈ പിങ്ക് ഉപ്പ് നിങ്ങളുടെ ആരോഗ്യത്തിന് നല്ലതാണോ. ശരീരഭാരം കുറയ്ക്കാനും ആസുഖങ്ങളെ ഒഴിവാക്കി പ്രതിരോധശേഷി നൽകാനു ഇതിന് ആകുമോ? ഇത്തരം ചോദ്യങ്ങളും ഉയരുന്നുണ്ട്. എന്നാൽ കേട്ടോളൂ ഇത് വെറുമൊരു തെറ്റിദ്ധാരണമാത്രമാണെന്നാണ് ബെംഗളൂരു ആസ്ഥാനമായുള്ള ഫിറ്റ്നസ് പരിശീലകനായ റാൽസ്റ്റൺ ഡിസൂസയുടെ അഭിപ്രായം.
നമ്മൾ ഉപയോഗിക്കുന്ന സാധാരണ ഉപ്പും പിങ്ക് ഉപ്പും തമ്മിൽ രാസപരമായി വലിയ വ്യത്യാസമില്ല. രണ്ടിലും 98 ശതമാനത്തോളം സോഡിയം ക്ലോറൈഡ് തന്നെയാണ് അടങ്ങിയിരിക്കുന്നത്. ഇരുമ്പ്, മഗ്നീഷ്യം തുടങ്ങിയ ധാതുക്കൾ അടങ്ങിയിട്ടുള്ളതിനാലാണ് പിങ്ക് ഉപ്പിന് ആ നിറം ലഭിക്കുന്നത്. എന്നാൽ ഇവ വളരെ ചെറിയ അളവിൽ മാത്രമാണുള്ളത് എന്ന് പലരും അറിയാതെ പോകുന്നു.
പിങ്ക് ഉപ്പിലെ മിനറലുകൾ ശരീരത്തിന് ഗുണകരമാണെന്നത് ശരിയാണ്. എന്നാൽ ശരീരത്തിന് ആവശ്യമായ അളവിൽ ഈ ധാതുക്കൾ ലഭിക്കണമെങ്കിൽ നിങ്ങൾ കിലോക്കണക്കിന് ഉപ്പ് ദിവസവും കഴിക്കേണ്ടി വരും എന്നതും ഓർക്കണം. എന്ന് കരുതി അമിതമായി ഉപ്പ് കഴിക്കുന്നത് ഗുരുതരമായ ആരോഗ്യപ്രശ്നങ്ങളിലേക്ക് നയിക്കുകയും ചെയ്യും.
പിങ്ക് ഉപ്പ് കഴിച്ചാൽ തടി കുറയും എന്നത് വെറുമൊരു മാർക്കറ്റിംഗ് തന്ത്രം മാത്രമാണെന്നാണ് റാൽസ്റ്റൺ ഡിസൂസ അഭിപ്രായപ്പെടുന്നത്. ഉപ്പ് ഏതായാലും അത് അമിതമായാൽ ശരീരത്തിൽ ദോഷകരമാണ്. ഭാരം കുറയ്ക്കാൻ കലോറി നിയന്ത്രണവും വ്യായാമവുമാണ് പ്രധാനം, അല്ലാതെ ഉപ്പിലെ മാറ്റമല്ലെന്നും അദ്ദേഹം പറയുന്നു.
സാധാരണ ഉപ്പിൽ അയഡിൻ്റെ അളവ് കൂടുതലാണ്. ഇത് തൈറോയ്ഡ് ഗ്രന്ഥിയുടെ പ്രവർത്തനത്തിന് അത്യാവശ്യമായ ഒന്നാണ്. എന്നാൽ പിങ്ക് ഉപ്പിൽ അയഡിൻ്റെ അളവ് കുറവാണ്. പൂർണ്ണമായും പിങ്ക് ഉപ്പിലേക്ക് മാറുന്നത് ചിലപ്പോൾ അയഡിൻ കുറവിനും മറ്റ് അനുബന്ധ ആരോഗ്യ പ്രശ്നങ്ങൾക്കും കാരണമായേക്കാം.
