Jackfruit: നടൻ മമ്മൂട്ടിയെ കണ്ടു പഠിക്കണം ചക്കവെട്ടാൻ, ഇതിനുമുണ്ട് ചില രീതികൾ
Jackfruit cuting methods: ചക്ക വെട്ടുക എന്നത് ഒരു വലിയ "ടാസ്ക്" ആയി കാണുന്നവർക്ക് വേണ്ടി, പശ കൈയ്യിൽ ഒട്ടാതെയും സമയം ലാഭിച്ചും ചെയ്യാവുന്ന ചില 'പ്രോ ടിപ്‌സ്' ഇതാ
നടൻ മമ്മൂട്ടി ചക്ക വെട്ടുന്നത് കണ്ടിട്ടുണ്ടോ? ഇല്ലാത്തവർ രാപ്പകൽ എന്ന സിനിമ ഒന്നു കണ്ടു നോക്കണം. കിറുകൃത്യമായി വെട്ടിമുറിച്ച് കഷ്ണമാക്കുന്ന ആ ദൃശ്യം നോക്കി നിന്നുപോകും. അതിലെന്താ ഇത്ര പുതുമ എന്ന് ചിന്തിക്കേണ്ട, നമ്മുടെ അമ്മമാരോട് ചോദിച്ചാൽ അറിയാം അതിന്റെ ബുദ്ധിമൂട്ട്. ഈ ചക്ക വെട്ടുന്നതും ഒരു കലയാണ്. അതിനും ചില രീതികൾ ഉണ്ട്.
ചക്ക വെട്ടുന്നതിന് മുൻപ് കൈകളിലും കത്തിയുടെ രണ്ട് വശങ്ങളിലും നന്നായി വെളിച്ചെണ്ണ തേക്കുക. പശ പറ്റിപ്പിടിക്കുന്നത് ഒഴിവാക്കാൻ ഇതാണ് ഏറ്റവും നല്ല പോംവഴി. പശ തറയിൽ പറ്റിയാൽ കളയാൻ പാടാണ്. അതിനാൽ ഒരു പഴയ പത്രക്കടലാസോ പ്ലാസ്റ്റിക് ഷീറ്റോ വിരിച്ച ശേഷം അതിൽ ചക്ക വെക്കുക.
ചക്ക നീളത്തിൽ മുറിക്കുന്നതിനേക്കാൾ എളുപ്പം കുറുകെ (വട്ടത്തിൽ) മുറിക്കുന്നതാണ്. വട്ടത്തിൽ വലിയ സ്ലൈസുകളായി മുറിച്ചാൽ ചുളകൾ പെട്ടെന്ന് വേർപെടുത്താം. ചക്കയുടെ നടുവിലെ കട്ടിയുള്ള വെള്ള ഭാഗമാണ് (കൂഞ്ഞിൽ) പശയുടെ കേന്ദ്രം. ഓരോ കഷ്ണത്തിന്റെയും നടുവിലെ ഈ ഭാഗം വി ആകൃതിയിൽ മുറിച്ചു മാറ്റുക. പശ അധികം പുറത്തേക്ക് വരാതിരിക്കാൻ ഇത് സഹായിക്കും.
ചക്കയുടെ പുറംതോടിന്റെ ഭാഗത്ത് നിന്ന് ഉള്ളിലേക്ക് കത്തി കയറ്റി തൊലി ചെത്തി മാറ്റാം. അല്ലെങ്കിൽ ഓരോ ചെറിയ കഷ്ണങ്ങളും കൈകൊണ്ട് പുറകോട്ട് വളച്ചാൽ ചുളകൾ തനിയെ വിട്ടു വരും. ചുളയ്ക്കിടയിലുള്ള ചകിണി (നാരുകൾ) മാറ്റിയ ശേഷം ചുള കീറി വിത്ത് നീക്കം ചെയ്യുക.
ചക്ക വെട്ടി കഴിഞ്ഞ ശേഷം കത്തിയിലെ പശ കളയാൻ പ്രയാസമാണെങ്കിൽ, കത്തിയൊന്ന് അടുപ്പത്ത് കാണിച്ചു ചൂടാക്കുക. പശ ഉരുകുമ്പോൾ ഒരു പേപ്പർ ഉപയോഗിച്ച് തുടച്ചാൽ കത്തി പുത്തൻ പോലെയാകും. കൈയിലെ പശ കളയാൻ വെളിച്ചെണ്ണ പുരട്ടി തടവിയ ശേഷം അല്പം ഉണങ്ങിയ മണ്ണോ അല്ലെങ്കിൽ കടലമാവോ ഇട്ട് ഉരച്ചാൽ പശ പൂർണ്ണമായും നീങ്ങും.
