Jackfruit : ചക്ക മതി ഇനി ഗംഭീരം ഷവർമ ഉണ്ടാക്കാൻ… വഴി ഇതാ
Jackfruit Shawarma Recipe : ചിക്കൻ ഷവർമയുടെ അതേ രുചിയിലും ഗുണത്തിലും സസ്യാഹാര പ്രിയർക്കായി വീട്ടിൽ തന്നെ തയ്യാറാക്കാവുന്ന ഒരു വിഭവമാണ് ചക്ക ഷവർമ.
പഴുക്കാത്ത ഇടിച്ചക്കയോ പച്ചച്ചക്കയോ ഉണ്ടെങ്കിൽ ഇനി ഉഗ്രൻ ഷവർമ നിങ്ങൽക്ക് തയ്യാറാക്കാം. ഇതിനായി നീളത്തിൽ കനം കുറച്ച് അരിഞ്ഞെടുക്കുക. ഇത് ഉപ്പും മഞ്ഞളും ചേർത്ത് പകുതി വേവിൽ വേവിച്ച ശേഷം വെള്ളം പൂർണ്ണമായും കളഞ്ഞ് വെക്കുക.
ഒരു പാത്രത്തിൽ തൈര്, ഇഞ്ചി-വെളുത്തുള്ളി പേസ്റ്റ്, കുരുമുളക് പൊടി, ഗരം മസാല (അല്ലെങ്കിൽ ഷവർമ മസാല), അല്പം നാരങ്ങാനീര്, ഒലിവ് ഓയിൽ എന്നിവ ചേർത്ത് യോജിപ്പിക്കുക. ഇതിലേക്ക് വേവിച്ചു വെച്ച ചക്ക ചേർത്ത് 30 മിനിറ്റ് മാറ്റി വെക്കുക.
ഒരു പാനിൽ അല്പം എണ്ണ ഒഴിച്ച് മസാല പുരട്ടിയ ചക്ക കഷ്ണങ്ങൾ ചെറിയ തീയിൽ വെച്ച് നല്ലതുപോലെ മൊരിച്ചെടുക്കുക. ചിക്കൻ കഷ്ണങ്ങൾ പോലെ തോന്നിപ്പിക്കാൻ പാകത്തിന് ചെറിയ ബ്രൗൺ നിറമാകുന്നത് വരെ വറുത്തെടുക്കണം.
വറുത്തെടുത്ത ചക്ക കഷ്ണങ്ങൾക്കൊപ്പം ചെറുതായി അരിഞ്ഞ കാബേജ്, ക്യാരറ്റ്, ഉള്ളി, മല്ലിയില എന്നിവ ചേർത്ത് യോജിപ്പിക്കുക. ഇതിലേക്ക് ആവശ്യത്തിന് മയോണൈസ് കൂടി ചേർത്ത് മിക്സ് ചെയ്യുക.
കുബ്ബൂസിലോ ചപ്പാത്തിയിലോ അല്പം മയോണൈസ് പുരട്ടിയ ശേഷം തയ്യാറാക്കിയ ചക്ക മിശ്രിതം നടുവിൽ വെച്ച് ചുരുട്ടിയെടുക്കുക. രുചികരമായ ചക്ക ഷവർമ തയ്യാർ
