Ration: ഈ കാര്ഡുകള്ക്ക് ഫെബ്രുവരിയിൽ നാല് പാക്കറ്റ് ആട്ട; അരി എത്ര?
Kerala Ration Update: സ്റ്റോക്കിന്റെ ലഭ്യതയനുസരിച്ച് 17 രൂപ നിരക്കില് രണ്ട് കിലോ ആട്ടയാണ് അനുവദിക്കുക. പൊതുവിഭാഗം സബ്സിഡി കാർഡിലെ ഓരോ അംഗത്തിനും രണ്ട് കിലോ അരി വീതം കിലോയ്ക്ക് 4 രൂപ നിരക്കിൽ ലഭിക്കും.
ദീർഘനാളത്തെ ഇടവേളയ്ക്ക് ശേഷം സംസ്ഥാനത്ത് രണ്ട് വിഭാഗങ്ങൾക്ക് ആട്ട ലഭിക്കും. മുൻന്ഗണനേതര വിഭാഗം നീല, വെള്ള കാര്ഡുടമകള്ക്കാണ് ഫെബ്രുവരി മാസം മുതൽ ആട്ട ലഭിക്കുന്നത്. സ്റ്റോക്കിന്റെ ലഭ്യതയനുസരിച്ച് 17 രൂപ നിരക്കില് രണ്ട് കിലോ ആട്ടയാണ് അനുവദിക്കുക.
ആട്ടയുടെ വിഹിതം രണ്ട് പാക്കറ്റില് നിന്ന് നാലാക്കി ഉയര്ത്തിയിട്ടുണ്ട്. മുൻഗണനവിഭാഗം കാർഡിന് അനുവദിച്ചിട്ടുള്ള ആകെ ഗോതമ്പിന്റെ അളവിൽ നിന്നും നാല് കിലോ കുറച്ച് അതിന് പകരം നാല് പായ്ക്കറ്റ് ആട്ട 9 രൂപ നിരക്കിലും വാങ്ങാവുന്നതാണ്. കൂടാതെ നാല് കിലോ അരിയും, 1 കിലോ ഗോതമ്പും സൗജന്യമായി ലഭിക്കും.
പൊതുവിഭാഗം സബ്സിഡി കാർഡിലെ ഓരോ അംഗത്തിനും രണ്ട് കിലോ അരി വീതം കിലോയ്ക്ക് 4 രൂപ നിരക്കിൽ ലഭിക്കും. അതാത് താലൂക്കിലെ സ്റ്റോക്കിനനുസരിച്ച് കാർഡിന് ഒരു കിലോ അരി മുതൽ രണ്ട് കിലോ വരെ ആട്ട കിലോയ്ക്ക് 17 രൂപ നിരക്കിലും ലഭിക്കും.
അന്ത്യോദയ അന്ന യോജന കാർഡ് ഉടമകൾക്ക് 30 കിലോ അരിയും രണ്ട് കിലോ ഗോതമ്പും സൗജന്യമായും, 3 പായാക്കറ്റ് ആട്ട ഏഴ് രൂപ നിരക്കിലും, 1 കിലോ പഞ്ചസാര 27 രൂപ നിരക്കിലും ലഭിക്കുന്നതാണ്. പൊതുവിഭാഗം സ്ഥാപനങ്ങൾക്ക് അതാത് താലൂക്കിലെ സ്റ്റോക്കിനനുസരിച്ച് കാർഡിന് പരമാവധി 1 കിലോ ആട്ട കിലോയ്ക്ക് 17 രൂപ നിരക്കിലും ലഭിക്കുന്നതാണ്.
ജനുവരി-ഫെബ്രുവരി-മാർച്ച് ക്വാർട്ടറിൽ, വൈദ്യുതി ഉള്ള വീടുകളിലെ അന്ത്യോദയ അന്ന യോജന കാർഡിന് ആകെ 1 ലിറ്റർ മണ്ണെണ്ണയും, മുൻഗണന വിഭാഗം, പൊതുവിഭാഗം സബ്സിഡി, പൊതുവിഭാഗം കാർഡുകൾക്ക് ആകെ 0.5 ലിറ്റർ മണ്ണെണ്ണയും, വൈദ്യുതി ഇല്ലാത്ത വീടുകളിലെ കാർഡുകൾക്ക് ആകെ 6 ലിറ്റർ മണ്ണെണ്ണയും ലഭിക്കുന്നതാണ്. (Image Credit: Social Media)
