GCC Railway Project: ഗൾഫ് രാജ്യങ്ങളെ തമ്മിൽ ബന്ധിപ്പിക്കുന്ന റെയിൽവേ പദ്ധതി ഉടൻ സത്യമാകും, ഗുണങ്ങൾ ഏറെ
Saudi Arabia's GCC railway project : പദ്ധതി യാഥാർത്ഥ്യമാകുന്നതോടെ പ്രവാസികൾ ഉൾപ്പെടെയുള്ള ദശലക്ഷക്കണക്കിന് യാത്രക്കാർക്ക് ഗൾഫ് രാജ്യങ്ങൾക്കിടയിൽ കുറഞ്ഞ ചെലവിൽ യാത്ര ചെയ്യാൻ സാധിക്കും.
ഗൾഫ് സഹകരണ കൗൺസിൽ (ജിസിസി) രാജ്യങ്ങളെ തമ്മിൽ ബന്ധിപ്പിക്കുന്ന ബൃഹത്തായ റെയിൽവേ പദ്ധതി 2030-ഓടെ പൂർത്തിയാകുമെന്ന് ജിസിസി സെക്രട്ടറി ജനറൽ ജാസിം അൽ ബുദൈവി. സൗദി അറേബ്യയിലെ കിഴക്കൻ പ്രവിശ്യയിൽ നടന്ന ഗതാഗത-റോഡ് ഫോറത്തിലാണ് അദ്ദേഹം ഈ സുപ്രധാന വിവരം പങ്കുവെച്ചത്.
ആറ് ഗൾഫ് രാഷ്ട്രങ്ങളെയും ഒരൊറ്റ റെയിൽ ശൃംഖലയ്ക്ക് കീഴിൽ കൊണ്ടുവരുന്നതോടെ മേഖലയുടെ സാമ്പത്തിക, സാമൂഹിക രംഗങ്ങളിൽ വൻ കുതിച്ചുചാട്ടമാണ് പ്രതീക്ഷിക്കുന്നത്. 2030-ഓടെ ഗൾഫ് രാജ്യങ്ങളിലെ റെയിൽ ശൃംഖലകൾ തമ്മിൽ പൂർണ്ണമായി ബന്ധിപ്പിക്കുകയാണ് ലക്ഷ്യം. പദ്ധതിയുടെ നിർമ്മാണത്തിൽ വിവിധ രാജ്യങ്ങൾ ഇതിനോടകം വലിയ പുരോഗതി കൈവരിച്ചിട്ടുണ്ട്.
വിമാനയാത്രയ്ക്കും റോഡ് ഗതാഗതത്തിനും പുറമെ സുരക്ഷിതവും വേഗതയേറിയതുമായ റെയിൽവേ കൂടി വരുന്നതോടെ ഗൾഫ് തലസ്ഥാനങ്ങൾക്കിടയിലുള്ള യാത്ര കൂടുതൽ സുഗമമാകും. ചരക്ക് നീക്കം എളുപ്പമാകുന്നതോടെ പ്രാദേശിക വ്യാപാരം ശക്തിപ്പെടുകയും ജിസിസി രാജ്യങ്ങൾ തമ്മിലുള്ള സാമ്പത്തിക സഹകരണം വർദ്ധിക്കുകയും ചെയ്യും.
അടിസ്ഥാന സൗകര്യ വികസനത്തിന് ജിസിസി രാജ്യങ്ങൾ നൽകുന്ന മുൻഗണനയുടെ തെളിവാണ് ഈ പദ്ധതിയെന്ന് ജാസിം അൽ ബുദൈവി പറഞ്ഞു. ഈ സംയോജിത ഗതാഗത സംവിധാനം രാജ്യങ്ങൾ തമ്മിലുള്ള സഹകരണത്തിന്റെ പ്രതീകമാണെന്നും മേഖലയിലെ ദീർഘകാല വികസന ലക്ഷ്യങ്ങൾ കൈവരിക്കാൻ ഇത് സഹായിക്കുമെന്നും അദ്ദേഹം കൂട്ടിച്ചേർത്തു.
പദ്ധതി യാഥാർത്ഥ്യമാകുന്നതോടെ പ്രവാസികൾ ഉൾപ്പെടെയുള്ള ദശലക്ഷക്കണക്കിന് യാത്രക്കാർക്ക് ഗൾഫ് രാജ്യങ്ങൾക്കിടയിൽ കുറഞ്ഞ ചെലവിൽ യാത്ര ചെയ്യാൻ സാധിക്കും.
