Silver: വെള്ളി വിലയും മുന്നിൽ തന്നെ, 200 ഡോളറിലേക്ക് കുതിക്കുമോ?
Silver Rate Prediction: വെള്ളിക്ക് സ്വർണത്തിനെപ്പോലെ സുരക്ഷിത നിക്ഷേപമെന്ന നിലയിലും, സോളാർ പാനൽ, ഇലക്ട്രിക് വാഹനങ്ങൾ, സെമികണ്ടക്ടറുകൾ തുടങ്ങിയ മേഖലകളിൽ ഉപയോഗിക്കുന്ന വ്യവസായ ലോഹമെന്ന നിലയിലും ആവശ്യക്കാർ ഉണ്ട്.
കേരളത്തിൽ സ്വർണത്തോടൊപ്പം വെള്ളി വിലയും മുന്നേറുകയാണ്. ഒരു കിലോയ്ക്ക് നാല് ലക്ഷം കടന്ന് കുതിച്ച വിലയിൽ പിന്നീട് വലിയൊരു ഇടിവ് സംഭവിച്ച്, രണ്ട് ലക്ഷത്തിലേക്ക് താഴ്ന്നിരുന്നു. എന്നാൽ വെള്ളി ലോഹം വിപണിയിൽ വീണ്ടും കുതിപ്പ് തുടർന്നു, നിലവിൽ ഗ്രാമിന് മുന്നൂറ് രൂപയും കിലോയ്ക്ക് മൂന്ന് ലക്ഷവുമാണ് വില.
വെള്ളി വില ഇനിയും കൂടുമെന്നാണ് സാമ്പത്തിക വിദഗ്ധരുടെ അഭിപ്രായം. 2026ൽ അന്താരാഷ്ട്ര വിപണിയിൽ വെള്ളി വില ഔൺസിന് 200 ഡോളർ വരെ ഉയർന്നേക്കാമെന്ന പ്രവചനങ്ങളും സാമ്പത്തിക വിദഗ്ധർക്കിടയിൽ ചർച്ചയാകുന്നുണ്ട്.
ഒരു ഘട്ടത്തിൽ ഔൺസിന് 121 ഡോളർ വരെ ഉയർന്ന വെള്ളി, പിന്നീട് ഏതാനും ദിവസങ്ങൾക്കുള്ളിൽ 30 ശതമാനത്തിലധികമാണ് ഇടിഞ്ഞത്. ഫെബ്രുവരി തുടക്കത്തിൽ ഏകദേശം 88 ഡോളർ നിലവാരത്തിൽ എത്തി. അമേരിക്കൻ ഫെഡറൽ റിസർവ് ചെയർമാനായി പുതിയ പേര് പ്രഖ്യാപിച്ചതോടെ ഡോളർ ശക്തിപ്രാപിക്കുകയും സുരക്ഷിത നിക്ഷേപങ്ങളിലേക്കുള്ള ആവശ്യം കുറഞ്ഞതുമാണ് ഇടിവിന് കാരണമായത്.
ഇപ്പോൾ കാണുന്ന 88 ഡോളറിൽ നിന്ന് 200ൽ എത്താൻ വെള്ളിയുടെ വില 125 ശതമാനത്തിലധികം ഉയരേണ്ടിവരും. മൂല്യപ്പെരുപ്പ ഭീതിയും കേന്ദ്രബാങ്കുകളിലെ അനിശ്ചിതത്വവും വീണ്ടും ഉയർന്നാലോ, റീട്ടെയിൽ നിക്ഷേപകരുടെ വലിയ തോതിലുള്ള വാങ്ങൽ സംഭവിച്ചാലോ, വിതരണ കുറവ് നേരിട്ടാലോ മാത്രമേ ഇത്രയധികം ഉയരുകയുള്ളൂ.
വെള്ളിക്ക് സ്വർണത്തിനെപ്പോലെ സുരക്ഷിത നിക്ഷേപമെന്ന നിലയിലും, സോളാർ പാനൽ, ഇലക്ട്രിക് വാഹനങ്ങൾ, സെമികണ്ടക്ടറുകൾ തുടങ്ങിയ മേഖലകളിൽ ഉപയോഗിക്കുന്ന വ്യവസായ ലോഹമെന്ന നിലയിലും ആവശ്യക്കാർ ഉണ്ട്. ഈ ഡിമാൻഡാണ് വെള്ളിയിൽ സ്വർണത്തേക്കാൾ ഉയർച്ച വരുത്തുന്നത്. (Image Credit: Getty Images)
