ഗ്യാസ്ട്രബിളും ദഹനക്കുറവും അലട്ടുന്നുണ്ടോ? ഈ നാടൻ രീതി ഒന്ന് പരീക്ഷിച്ച് നോക്കൂ!
How Ajwain and Black Salt Water Aids Digestion: ഭക്ഷണം കഴിച്ചതിന് ശേഷം നമ്മളിൽ പലർക്കും അസ്വസ്ഥതകൾ അനുഭവപ്പെടാറുണ്ട്. ദഹനക്കുറവോ ഗ്യാസ്ട്രബിളോ ആണ് മിക്കപ്പോഴും വില്ലനാകാറുള്ളത്. ഇതിന് പരിഹാരമായി കാലങ്ങളായി നമ്മൾ ഉപയോഗിച്ചുവരുന്ന ഒരു മികച്ച ഒറ്റമൂലിയാണ് അയമോദകം. അയമോദകം ഇട്ട് തിളപ്പിച്ച വെള്ളം. ദഹനപ്രശ്നങ്ങൾക്ക് വളരെ പെട്ടെന്ന് ആശ്വാസം നൽകും. ഇതിനൊപ്പം ഒരു നുള്ള് ഇന്തുപ്പ് കൂടി ചേർത്താൽ ഫലം ഇരട്ടിയാകുമെന്ന് പഠനങ്ങൾ പറയുന്നു.
ദഹനപ്രക്രിയ എളുപ്പമാക്കാനും വയറ്റിലെ അസ്വസ്ഥതകൾ മാറ്റാനും അയമോദകം സഹായിക്കും. ഒരു ടേബിൾ സ്പൂൺ അയമോദകം വെള്ളത്തിലിട്ട് നന്നായി തിളപ്പിച്ച് കുടിക്കുന്നത് ഗ്യാസ്ട്രബിൾ വേഗത്തിൽ കുറയ്ക്കാൻ സഹായിക്കും. ഈ പാനീയം ദിവസവും കുടിക്കുന്നത് ശീലമാക്കിയാൽ ദഹനം കൂടുതൽ മെച്ചപ്പെടുകയും ചെയ്യും. (Image Credit source: Getty Images)
അയമോദകത്തിൽ ധാരാളമായി അടങ്ങിയിരിക്കുന്ന തൈമോൾ എന്ന ഘടകം ദഹനം വേഗത്തിലാക്കുന്നു. ആമാശയത്തിലെ ദഹന രസങ്ങളുടെ ഉൽപ്പാദനം വർധിപ്പിച്ച് ഭക്ഷണത്തെ വേഗത്തിൽ വിഘടിപ്പിക്കാൻ ഇത് ഏറെ സഹായിക്കുന്നു. ഭക്ഷണം അമിതമായി കഴിച്ചതിന് ശേഷമുള്ള വയറിലെ കനം കുറയ്ക്കാനും ഈ പാനീയം വളരെ ഉത്തമമാണ്.
അയമോദക വെള്ളത്തിൽ ഒരു നുള്ള് ഇന്തുപ്പ് കൂടി ചേർത്ത് കുടിച്ചാൽ ദഹനം കുറച്ചുകൂടി എളുപ്പത്തിലാകും. ഇതിനായി തലേദിവസം രാത്രി അയമോദകം വെള്ളത്തിൽ കുതിർക്കാൻ വെച്ച ശേഷം പിറ്റേന്ന് അതിൽ അല്പം ഇന്തുപ്പ് ചേർത്ത് കുടിക്കാവുന്നതാണ്. വയറ്റിലെ ദോഷകരമായ ബാക്ടീരിയകളെയും സൂക്ഷ്മാണുക്കളെയും എളുപ്പത്തിൽ നശിപ്പിക്കാൻ ഇന്തുപ്പിന് പ്രത്യേക കഴിവുണ്ട്.
ദഹനത്തിന് സഹായിക്കുന്നതിനൊപ്പം സോഡിയം, പൊട്ടാസ്യം തുടങ്ങി ശരീരത്തിന് എപ്പോഴും ആവശ്യമുള്ള പ്രധാന ധാതുക്കളും ഇന്തുപ്പിലൂടെ ധാരാളമായി ലഭിക്കുന്നു. വിശപ്പില്ലായ്മ അനുഭവപ്പെടുമ്പോഴോ അല്ലെങ്കിൽ അധികമായി ഭക്ഷണം കഴിച്ചതിന് ശേഷം വയറിന് കനം തോന്നുമ്പോഴോ അയമോദകവും ഇന്തുപ്പും ചേർത്തുള്ള ഈ പ്രത്യേക പാനീയം തയ്യാറാക്കി കുടിക്കാവുന്നതാണ്..
സ്ഥിരമായി അസിഡിറ്റി, തുടർച്ചയായ നെഞ്ചെരിച്ചിൽ, ഉയർന്ന രക്തസമ്മർദ്ദം, മറ്റ് ഗുരുതരമായ ഉദരരോഗങ്ങൾ എന്നിവ ഉള്ളവർ ഡോക്ടറുടെ നിർദ്ദേശം തേടിയ ശേഷം മാത്രമേ ഇത് കുടിക്കാൻ പാടുള്ളൂ. അപൂർവ്വമായി ചിലർക്ക് ഇത് ചെറിയ തോതിലുള്ള അലർജിക്കും കാരണമാകാനും സാധ്യതയുണ്ട്. അതിനാൽ ഇത്തരം കാര്യങ്ങളിൽ പ്രത്യേക ശ്രദ്ധ നൽകേണ്ടതുണ്ട്.
