Kerala Toxic Mango: ഇത് വിഷമാങ്ങയോ? യഥാർത്ഥ മാങ്ങയെ വെല്ലുന്ന ഈ മലയാളിപ്പഴത്തെ സൂക്ഷിക്കണം
Tips to Identify the original mango : കേരളത്തിൽ 'വിഷമാങ്ങ' എന്നൊരു പ്രത്യേക ഇനമില്ല. എന്നാൽ മാങ്ങയാണെന്ന് തെറ്റിദ്ധരിച്ച് ഒതളങ്ങ കഴിക്കുന്നത് വലിയ ദുരന്തത്തിന് കാരണമാകും.
പുഴയോരങ്ങളിൽ കാണപ്പെടുന്ന മഞ്ഞ കലർന്ന പച്ചനിറത്തിലുള്ള ഒരു പഴം 'വിഷമാങ്ങ' എന്ന പേരിൽ സോഷ്യൽ മീഡിയയിൽ വ്യാപകമായി പ്രചരിക്കുകയാണ്. ഇത് കഴിച്ചാൽ മരണം ഉറപ്പാണെന്ന തരത്തിലുള്ള വീഡിയോകൾ കണ്ട് പലരും ആശങ്കയിലാണ്. എന്നാൽ വസ്തുതയെന്തെന്നാൽ, ഇത് മാങ്ങയല്ല; മറിച്ച് അതീവ അപകടകാരിയായ ഒതളങ്ങയാണ്.
കാഴ്ചയിൽ മാങ്ങയോടോ ചെറിയ ആപ്പിളിനോടോ സാമ്യമുള്ളതുകൊണ്ടാണ് ഇതിനെ 'വിഷമാങ്ങ' എന്ന് പലരും തെറ്റായി വിളിക്കുന്നത്. ശാസ്ത്രീയമായി മാങ്ങ 'അനാകാർഡിയേസീ' കുടുംബത്തിൽ പെടുമ്പോൾ, ഒതളങ്ങ 'അപ്പോസൈനേസീ' കുടുംബത്തിലാണ് ഉൾപ്പെടുന്നത്. ഇത് മാരക വിഷമുള്ള അരളി ചെടിയുടെ ഒരു വകഭേദമാണ്.
ലോകമെമ്പാടും 'സൂയിസൈഡ് ട്രീ' എന്നാണ് ഒതളങ്ങ അറിയപ്പെടുന്നത്. ഇതിന്റെ വിത്തിൽ അടങ്ങിയിരിക്കുന്ന 'സെർബെറിൻ' (Cerberin) എന്ന പദാർത്ഥം ഹൃദയമിടിപ്പിന്റെ താളം തെറ്റിക്കുകയും മരണത്തിന് കാരണമാവുകയും ചെയ്യും.
സാധാരണ പോസ്റ്റ്മോർട്ടം പരിശോധനകളിൽ പോലും ഈ വിഷം കണ്ടെത്തുക പ്രയാസമാണെന്നതാണ് ഇതിനെ കൂടുതൽ അപകടകാരിയാക്കുന്നത്. കേരളത്തിലെ കായലോരങ്ങളിലും പുഴയോരങ്ങളിലും ചതുപ്പ് നിലങ്ങളിലും ഇവ ധാരാളമായി വളരുന്നു. വെള്ളത്തിലൂടെയാണ് ഇതിന്റെ വിത്തുകൾ വ്യാപിക്കുന്നത്.
കേരളത്തിൽ 'വിഷമാങ്ങ' എന്നൊരു പ്രത്യേക ഇനമില്ല. എന്നാൽ മാങ്ങയാണെന്ന് തെറ്റിദ്ധരിച്ച് ഒതളങ്ങ കഴിക്കുന്നത് വലിയ ദുരന്തത്തിന് കാരണമാകും. അതിനാൽ, കൃത്യമായി തിരിച്ചറിയാൻ കഴിയാത്ത കാട്ടുപഴങ്ങൾ ഭക്ഷിക്കാതിരിക്കുക എന്നതാണ് ഏറ്റവും വലിയ മുൻകരുതൽ.
