‘ദൈവ’ത്തെ മറികടക്കാനായില്ല! സച്ചിന്റെ റെക്കോർഡിന് അ‌രികെ വീണ് ​വൈഭവ് സൂര്യവംശി

Vaibhav Suryavanshi Historic Achievement Duleep Trophy

ക്രിക്കറ്റ് ദൈവം എന്ന് വിശേഷിപ്പിക്കപ്പെടുന്ന ലോക ക്രിക്കറ്റിലെ തന്നെ ഇതിഹാസ താരമായ സാക്ഷാൽ സച്ചിൻ തെൻഡുൽക്കറുടെ 36 വർഷം പഴക്കമുള്ള റെക്കോർഡിന് 8 റൺ അ‌കലെ വീണ് ​വൈഭവ് സൂര്യവംശി. ദുലീപ് ട്രോഫി സെമിഫൈനലിൽ സെൻട്രൽ സോണിനെതിരെ ഈസ്റ്റ് സോണിനായി കളിച്ച 15-കാരനായ വൈഭവ് സൂര്യവംശി 81 പന്തുകളിൽ നിന്ന് 92 റൺസ് നേടി പുറത്തായി. ഈ ​മത്സരത്തിൽ സെഞ്ച്വറി നേടിയിരുന്നെങ്കിൽ ദുലീപ് ട്രോഫിയിൽ സെഞ്ചുറി നേടുന്ന ഏറ്റവും പ്രായം കുറഞ്ഞ താരം എന്ന സച്ചിന്റെ റെക്കോഡ് വൈഭവിന് മറികടക്കാമായിരുന്നു.

ഇന്ത്യൻ ക്രിക്കറ്റിലെ പുതിയ കൗമാര വിസ്മയമായ ​വൈഭവിന് ഈ മത്സരത്തിൽ ബാറ്റ് ചെയ്യുമ്പോൾ 15 വർഷവും 157 ദിവസവുമാണ് പ്രായം. ദുലീപ് ട്രോഫിയിൽ സെഞ്ചുറി നേടുന്ന ഏറ്റവും പ്രായം കുറഞ്ഞ താരം എന്ന റെക്കോഡ് സച്ചിൻ സ്വന്തമാക്കിയത് 1990/91 സീസണിൽ 17 വർഷവും 262 ദിവസവും പ്രായമുള്ളപ്പോഴായിരുന്നു.

Also Read: ധോണി 25% ഓഹരി ചോദിച്ചോ? ചെന്നൈ സൂപ്പർ കിംഗ്സ് ക്യാമ്പിൽ സംഭവിക്കുന്നത് എന്ത്?

സച്ചിന്റെ ഈ റെക്കോഡ് മറികടക്കുന്നതിന്റെ തൊട്ടടുത്തുവരെ എത്തിയെങ്കിലും 92-ൽ നിൽക്കെ ഹർഷ് ദുബെയുടെ പന്തിൽ അർഷാദ് ഖാന് ക്യാച്ച് നൽകി ​വൈഭവ് പുറത്താവുകയായിരുന്നു. ഔട്ടായതിന്റെ നിരാശ പ്രകടിപ്പിച്ച് തന്നെയാണ് ​വൈഭവ് കളംവിട്ടത്. പുറത്തായതിന് പിന്നാലെ ബാറ്റ് നിലത്തടിക്കുന്ന വൈഭവിന്റെ ദൃശ്യങ്ങൾ പുറത്തുവന്നിട്ടുണ്ട്. എന്നാൽ സച്ചിന്റെ റെക്കോഡിന് തൊട്ടരികെ വീണെങ്കിലും 57 വർഷം പഴക്കമുള്ള മറ്റൊരു റെക്കോർഡ് ഈ മത്സരത്തിൽ തകർക്കാൻ ​വൈഭവിന് കഴിഞ്ഞു.

ദുലീപ് ട്രോഫി ചരിത്രത്തിൽ അർധസെഞ്ചുറി നേടുന്ന ഏറ്റവും പ്രായം കുറഞ്ഞ താരം എന്ന നേട്ടം ഇനി ​വൈഭവ് സൂര്യവംശിയുടെ പേരിലാണ്. 1969-ൽ 16 വർഷവും 23 ദിവസവും പ്രായമുള്ളപ്പോൾ അർധസെഞ്ചുറി നേടിയ ലക്ഷ്മൺ സിങ്ങിന്റെ റെക്കോഡാണ് സൂര്യവംശി മറികടന്നത്. 15 വർഷവും 157 ദിവസവും പ്രായമുള്ളപ്പോഴാണ് വൈഭവിന്റെ ഈ നേട്ടം.

മത്സരത്തിൽ 40 റൺസിൽ നിൽക്കെ വൈഭവിന്റെ ക്യാച്ച് സെൻട്രൽ സോൺ താരങ്ങൾ കൈവിട്ടിരുന്നു. എന്നാൽ അ‌തിലൊന്നും ഭയന്നു നിൽക്കാതെ, ബാറ്റുവീശിയ ​വൈഭവ്, കഴിഞ്ഞയാഴ്ച ശ്രീലങ്കയ്ക്കെതിരെ ഇന്ത്യൻ ടെസ്റ്റ് ടീമിൽ അരങ്ങേറ്റം കുറിച്ച സാരൻഷ് ജെയിനെ സിക്‌സറിന് പറത്തിക്കൊണ്ട് വെറും 42 പന്തുകളിൽ നിന്ന് അർധസെഞ്ചുറി തികച്ചു.

സഹ ഓപ്പണർ അഭിമന്യു ഈശ്വരനൊപ്പം ഓപ്പണിങ് വിക്കറ്റിൽ 162 റൺസിന്റെ മികച്ച കൂട്ടുകെട്ട് ​വൈഭവ് പടുത്തുയർത്തി. 81 പന്തുകൾ നേരിട്ട്, ഏഴ് വീതം സിക്‌സും ഫോറും സഹിതം 92 റൺസ് ആണ് ഈ മത്സരത്തിൽ ​വൈഭവ് നേടിയത്. ഇത്തവണ സച്ചിന്റെ റെക്കോഡ് മറികടക്കാനായില്ലെങ്കിലും അ‌തിനുള്ള ‘ബാല്യം’ ഇനിയും ബാക്കിയുണ്ട്.

ലിറ്റിൽ മാസ്റ്റർ എന്ന വിളിപ്പേരിലും അ‌റിയപ്പെട്ടിരുന്ന സച്ചിന്റെ ഈ ദുലീപ് ട്രോഫി സെഞ്ച്വറി റെക്കോഡ് മറികടക്കാൻ രണ്ട് വർഷത്തിലേറെ സമയം ​വൈഭവിന് ബാക്കിയുണ്ട്. നിലവിൽ 15 വയസ് പിന്നിട്ട ​വൈഭവിന് സച്ചിന്റെ റെക്കോഡ് മറികടക്കാൻ 17 വയസ് 261 ദിവസം വരെ അ‌വസരമുണ്ട് എന്ന് സാങ്കേതികമായി പറയാനാകും.

English Summary

Vaibhav Suryavanshi falls 8 runs short of Sachin Tendulkar’s 36-year-old record. 15-year-old Vaibhav Suryavanshi, playing for East Zone against Central Zone in the Duleep Trophy semi-final, was dismissed for 92 runs off 81 balls. If he had scored a century in this match, Vaibhav could have broken Sachin’s record of becoming the youngest player to score a century in the Duleep Trophy.