Gulf CBSE exam : പശ്ചിമേഷ്യൻ പ്രതിസന്ധി: ഗൾഫ് രാജ്യങ്ങളിലെ സിബിഎസ്ഇ പന്ത്രണ്ടാം ക്ലാസ് പരീക്ഷകൾ റദ്ദാക്കി
CBSE Cancels Class 12 Board Exams : മേഖലയിലെ സുരക്ഷാ സാഹചര്യം മുൻനിർത്തി സ്കൂളുകളിൽ നിന്നും അധികൃതരിൽ നിന്നും ലഭിച്ച നിർദ്ദേശങ്ങൾ പരിഗണിച്ചാണ് ഈ നടപടി.
Representational Image
ദുബായ്: പശ്ചിമേഷ്യയിൽ നിലനിൽക്കുന്ന സംഘർഷാവസ്ഥ കണക്കിലെടുത്ത് ഗൾഫ് മേഖലയിലെ സിബിഎസ്ഇ പന്ത്രണ്ടാം ക്ലാസ് ബോർഡ് പരീക്ഷകൾ റദ്ദാക്കി. ഞായറാഴ്ച പുറത്തിറക്കിയ ഔദ്യോഗിക സർക്കുലറിലാണ് സെൻട്രൽ ബോർഡ് ഓഫ് സെക്കൻഡറി എജ്യുക്കേഷൻ ഈ നിർണ്ണായക തീരുമാനം അറിയിച്ചത്.
ബഹ്റൈൻ, ഇറാൻ, കുവൈത്ത്, ഒമാൻ, ഖത്തർ, സൗദി അറേബ്യ, യുഎഇ എന്നീ രാജ്യങ്ങളിലെ സിബിഎസ്ഇ സ്കൂളുകളെയാണ് ഈ തീരുമാനം ബാധിക്കുക. 2026 മാർച്ച് 16 മുതൽ ഏപ്രിൽ 10 വരെ നടത്താനിരുന്ന എല്ലാ പരീക്ഷകളും ഇതോടെ റദ്ദാക്കപ്പെട്ടു. നേരത്തെ മാറ്റിവെച്ചിരുന്ന പരീക്ഷകളും ഇനി നടത്തില്ലെന്ന് സിബിഎസ്ഇ വ്യക്തമാക്കിയിട്ടുണ്ട്.
മേഖലയിലെ സുരക്ഷാ സാഹചര്യം മുൻനിർത്തി സ്കൂളുകളിൽ നിന്നും അധികൃതരിൽ നിന്നും ലഭിച്ച നിർദ്ദേശങ്ങൾ പരിഗണിച്ചാണ് ഈ നടപടി. പത്താം ക്ലാസ് പരീക്ഷകൾ ബോർഡ് നേരത്തെ തന്നെ റദ്ദാക്കിയിരുന്നു. എന്നാൽ പന്ത്രണ്ടാം ക്ലാസ് പരീക്ഷാഫലം ഉപരിപഠനത്തിന് ഏറെ നിർണ്ണായകമായതിനാൽ വിദ്യാർത്ഥികളും രക്ഷിതാക്കളും വലിയ ആശങ്കയിലാണ്.
വിദ്യാർത്ഥികളുടെ പരീക്ഷാഫലം സംബന്ധിച്ച അന്തിമ തീരുമാനം പിന്നീട് അറിയിക്കുമെന്നാണ് ബോർഡ് വ്യക്തമാക്കുന്നത്. എങ്കിലും, സ്കൂളുകളിൽ നേരത്തെ നടന്ന മോഡൽ പരീക്ഷകളുടെയും ഇന്റേണൽ അസസ്മെന്റുകളുടെയും ഫലം അടിസ്ഥാനമാക്കിയായിരിക്കും മൂല്യനിർണ്ണയം നടക്കുക എന്നാണ് സൂചന.
