Holidays in UAE: ആറ് ദിവസം വരെ അവധി, ബലിപെരുന്നാളിനുള്ള ഒരുക്കങ്ങൾ നേരത്തേ ആരംഭിച്ച് പ്രവാസികൾ
UAE Public Holidays 2026 related to Eid Al Adha: അവധി നീളാൻ സാധ്യതയുള്ളതിനാൽ പ്രവാസികൾ ഉൾപ്പെടെയുള്ളവർ നാട്ടിലേക്കുള്ള യാത്രകൾക്കും വിനോദയാത്രകൾക്കുമായുള്ള തയ്യാറെടുപ്പുകൾ നേരത്തെ തന്നെ തുടങ്ങിക്കഴിഞ്ഞു. വിമാന ടിക്കറ്റുകൾക്കും ഹോട്ടൽ ബുക്കിങ്ങുകൾക്കും വരും ദിവസങ്ങളിൽ ആവശ്യക്കാർ ഏറുമെന്നാണ് ട്രാവൽ ഏജൻസികൾ നൽകുന്ന സൂചന.
Eid Al Adha 2026 holiday
ദുബായ്: യുഎഇയിൽ ഈ വർഷത്തെ ബലിപെരുന്നാളിനോടനുബന്ധിച്ച് (ഈദ് അൽ അദ്ഹ) താമസക്കാർക്ക് ആറ് ദിവസം വരെ നീണ്ടുനിൽക്കുന്ന ദീർഘമായ അവധി ലഭിക്കാൻ സാധ്യതയെന്നു റിപ്പോർട്ട്. മേയ് അവസാന വാരമെത്തുന്ന പെരുന്നാൾ ദിനങ്ങൾ വാരാന്ത്യ അവധിക്കൊപ്പം ചേർന്നു വരുന്നതാണ് ആഘോഷങ്ങൾക്ക് ഇരട്ടി മധുരം പകരുന്നത്.
ജ്യോതിശാസ്ത്ര കണക്കുകൂട്ടലുകൾ പ്രകാരം അവധി ദിനങ്ങൾ മേയ് 26, ചൊവ്വാഴ്ച അറഫാ ദിനത്തിൽ ആരംഭിക്കും. തുടർന്ന് മേയ് 27 മുതൽ മേയ് 29 വരെ ബലിപെരുന്നാൾ അവധി ആയിരിക്കുമെന്നാണ് വിലയിരുത്തൽ. പിന്നെയുള്ള രണ്ടു ദിവസങ്ങൾ വാരാന്ത്യ അവധി കൂടി ആകുമ്പോൾ ആകെ ആറുദിവസത്തെ അവധി ലഭിക്കും. എന്നാൽ ചന്ദ്രദർശനത്തിന്റെ അടിസ്ഥാനത്തിൽ ഔദ്യോഗിക പ്രഖ്യാപനം വന്നതിന് ശേഷം മാത്രമേ അവധി ദിനങ്ങളിൽ അന്തിമ തീരുമാനമാകൂ.
യാത്രാത്തിരക്ക് വർദ്ധിക്കുന്നു
അവധി നീളാൻ സാധ്യതയുള്ളതിനാൽ പ്രവാസികൾ ഉൾപ്പെടെയുള്ളവർ നാട്ടിലേക്കുള്ള യാത്രകൾക്കും വിനോദയാത്രകൾക്കുമായുള്ള തയ്യാറെടുപ്പുകൾ നേരത്തെ തന്നെ തുടങ്ങിക്കഴിഞ്ഞു. വിമാന ടിക്കറ്റുകൾക്കും ഹോട്ടൽ ബുക്കിങ്ങുകൾക്കും വരും ദിവസങ്ങളിൽ ആവശ്യക്കാർ ഏറുമെന്നാണ് ട്രാവൽ ഏജൻസികൾ നൽകുന്ന സൂചന.
ബലിപെരുന്നാളിന് പിന്നാലെ യുഎഇയിൽ വരാനിരിക്കുന്ന പ്രധാന പൊതു അവധികളിൽ പ്രധാനം ജൂൺ 17നുള്ള ഹിജ്റ പുതുവർഷം ആണ്. പിന്നെയുള്ളത് ഡിസംബർ 2, 3 തിയതികളിലെ യുഎഇ ദേശീയ ദിനം അവധിയുണ്ടാകും. വാരാന്ത്യ അവധി കൂടി ചേർത്ത് നാല് ദിവസത്തെ അവധിയായിരിക്കും ഇതിനോടനുബന്ധിച്ച് ലഭിക്കുക.
