8th Pay Commission: കുടിശ്ശിക 15 ലക്ഷം വരെ, ശമ്പളത്തിലും വൻ വർദ്ധനവ്, അക്കൗണ്ടിൽ എത്ര കിട്ടും?

പ്രതീകാത്മക ചിത്രം

എട്ടാം ശമ്പളകമ്മീഷന് വേണ്ടിയുള്ള കാത്തിരിപ്പ് നീളുംതോറും കേന്ദ്രസർക്കാർ ജീവനക്കാരുടെ ആശങ്കയും ഉയരുകയാണ്. പുതിയ ശമ്പളപരിഷ്കരണത്തിനുള്ള ചർച്ചകൾ സജീവമായി തുടരുകയാണ്. ഇത്തവണ അടിസ്ഥാനശമ്പളത്തിൽ വൻ വർദ്ധനവ് ഉണ്ടാകുമെന്നാണ് റിപ്പോർട്ടുകൾ. കൂടാതെ കുടുംബയൂണിറ്റ്, അലവൻസുകൾ തുടങ്ങിയവയിലും മാറ്റങ്ങൾ പ്രതീക്ഷിക്കുന്നുണ്ട്. 2026 ജനുവരി 1 മുതൽ പ്രാബല്യത്തോടെ അടുത്ത 14 മുതൽ 18 മാസത്തിനുള്ളിൽ ശമ്പളപരിഷ്കരണം നടപ്പിലാക്കിയേക്കുമെന്നാണ് സൂചന. അതിനനുസരിച്ച് കുടിശ്ശികയും കൂടും. കണക്കുകൾ പ്രകാരം ലക്ഷങ്ങളാണ് ജീവനക്കാർക്ക് കിട്ടാൻ പോകുന്നത്.

കുടിശ്ശിക എത്ര?

ജീവനക്കാർക്ക് ഏകദേശം 20 മാസത്തെ കുടിശ്ശിക കണക്കാക്കിയാൽ ഏകദേശം 3.6 ലക്ഷം രൂപ മുതൽ 15 ലക്ഷം രൂപ വരെ ലഭിക്കാൻ സാധ്യതയുണ്ട്. ഫിറ്റ്മെന്റ് ഘടകം, ശമ്പള ഗ്രേഡ്, തീർപ്പാക്കാത്ത പരിഷ്കരണങ്ങളുടെ ദൈർഘ്യം എന്നിവയെ അടിസ്ഥാനമാക്കിയായിരിക്കും അന്തിമ തുക നിർണ്ണയിക്കുക.

ഉയർന്ന അടിസ്ഥാന ശമ്പളം, പ്രത്യേകിച്ച് 50,000 രൂപയിൽ കൂടുതൽ, വാങ്ങുന്ന ജീവനക്കാർക്കാണ് ഇതി? ഏറ്റവും കൂടുതൽ തുക ലഭിക്കുക. ഉദാഹരണത്തിന്, 18,000 രൂപ അടിസ്ഥാന ശമ്പളമുള്ള ജീവനക്കാർക്ക് 3.6 ലക്ഷം മുതൽ 5.65 ലക്ഷം രൂപ വരെ കുടിശ്ശിക ഇനത്തിൽ ലഭിക്കാം. അതേസമയം 47,600 രൂപ ശമ്പളം വാങ്ങുന്ന ജീവനക്കാർക്ക് 15 ലക്ഷം രൂപയോളം കുടിശ്ശിക ലഭിക്കാൻ സാധ്യതയുണ്ട്.

ALSO READ: ശമ്പളം കൂടും, ഡിഎ ഫോർമുലയും മാറും; 8-ാം ശമ്പള കമ്മീഷനിൽ എന്തെല്ലാം പ്രതീക്ഷിക്കാം?

ശമ്പളത്തിലും വൻ വർദ്ധനവ്

3 മുതൽ 3.25 വരെയുള്ള ഫിറ്റ്മെന്റ് ഘടകമാണ് ജീവനക്കാരുടെ മറ്റൊരു പ്രധാന ആവശ്യം. ഇത് അംഗീകരിക്കപ്പെട്ടാൽ, കുറഞ്ഞ അടിസ്ഥാന ശമ്പളം 18,000 രൂപയിൽ നിന്ന് ഏകദേശം 54,000 രൂപയായി കുത്തനെ ഉയരും. ഇത് മൊത്ത ശമ്പളത്തിൽ ഗണ്യമായ വർദ്ധനവ് ഉണ്ടാക്കും. അതേസമയം കമ്മീഷൻ റിപ്പോർട്ട് സമർപ്പിക്കുകയും അംഗീകരിക്കുകയും ചെയ്തുകഴിഞ്ഞാൽ മാത്രമേ അന്തിമ രൂപം വ്യക്തമാകൂ. എന്നിരുന്നാലും ശമ്പളത്തിലെ വർദ്ധനവ് ഏകദേശം ഉറപ്പിച്ചുകഴിഞ്ഞതായാണ് വിവരം.