8th Pay Commission: ഡി.എ കണക്കാക്കുന്ന രീതി മാറ്റണം, ആവശ്യമുന്നയിച്ച് ജീവനക്കാർ, കമ്മീഷന്റെ തീരുമാനം എന്ത്?

പ്രതീകാത്മക ചിത്രം

രാജ്യത്തെ ദശലക്ഷക്കണക്കിന് കേന്ദ്രസർക്കാർ ജീവനക്കാരും ആകാംക്ഷയോടെ കാത്തിരിക്കുന്ന ഒന്നാണ് എട്ടാം ശമ്പള പരിഷ്കരണം. കമ്മിഷന്റെ പ്രവർത്തനങ്ങൾ പുരോഗമിക്കുകയാണ്. ജീവനക്കാരുടെ തങ്ങളുടെ ആവശ്യങ്ങൾ കമ്മീഷന്റെ മുമ്പാകെ സമർപ്പിച്ചിട്ടുണ്ട്. അതിൽ റെയിൽവേ ജീവനക്കാർ ഉന്നയിച്ച ആവശ്യമാണ് ഇപ്പോൾ ചർച്ചയാവുന്നത്. ശമ്പള സ്കെയിലുകൾ, ആനുകൂല്യങ്ങൾ, വിരമിക്കൽ പദ്ധതികൾ എന്നിവയിൽ സുപ്രധാന മാറ്റങ്ങളാണ് ഇന്ത്യൻ റെയിൽവേ ടെക്നിക്കൽ സൂപ്പർവൈസേഴ്‌സ് അസോസിയേഷൻ നിർദേശിച്ചിട്ടുള്ളത്.

ഡിഎ ഫോർമുല മാറുമോ?

പഴയ പെൻഷൻ പദ്ധതി പുനരാരംഭിക്കുക, അടിസ്ഥാന ശമ്പളത്തിന്റെ 40% വരെ നാല് തലങ്ങളിലുള്ള വീട്ടു വാടക അലവൻസ് നൽകുക, ഡിഎ കണക്കാക്കുന്നതിന് പ്രത്യേക സിപിഐ, ഉന്നത വിദ്യാഭ്യാസ അലവൻസുകൾ എന്നിവയാണ് ജീവനക്കാരുടെ പ്രധാന ആവശ്യങ്ങൾ. അവയിൽ ഏറ്റവും പ്രധാനം ഡിഎ കണക്കാക്കുന്ന രീതി മാറ്റണമെന്നുള്ളതാണ്. ജീവനക്കാരുടെയും പെൻഷൻകാരുടെയും ശമ്പളത്തിന്റെയും പെൻഷന്റെയും നിർണായക ഘടകമായതിനാൽ, പണപ്പെരുപ്പ ഡാറ്റയെ അടിസ്ഥാനമാക്കിയാണ് ഡിഎ പരിഷ്കരിക്കുന്നത്. എന്നാൽ നിലവിലെ രീതി ഇന്നത്തെ കാലത്തെ യഥാർത്ഥ ജീവിതച്ചെലവിനെ പ്രതിഫലിപ്പിക്കുന്നില്ലെന്നാണ് ജീവനക്കാർ പറയുന്നത്.

വർഷങ്ങളായി ജീവിതച്ചെലവ് ഗണ്യമായി വർദ്ധിച്ചിട്ടും ഡിഎ കണക്കാക്കുന്നതിനുള്ള ഫോർമുലയിൽ മാറ്റം വരുത്തിയിട്ടില്ലെന്ന് അവർ ചൂണ്ടിക്കാട്ടുന്നു. കൂടാതെ,  ഫോർമുല ഉപയോഗിച്ച് അടിസ്ഥാന ശമ്പളവുമായി 50% ഡിഎ അലവൻസ് സംയോജിപ്പിക്കണമെന്നും ഐആർടിഎസ്എ ആവശ്യപ്പെട്ടിട്ടുണ്ട്.

വീട്ടുവാടക അലവൻസ് എങ്ങനെ?

വീട്ടു വാടക അലവൻസ് ഘടനയിൽ മാറ്റം വരുത്തണമെന്നും റെയിൽവേ ജീവനക്കാരുടെ സംഘടന ആവശ്യപ്പെട്ടിട്ടുണ്ട്. നിലവിൽ എച്ച്ആർഎ മൂന്ന് ഗ്രൂപ്പുകളായാണ് തിരിച്ചിട്ടുള്ളത്. എന്നാൽ എട്ടാം ശമ്പളപരിഷ്കരണത്തിൽ നഗര ജനസംഖ്യയെ അടിസ്ഥാനമാക്കിയുള്ള നാല്-ടയർ സംവിധാനം നടപ്പിലാക്കണമെന്നാണ് ഐആർടിഎസ്എ നിർദ്ദേശിച്ചത്.

ALSO READ: 18,000ത്തിൽ നിന്ന് ഒറ്റയടിക്ക് 69,000 രൂപയിലേക്ക്; ജീവനക്കാർ കാത്തിരിക്കേണ്ടത് എത്ര നാൾ?

50 ലക്ഷമോ അതിൽ കൂടുതലോ ജനസംഖ്യയുള്ള എ-ക്ലാസ് നഗരങ്ങൾക്ക് 40% + ഡിഎ എച്ച്ആർഎ, 20 ലക്ഷം മുതൽ 50 ലക്ഷം വരെ ജനസംഖ്യയുള്ള ബി-ക്ലാസ് നഗരങ്ങൾക്ക് 30% + ഡിഎ എച്ച്ആർഎ,  5 ലക്ഷം മുതൽ 20 ലക്ഷം വരെ ജനസംഖ്യയുള്ള സി-ക്ലാസ് നഗരങ്ങൾക്ക് 20% + ഡിഎ എച്ച്ആർഎ,  5 ലക്ഷത്തിൽ താഴെ ജനസംഖ്യയുള്ള ഡി-ക്ലാസ് നഗരങ്ങൾക്ക് 10% + ഡിഎ എച്ച്ആർഎ എന്നിവയാണ് നിർദ്ദേശിച്ച ഘടന.

മറ്റ് നിർദേശങ്ങൾ

യോഗ്യതയുള്ള എല്ലാ ജീവനക്കാർക്കും രാത്രി ഡ്യൂട്ടി അലവൻസിനുള്ള നിലവിലെ ഏഴാം ശമ്പള കമ്മീഷൻ ഫോർമുല മാറ്റമില്ലാതെ തുടരണമെന്ന ആവശ്യവും ഉയരുന്നുണ്ട്. രാത്രി ഡ്യൂട്ടി അലവൻസ് കണക്കാക്കുന്നതിനുള്ള നിലവിലെ ഫോർമുല, (ഡിഎ + അടിസ്ഥാന ശമ്പളം)/200 എന്നതാണ്.

കൂടാതെ, കുട്ടികളുടെ വിദ്യാഭ്യാസ അലവൻസിലും കാര്യമായ മാറ്റങ്ങൾ റെയിൽവേ ജീവനക്കാരുടെ അസോസിയേഷൻ നിർദ്ദേശിച്ചിട്ടുണ്ട്. കുട്ടികൾ ബിരുദാനന്തര പഠനം പൂർത്തിയാക്കുന്നതുവരെ തൊഴിലാളികൾക്ക് അലവൻസ് ലഭിക്കണമെന്ന് ആവശ്യപ്പെടുന്നു. രാജ്യത്തിന്റെ വർദ്ധിച്ചുവരുന്ന വിദ്യാഭ്യാസ ചെലവുകൾ കണക്കിലെടുക്കുമ്പോൾ, നിലവിലുള്ള അലവൻസ് തുക അപര്യാപ്തമാണെന്നാണ് അസോസിയേഷൻ വാദിക്കുന്നത്.

ലീവ് എൻ‌ക്യാഷ്‌മെന്റ് ആനുകൂല്യങ്ങൾ, യാത്രാ ചെലവുകൾ

ലീവ് എൻ‌ക്യാഷ്‌മെന്റ് സംബന്ധിച്ച ചട്ടങ്ങളിൽ മാറ്റങ്ങൾ വരുത്തണമെന്നും ജീവനക്കാരുടെ സംഘടന നിർദ്ദേശിച്ചിട്ടുണ്ട്. ജീവനക്കാർ ജോലി ചെയ്യുമ്പോൾ അവരുടെ അക്കൗണ്ടുകളിൽ ലഭ്യമായ അവധിയുടെ പകുതിയെങ്കിലും പണമായി നൽകാൻ കഴിയണം. കൂടാതെ, വിരമിക്കുമ്പോൾ ലഭിക്കുന്ന പരമാവധി 300 ദിവസത്തെ ലീവ് എൻ‌ക്യാഷ്‌മെന്റ് പരിധി 600 ദിവസമായി ഉയർത്താനും ആവശ്യപ്പെടുന്നുണ്ട്.  ഔദ്യോഗിക ആവശ്യങ്ങൾക്കായി ആസ്ഥാനത്തിന് പുറത്തേക്ക് യാത്ര ചെയ്യുന്ന ജീവനക്കാർക്കുള്ള റീഇംബേഴ്‌സ്‌മെന്റ് നിരക്കുകളിൽ ഗണ്യമായ വർദ്ധനവും ഐആർടിഎസ്എ നിർദ്ദേശിച്ചിട്ടുണ്ട്.

English Summary:

Railway employees’ union has submitted several proposals to the 8th Pay Commission seeking changes in the calculation of Dearness Allowance (DA), House Rent Allowance (HRA), and other benefits for central government employees.