8th Pay Commission: അടിസ്ഥാനശമ്പളം, ക്ഷാമബത്ത…. നിർണായകമാകുന്നത് ഫിറ്റ്മെന്റ് ഫാക്ടർ, ഇത്തവണ എത്ര?
8th Pay Commission Fitment Factor: ആറാം ശമ്പള കമ്മീഷനിൽ 1.92-ഉം ഏഴാം ശമ്പള കമ്മീഷനിൽ 2.57-ഉം ആയിരുന്നു ഫിറ്റ്മെന്റ് ഫാക്ടർ. അതുകൊണ്ട് തന്നെ ഇത്തവണയും നല്ലൊരു വർദ്ധനവ് ജീവനക്കാർ പ്രതീക്ഷിക്കുന്നുണ്ട്.
കേന്ദ്ര സർക്കാർ ജീവനക്കാർ ഏറെ ആകാംക്ഷയോടെ കാത്തിരിക്കുന്ന എട്ടാം ശമ്പള കമ്മീഷനുമായി ബന്ധപ്പെട്ട ചർച്ചകൾ പുരോഗമിക്കുകയാണ്. അടിസ്ഥാനശമ്പളം എത്ര കൂടുമെന്ന കാര്യത്തിൽ നിർണായക പങ്ക് വഹിക്കുന്നത് ഫിറ്റ്മെന്റ് ഫാക്ടറാണ്. ഇവ എത്രയായിരിക്കും എന്നതിനെക്കുറിച്ചുള്ള സൂചനകളാണ് ഇപ്പോൾ പുറത്തുവരുന്നത്. എട്ടാം ശമ്പള പരിഷ്കരണത്തിൽ ഫിറ്റ്മെന്റ് ഫാക്ടർ കുറഞ്ഞത് 1.60 എങ്കിലും ആകാൻ സാധ്യതയുണ്ടെന്നാണ് റിപ്പോർട്ടുകൾ
എന്തുകൊണ്ട് 1.60 ?
ക്ഷാമബത്ത കണക്കുകൾ അടിസ്ഥാനമാക്കിയാണ് ഫിറ്റ്മെന്റ് ഫാക്ടർ കുറഞ്ഞത് 1.60 എങ്കിലും ആകാൻ സാധ്യതയുണ്ടെന്ന് വിലയിരുത്തുന്നത്. 2025 ഡിസംബറിലെ ഉപഭോക്തൃ വില സൂചിക പ്രകാരം, 2026 ജനുവരി-ജൂൺ കാലയളവിൽ 2% ഡിഎ വർദ്ധനവ് ഉറപ്പായിട്ടുണ്ട്. ഇതോടെ ഏഴാം ശമ്പള കമ്മീഷൻ പ്രകാരമുള്ള ആകെ ഡിഎ ഏകദേശം 60% ആയി ഉയരും. അതായത് ഏഴാം ശമ്പള കമ്മീഷന്റെ തുടക്കത്തിൽ അടിസ്ഥാന ശമ്പളം 100 രൂപയായിരുന്നെങ്കിൽ ഇപ്പോൾ ഡിഎ കൂടി ചേർക്കുമ്പോൾ 160 രൂപയായി മാറുമെന്നാണ്. ഈ സാഹചര്യത്തിലാണ് കുറഞ്ഞ ഫിറ്റ്മെന്റ് ഫാക്ടർ 1.60 ആയി നിശ്ചയിക്കപ്പെടാൻ സാധ്യതയേറുന്നത്.
കൂടാതെ, 2020-21 കാലയളവിൽ മരവിപ്പിച്ച മൂന്ന് ഡിഎ ഗഡുക്കൾ ജീവനക്കാർക്ക് ഇതുവരെ ലഭിച്ചിട്ടില്ല. ഇത് കണക്കിലെടുക്കുകയാണെങ്കിൽ നിലവിലെ ഡിഎ 60 ശതമാനത്തിനും മുകളിൽ എത്തുമായിരുന്നു. ഇത് ശമ്പള പരിഷ്കരണത്തിൽ പ്രതിഫലിച്ചേക്കാം.
ALSO READ: ക്ഷാമബത്ത വർദ്ധനവ് 2% മാത്രം, എട്ടാം ശമ്പള കമ്മീഷനെ ഇത് എങ്ങനെ ബാധിക്കും?
എട്ടാം ശമ്പള കമ്മീഷൻ 2026 ജനുവരി മുതൽ മുൻകാല പ്രാബല്യത്തോടെ നടപ്പിലാക്കാൻ തീരുമാനിച്ചാലും, അതിന്റെ റിപ്പോർട്ട് വരാനും നടപ്പിലാക്കാനും രണ്ട് വർഷം വരെ എടുത്തേക്കാം. ആ സമയമാകുമ്പോഴേക്കും ഡിഎ 80-90 ശതമാനത്തിലേക്ക് ഉയർന്നേക്കാം. ഇത് ഫിറ്റ്മെന്റ് ഫാക്ടർ 1.8 അല്ലെങ്കിൽ 1.9 ലേക്ക് എത്തിക്കാൻ സഹായിക്കും.
ആറാം ശമ്പള കമ്മീഷനിൽ 1.92-ഉം ഏഴാം ശമ്പള കമ്മീഷനിൽ 2.57-ഉം ആയിരുന്നു ഫിറ്റ്മെന്റ് ഫാക്ടർ. അതുകൊണ്ട് തന്നെ ഇത്തവണയും നല്ലൊരു വർദ്ധനവ് ജീവനക്കാർ പ്രതീക്ഷിക്കുന്നുണ്ട്. ഫിറ്റ്മെന്റ് ഫാക്ടർ ഉയരുന്നത് വഴി അടിസ്ഥാന ശമ്പളത്തിലും പെൻഷനിലും ഗണ്യമായ വർദ്ധനവ് ഉണ്ടാകും. നിലവിൽ കുറഞ്ഞ അടിസ്ഥാന ശമ്പളം 18,000 രൂപയാണ്.
