Jio IPO: ജിയോ ഡിജിറ്റൽ വളർച്ചയുടെ ‘പവർഹൗസ്’; ഐപിഒയ്ക്ക് മികച്ച പ്രതികരണം

ജിയോ പ്ലാറ്റ്‌ഫോംസിന്റെ ഐപിഒയ്ക്ക് മികച്ച പ്രതികരണം. കമ്പനിയുടെ ഭാവി വളർച്ചാ സാധ്യതകൾ, കരുത്തുറ്റ പ്രവർത്തനമികവ്, വർദ്ധിച്ചുവരുന്ന സാങ്കേതിക മുന്നേറ്റങ്ങൾ എന്നിവയിൽ പ്രമുഖ ബ്രോക്കറേജ് സ്ഥാപനങ്ങൾ വലിയ പ്രതീക്ഷയാണ് വെച്ചുപുലർത്തുന്നത്. പരമ്പരാഗത ടെലികോം സേവനങ്ങളിൽ മാത്രം ഒതുങ്ങാതെ, ഇന്ത്യയുടെ അതിവേഗം വികസിക്കുന്ന ഡിജിറ്റൽ സമ്പദ്‌വ്യവസ്ഥയുടെ കേന്ദ്ര സ്ഥാനത്തേക്ക് ഈ ബിസിനസ് വളർന്നിരിക്കുന്നുണ്ടെന്നാണ് വിലയിരുത്തൽ.

വൻ സ്വീകാര്യത

സ്ഥാപന നിക്ഷേപകർക്കായി തുറന്ന ജിയോ ഐപിഒയ്ക്ക് തുടക്കത്തിൽ തന്നെ വൻ സ്വീകാര്യതയാണ് ലഭിച്ചത്. 8,110 കോടി രൂപയുടെ ‘ആങ്കർ ബുക്കിനായി’ 30 ഇരട്ടിയിലധികം അപേക്ഷകളാണ് ലഭിച്ചത്. ലഭ്യമായ ഓഹരികൾക്കായി സ്ഥാപന നിക്ഷേപകർ സമർപ്പിച്ച അപേക്ഷകളുടെ മൂല്യം 2.5 ലക്ഷം കോടി രൂപ കടന്നു.

3024 രൂപയുടെ ലാഭമോ?

ഐപിഒ തുറക്കുന്നതിന് മുമ്പ് ഗ്രേ മാർക്കറ്റ് പ്രീമിയം ശക്തമായ സൂചനയാണ് നൽകുന്നത്. ഇന്ത്യ ഇഷ്യൂ വില 1065 രൂപ മുതൽ 1119 രൂപ വരെയാണ്. 1119 രൂപയുടെ ഉയർന്ന പ്രൈസ് ബാൻഡിനെ അപേക്ഷിച്ച് ജിഎംപി ഏകദേശം 22.52 ശതമാനം ലാഭമാണ് സൂചിപ്പിക്കുന്നത്. ഇത് സംഭവിക്കുകയാണെങ്കിൽ ജിയോ പ്ലാറ്റ്‌ഫോംസിന്റെ ഓഹരി 1371 രൂപ നിരക്കിൽ ലിസ്റ്റ് ചെയ്യപ്പെട്ടേക്കാം. ഒരു ലോട്ടിൽ 12 ഓഹരികളാണുള്ളത്. ഒരു ഓഹരിക്ക് 252 രൂപയുടെ ലിസ്റ്റിംഗ് നേട്ടവും ലഭിക്കുകയാണെങ്കിൽ, ഒരു ലോട്ട് വഴി 3024 രൂപയുടെ ലാഭം നേടാനാകുമെന്നാണ് വിലയിരുത്തൽ.

ALSO READ: അതിവേഗം വളരുന്ന ജിയോ, അവസരങ്ങൾ എന്തൊക്കെ? ഐപിഒയ്ക്കും മുൻപ് കമ്പനികളുടെ പ്രവചനങ്ങൾ

ഐപിഒ – വിവരങ്ങൾ

1. 30,213 കോടി രൂപയുടെ ഈ ഐപിഒയിൽ 27 കോടി പുതിയ ഓഹരികളാണ്  ഉൾപ്പെടുന്നത്.
2. പ്രൈസ് ബാൻഡ് ഓഹരിയൊന്നിന് 1065 മുതൽ 1119 രൂപ വരെയാണ്.
3. ഇഷ്യൂ ഒക്ടോബർ 21-ന് തുറക്കുകയും ഒക്ടോബർ 23-ന് അടയ്ക്കുകയും ചെയ്യും.
4. ലിസ്റ്റിംഗ് ഒക്ടോബർ 28-ന് നടക്കും.
5. ഇതിലൂടെ ലഭിക്കുന്ന 27,500 കോടി രൂപ സ്വന്തം സബ്‌സിഡിയറി കമ്പനിയായ റിലയൻസ് ജിയോ ഇൻഫോകോം ലിമിറ്റഡിന്റെ കടങ്ങൾ മുൻകൂട്ടി തിരിച്ചടയ്ക്കാൻ ഉപയോഗിച്ചേക്കും.

ജിയോ – നേട്ടങ്ങൾ

ജിയോയുടെ വിപണിയിലെ ശക്തമായ സ്ഥാനം പ്രതീക്ഷ ഉയർത്തുന്നുണ്ട്. 2026 ജൂൺ 30 വരെ 53.33 കോടി ഉപഭോക്താക്കളുള്ള കമ്പനി, 2026 സാമ്പത്തിക വർഷത്തിൽ ഇന്ത്യയിലെ വയർലെസ് ഡാറ്റ ട്രാഫിക്കിന്റെ ഏകദേശം 60 ശതമാനവും കൈകാര്യം ചെയ്തു. പ്രവർത്തനങ്ങളിൽ നിന്നുള്ള വരുമാനം 2026 സാമ്പത്തിക വർഷത്തിൽ മുൻവർഷത്തെ അപേക്ഷിച്ച് 14.6 ശതമാനം വർധിച്ച് 1,46,885 കോടി രൂപയായി ഉയർന്നു. നികുതിക്ക് ശേഷമുള്ള ലാഭം ഏകദേശം 30,049 കോടി രൂപയിൽ എത്തി. കമ്പനിയുടെ എബിറ്റാ (EBITDA) മാർജിൻ ഏകദേശം 51.9 ശതമാനമായും ഉയർന്നു.