Actor Vijay Sangeetha Divorce : ദളപതി വിജയ്യും സംഗീതയും വേർപിരിയുന്നു? ചെങ്കൽപേട്ട് കോടതിയിൽ വിവാഹമോചന ഹർജി നൽകിയെന്ന് റിപ്പോർട്ട്
Thalapathy Vijay and Sangeetha Sornalingam Divorce Petition: ഏറെക്കാലമായി ഇരുവരും വേർപിരിഞ്ഞാണ് താമസിക്കുന്നതെന്ന അഭ്യൂഹങ്ങൾക്കിടയിലാണ് പുതിയ റിപ്പോർട്ടുകൾ പുറത്തുവരുന്നത്.
ചെന്നൈ: തമിഴ് സൂപ്പർ താരം വിജയ്യും ഭാര്യ സംഗീത സ്വർണലിംഗവും വിവാഹമോചിതരാകുന്നു എന്ന വാർത്തകൾ വീണ്ടും സജീവമാകുന്നു. സംഗീത വിവാഹമോചനത്തിനായി ചെങ്കൽപേട്ട് ഫാമിലി കോടതിയിൽ ഹർജി നൽകിയതായി ദേശീയ മാധ്യമങ്ങൾ റിപ്പോർട്ട് ചെയ്യുന്നു. ഏറെക്കാലമായി ഇരുവരും വേർപിരിഞ്ഞാണ് താമസിക്കുന്നതെന്ന അഭ്യൂഹങ്ങൾക്കിടയിലാണ് പുതിയ റിപ്പോർട്ടുകൾ പുറത്തുവരുന്നത്.
കഴിഞ്ഞ കുറച്ചു കാലങ്ങളായി വിജയ് പങ്കെടുക്കുന്ന പൊതുപരിപാടികളിലോ സിനിമയുമായി ബന്ധപ്പെട്ട ചടങ്ങുകളിലോ സംഗീതയുടെ സാന്നിധ്യം ഉണ്ടാകാറില്ല. വിജയ്യുടെ രാഷ്ട്രീയ പാർട്ടിയായ തമിഴക വെട്രി കഴകത്തിന്റെ ഔദ്യോഗിക സമ്മേളനങ്ങളിലും സംഗീത എത്താതിരുന്നത് വലിയ തോതിൽ ചർച്ചയായിരുന്നു. വിജയ്യുടെ മകൻ സഞ്ജയ് ആദ്യമായി സംവിധാനം ചെയ്യുന്ന ചിത്രത്തിന്റെ പ്രഖ്യാപന വേളയിലും സംഗീത ലണ്ടനിലായിരുന്നു എന്നാണ് വിവരം.
1999-ലാണ് വിജയ്യും സംഗീതയും വിവാഹിതരായത്. വിജയ്യുടെ കടുത്ത ആരാധകിയായിരുന്ന സംഗീതയുമായുള്ള പ്രണയവിവാഹമായിരുന്നു അത്. ഇവർക്ക് സഞ്ജയ്, ദിവ്യ സാഷ എന്നിങ്ങനെ രണ്ട് മക്കളുണ്ട്. ദക്ഷിണേന്ത്യയിലെ തന്നെ മാതൃകാ ദമ്പതികളായി അറിയപ്പെട്ടിരുന്ന ഇരുവരും വേർപിരിയുന്നു എന്ന വാർത്ത ആരാധകരെ കടുത്ത നിരാശയിലാഴ്ത്തിയിരിക്കുകയാണ്. എന്നാൽ ഈ വാർത്തകളോട് വിജയ്യോ അദ്ദേഹത്തോട് അടുത്ത വൃത്തങ്ങളോ ഇതുവരെ ഔദ്യോഗികമായി പ്രതികരിച്ചിട്ടില്ല.
