Fact Check: ആധാർ കാർഡ് ഉടമകൾക്ക് സൗജന്യ ഇലക്ട്രിക് സൈക്കിളുകൾ, പ്രധാനമന്ത്രിയുടെ വിഡിയോ സത്യമോ?

ആധാർ കാർഡ് ഉടമകൾക്ക് ഇലക്ട്രിക് സൈക്കിളുകൾ സൗജന്യമായി നൽകുമെന്ന വിഡിയോ സോഷ്യൽ മീഡിയയിൽ വ്യാപകമായി പ്രചരിക്കുകയാണ്. വൈറൽ വീഡിയോ കണ്ട പലരും കേന്ദ്ര സർക്കാരിന്റെ പുതിയ ക്ഷേമ പദ്ധതിയാണെന്ന് വിശ്വസിച്ച് സോഷ്യൽ മീഡിയ പ്ലാറ്റ്‌ഫോമുകളിലൂടെ വിഡിയോ ഫോർവേഡ് ചെയ്യാനും തുടങ്ങി. എന്നാൽ വിഡിയോ വ്യാജമാണെന്ന് വ്യക്തമാക്കിയിരിക്കുകയാണ്. സർക്കാരിന്റെ ഔദ്യോഗിക വസ്തുതാ പരിശോധനാ സ്ഥാപനമായ പ്രസ് ഇൻഫർമേഷൻ ബ്യൂറോ ഫാക്ട് ചെക്ക് ആണ് വിഡിയോ വ്യാജമാണെന്ന് വ്യക്തമാക്കിയത്.

“Dealdukaaan99” എന്ന ഫേസ്ബുക്ക് അക്കൗണ്ടിൽ നിന്നാണ് നരേന്ദ്ര മോദിയുടെ എഐ വിഡിയോ പോസ്റ്റ് ചെയ്തതെന്നാണ് റിപ്പോർട്ട്. ഇന്ത്യയിലെ ഓരോ ആധാർ കാർഡ് ഉടമയ്ക്കും പുതിയ സർക്കാർ പദ്ധതി പ്രകാരം സൗജന്യ ഇലക്ട്രിക് സൈക്കിൾ ലഭിക്കുമെന്നായിരുന്നു വിഡിയോയിലെ ഉള്ളടക്കം.

പിഐബി ഫാക്ട് ചെക്കിന്റെ റിപ്പോർട്ട് പ്രകാരം, ആധാർ കാർഡ് ഉടമകൾക്ക് സൗജന്യ ഇലക്ട്രിക് സൈക്കിളുകൾ നൽകുന്നത് സംബന്ധിച്ച് പ്രധാനമന്ത്രി നരേന്ദ്ര മോദിയോ കേന്ദ്ര സർക്കാരോ അത്തരമൊരു പദ്ധതി പ്രഖ്യാപിച്ചിട്ടില്ല. വിഡിയോ ആർട്ടിഫിഷ്യൽ ഇന്റലിജൻസ്  അടിസ്ഥാനമാക്കി സൃഷ്ടിച്ചതാണെന്നും ഓൺലൈനിൽ ആളുകളെ തെറ്റിദ്ധരിപ്പിക്കുന്നതിനായി സൃഷ്ടിച്ചതാണെന്നും ഉദ്യോഗസ്ഥർ സ്ഥിരീകരിച്ചു.

ALSO READ: കേരളത്തിന് എയിംസ് കിട്ടുമോ? പ്രധാനമന്ത്രി – മുഖ്യമന്ത്രി വി ഡി സതീശൻ ആദ്യ കൂടിക്കാഴ്ച ഇന്ന്

പൗരന്മാർക്ക് മുന്നറിയിപ്പ് നൽകി സർക്കാർ

സർക്കാർ ആനുകൂല്യങ്ങളുമായി ബന്ധപ്പെട്ടുള്ള സോഷ്യൽ മീഡിയ പോസ്റ്റുകൾ കണ്ണടച്ച് വിശ്വസിക്കരുതെന്നും ജാഗ്രത പാലിക്കണമെന്നും സർക്കാർ മുന്നറിയിപ്പ് നൽകി. ഇത്തരം വ്യാജ വാഗ്ദാനങ്ങളിൽ വിശ്വസിച്ച് ആരും തങ്ങളുടെ ആധാർ നമ്പറോ മറ്റ് രേഖകളോ അപരിചിതമായ ലിങ്കുകളിൽ നൽകരുത്. കേന്ദ്ര സർക്കാരിന്റെ ഏതൊരു ക്ഷേമപദ്ധതിയും ഔദ്യോഗിക പോർട്ടലുകൾ വഴിയോ പ്രസ് ഇൻഫർമേഷൻ ബ്യൂറോ വഴിയോ മാത്രമേ പ്രഖ്യാപിക്കാറുള്ളൂവെന്നും അധികൃതർ വ്യക്തമാക്കി. സത്യാവസ്ഥ ബോധ്യപ്പെടാതെ ഇത്തരം വിഡിയോകൾ വാട്സാപ്പ് ഗ്രൂപ്പുകളിലും മറ്റും ഷെയർ ചെയ്യരുത്.

സർക്കാർ പദ്ധതികൾ എങ്ങനെ അറിയാം?

കേന്ദ്ര സർക്കാരിന്റെ ക്ഷേമ പദ്ധതികളുമായി ബന്ധപ്പെട്ട വിവരങ്ങൾക്ക്, പൗരന്മാർക്ക് MyScheme പോർട്ടൽ സന്ദർശിക്കാവുന്നതാണ്. സംശയാസ്പദമായ എന്തെങ്കിലും വിവരങ്ങൾ ശ്രദ്ധയിൽപ്പെട്ടാൽ, +91 8799711259 എന്ന വാട്ട്‌സ്ആപ്പ് നമ്പറിലൂടെയും factcheck@pib.gov.in എന്ന ഇമെയിൽ വിലാസത്തിലൂടെയും അത്തരം സന്ദേശങ്ങൾ, വീഡിയോകൾ അല്ലെങ്കിൽ ചിത്രങ്ങൾ PIB ഫാക്ട് ചെക്കിലേക്ക് റിപ്പോർട്ട് ചെയ്യാവുന്നതാണ്. എഐ-യിലൂടെ സൃഷ്ടിക്കപ്പെടുന്ന തെറ്റായ വിവരങ്ങൾ ഓൺലൈനിൽ വർദ്ധിച്ചുവരുന്നതിനാൽ, സോഷ്യൽ മീഡിയ ഉപയോക്താക്കൾ ജാഗ്രത പാലിക്കണമെന്നും സർക്കാർ വ്യക്തമാക്കി.

English Summary:

Viral AI-generated video circulating on social media falsely claims that Prime Minister Narendra Modi announced free electric bicycles for all Aadhaar card holders. Fact-check reports clarified that no such government scheme exists and the video was digitally manipulated using artificial intelligence to imitate the Prime Minister’s speech and appearance.