MRI Scan Boy Death: എംആർഐ സ്കാനിങ്ങിനിടെ കുട്ടി മരിച്ചു; ജീവനക്കാരുടെ അശ്രദ്ധയെന്ന് കുടുംബം

പ്രതീകാത്മക ചിത്രം

ലഖ്നൗ: ഉത്തർപ്രദേശിലെ ഗ്രേറ്റർ നോയിഡയിൽ എംആർഐ സ്കാനിങ്ങിനെത്തിയ ആറ് വയസ്സുകാരൻ ദാരുണാന്ത്യം. കെ ബി ഹെൽത്ത് കെയർ എന്ന സ്വകാര്യ ഡയഗ്നോസ്റ്റിക് സെൻ്ററിൽ വ്യാഴാഴ്ചയോടെയാണ് സംഭവം നടന്നത്. ഡാൻകൂർ സ്വദേശിയായ പ്രശാന്ത് കസാനയുടെ മകൻ ഗർവ് കസാനയാണ് മരിച്ചത്. സ്കാനിങ്ങിന് മുന്നോടിയായി കുട്ടിക്ക് നൽകിയ അനാസ്തീഷ്യ കുത്തിവയ്പ്പിൽ മരുന്നിൻ്റെ അളവ് കൂടിയതാണ് മരണകാരണമെന്നാണ് കുട്ടിയുടെ കുടുംബം ആരോപിക്കുന്നത്.

ALSO READ: മൃതദേഹം പെട്ടിയിലാക്കി സെപ്റ്റിക് ടാങ്കിൽ തള്ളി; 33 കാരിയുടെ മരണത്തിൽ കാമുകൻ പിടിയിൽ

സ്കാനിങ്ങിനിടെ കുട്ടിയുടെ ആരോ​ഗ്യ നില പെട്ടെന്ന് വഷളാവുകയും ബോധരഹിതനാവുകയുമായിരുന്നു. ഉടൻ തന്നെ സമീപത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ക്ലിനിക്കിലെ ജീവനക്കാരുടെ ഭാഗത്തുനിന്നടക്കം ഗുരുതരമായ വീഴ്ചയുണ്ടായെന്നും ആരോപിച്ച് ബന്ധുക്കളും നാട്ടുകാരും പ്രദേശത്ത് വലിയ പ്രതിഷേധമാണ് നടത്തിയത്.

സംഭവത്തിൽ വ്യാപകമായ പരാതി ഉയർന്നതിന് പിന്നാലെ ആരോഗ്യവകുപ്പ് ഇടപെട്ട് ഡയഗ്നോസ്റ്റിക് സെൻ്റർ താൽക്കാലികമായി അടച്ചതായാണ് വിവരം. സംഭവത്തെക്കുറിച്ച് അന്വേഷിക്കാൻ ചീഫ് മെഡിക്കൽ ഓഫീസറുടെ നേതൃത്വത്തിൽ നാലംഗ സമിതി രൂപീകരിച്ചു. പോസ്റ്റ്‌മോർട്ടം റിപ്പോർട്ട് ലഭിച്ച ശേഷം മാത്രമെ സ്ഥാപനത്തിനെതിരെ എഫ്ഐആർ ഉൾപ്പെടെയുള്ള നിയമനടപടികൾ സ്വീകരിക്കാനാകൂ എന്നും പോലീസ് അറിയിച്ചു.