Train Ticket Refund: റെയിൽവേ പുതിയ ടിക്കറ്റ് റീഫണ്ട് നിയമങ്ങൾ പ്രഖ്യാപിച്ചു, പുതിയ മാറ്റം എന്നു മുതൽ എങ്ങനെ?
Railways Announces New Ticket Refund and Boarding Rule: യാത്രക്കാർക്ക് ഏറെ ആശ്വാസം നൽകുന്നതാണ് ബോർഡിങ് പോയിന്റ് മാറ്റുന്നതുമായി ബന്ധപ്പെട്ട പരിഷ്കാരം. പുതിയ നിയമപ്രകാരം ട്രെയിൻ പുറപ്പെടുന്നതിന് 30 മിനിറ്റ് മുൻപ് വരെ യാത്രക്കാർക്ക് തങ്ങളുടെ ബോർഡിങ് സ്റ്റേഷൻ മാറ്റാൻ അനുവാദമുണ്ടാകും. ഒന്നിലധികം സ്റ്റേഷനുകളുള്ള നഗരങ്ങളിൽ യാത്ര ചെയ്യുന്നവർക്ക് തങ്ങൾക്ക് സൗകര്യപ്രദമായ സ്റ്റേഷനിൽ നിന്ന് ട്രെയിൻ കയറാൻ ഇത് സഹായിക്കും.
ന്യൂഡൽഹി: ഇന്ത്യൻ റെയിൽവേയുടെ ടിക്കറ്റ് റീഫണ്ട്, ബോർഡിങ് നിയമങ്ങളിൽ വിപ്ലവകരമായ മാറ്റങ്ങൾ വരുന്നു. ടിക്കറ്റ് റദ്ദാക്കുന്ന സമയത്തിനനുസരിച്ച് റീഫണ്ട് തുകയിൽ മാറ്റം വരുത്തുകയും ബോർഡിങ് പോയിന്റുകൾ മാറ്റുന്നതിൽ കൂടുതൽ ഇളവുകൾ നൽകുകയും ചെയ്യുന്ന പുതിയ പരിഷ്കാരങ്ങൾ 2026 ഏപ്രിൽ 1 മുതൽ 15 വരെയുള്ള കാലയളവിൽ ഘട്ടം ഘട്ടമായി നടപ്പിലാക്കും.
പുതിയ റീഫണ്ട് നിരക്കുകൾ
ടിക്കറ്റ് റദ്ദാക്കുന്നത് ട്രെയിൻ പുറപ്പെടുന്നതിന് എത്ര സമയം മുൻപാണ് എന്നതിനെ അടിസ്ഥാനമാക്കിയാണ് ഇനി പിഴ ഈടാക്കുക.
- 72 മണിക്കൂറിന് മുൻപ്: സ്ഥിരീകരിച്ച ടിക്കറ്റുകൾ പുറപ്പെടുന്നതിന് 72 മണിക്കൂർ മുൻപ് റദ്ദാക്കുകയാണെങ്കിൽ, ഓരോ യാത്രക്കാരനും ബാധകമായ ഏറ്റവും കുറഞ്ഞ ഫ്ലാറ്റ് റദ്ദാക്കൽ ഫീസ് മാത്രം കുറച്ച് ബാക്കി തുക ലഭിക്കും.
- 72 മുതൽ 24 മണിക്കൂർ വരെ: ട്രെയിൻ പുറപ്പെടുന്നതിന് 72 മണിക്കൂർ മുതൽ 24 മണിക്കൂർ മുൻപ് വരെ ടിക്കറ്റ് റദ്ദാക്കിയാൽ ടിക്കറ്റ് നിരക്കിന്റെ 25 ശതമാനം പിഴയായി ഈടാക്കും.
- 24 മുതൽ 8 മണിക്കൂർ വരെ: പുറപ്പെടുന്നതിന് 24 മണിക്കൂർ മുതൽ 8 മണിക്കൂർ മുൻപ് വരെയുള്ള സമയത്ത് റദ്ദാക്കൽ നടത്തിയാൽ ടിക്കറ്റ് നിരക്കിന്റെ 50 ശതമാനം കിഴിവ് ലഭിക്കും.
- 8 മണിക്കൂറിനുള്ളിൽ: ട്രെയിൻ പുറപ്പെടുന്നതിന് 8 മണിക്കൂറിനുള്ളിലാണ് ടിക്കറ്റ് റദ്ദാക്കുന്നതെങ്കിൽ യാതൊരുവിധ റീഫണ്ടും ലഭിക്കില്ല.
ബോർഡിങ് പോയിന്റ് മാറ്റാൻ കൂടുതൽ സമയം
യാത്രക്കാർക്ക് ഏറെ ആശ്വാസം നൽകുന്നതാണ് ബോർഡിങ് പോയിന്റ് മാറ്റുന്നതുമായി ബന്ധപ്പെട്ട പരിഷ്കാരം. പുതിയ നിയമപ്രകാരം ട്രെയിൻ പുറപ്പെടുന്നതിന് 30 മിനിറ്റ് മുൻപ് വരെ യാത്രക്കാർക്ക് തങ്ങളുടെ ബോർഡിങ് സ്റ്റേഷൻ മാറ്റാൻ അനുവാദമുണ്ടാകും. ഒന്നിലധികം സ്റ്റേഷനുകളുള്ള നഗരങ്ങളിൽ യാത്ര ചെയ്യുന്നവർക്ക് തങ്ങൾക്ക് സൗകര്യപ്രദമായ സ്റ്റേഷനിൽ നിന്ന് ട്രെയിൻ കയറാൻ ഇത് സഹായിക്കും.
കൗണ്ടർ ടിക്കറ്റുകളുടെയും ഇ-ടിക്കറ്റുകളുടെയും കാര്യത്തിൽ സുപ്രധാന മാറ്റങ്ങളാണ് വരുത്തിയിരിക്കുന്നത്. നേരത്തെ യാത്രക്കാർക്ക് ടെർമിനേറ്റിങ് സ്റ്റേഷനിൽ (യാത്ര അവസാനിക്കുന്ന സ്റ്റേഷൻ) പോയി ടിക്കറ്റ് റദ്ദാക്കേണ്ടി വന്നിരുന്ന സാഹചര്യം ഒഴിവാക്കി. ഇനി മുതൽ ഏത് സ്റ്റേഷനിലെയും പി.ആർ.എസ് കൗണ്ടറുകളിൽ നിന്ന് ടിക്കറ്റ് റദ്ദാക്കാം.
ഇ-ടിക്കറ്റുകൾ റദ്ദാക്കുമ്പോൾ നേരത്തെ നൽകേണ്ടിയിരുന്ന ടിക്കറ്റ് ഡെപ്പോസിറ്റ് രസീത് ഇനി ആവശ്യമില്ല. പകരം ഓട്ടോമാറ്റിക് റീഫണ്ട് സംവിധാനം റെയിൽവേ ഏർപ്പെടുത്തി. യാത്രക്കാർക്ക് മികച്ച സേവനം ഉറപ്പാക്കുന്നതിനും ബുക്കിങ് സംവിധാനം കുറ്റമറ്റതാക്കുന്നതിനുമാണ് റെയിൽവേ ഈ മാറ്റങ്ങൾ കൊണ്ടുവരുന്നത്.
