Doctors Strike: ഒപി ചികിൽസ മുടക്കി ഡോക്ടർമാർ സമരത്തിൽ; രോഗികൾ ദുരിതത്തിൽ
Doctors Strike in state: അനിശ്ചിതകാലത്തേക്കാണ് ഒ പി ചികിത്സ മുടക്കി ഡോക്ടർമാർ സമരം തുടങ്ങിയിരിക്കുന്നത്. സർക്കാർ വഞ്ചിച്ചു എന്നാണ് കെ ജി എം സി ടി എ പറയുന്നത്...
തിരുവനന്തപുരം: സംസ്ഥാനത്തെ സർക്കാർ മെഡിക്കൽ കോളേജുകളിൽ ഒപി ബഹിഷ്കരിച്ചുകൊണ്ടുള്ള ഡോക്ടർമാരുടെ സമരം ആരംഭിച്ചു. ഇതോടെ മെഡിക്കൽ കോളേജിൽ എത്തുന്ന രോഗികൾ ദുരിതത്തിൽ ആവുകയാണ്. അനിശ്ചിതകാലത്തേക്കാണ് ഒ പി ചികിത്സ മുടക്കി ഡോക്ടർമാർ സമരം തുടങ്ങിയിരിക്കുന്നത്. സർക്കാർ വഞ്ചിച്ചു എന്നാണ് കെ ജി എം സി ടി എ പറയുന്നത്.
രാവിലെ മുതൽ മെഡിക്കൽ കോളേജിലെ ഒപികളില വൻ തിരക്കാണ് അനുഭവപ്പെടുന്നത്. സമരം ആണെന്ന് അറിയാതെ ചികിത്സയ്ക്കായി എത്തിയ നിരവധി രോഗികൾ അവരിൽ ചിലർ ഗുരുതരാവസ്ഥയിലുള്ളവരും ഉണ്ട്, ഇവർ പിജി ഡോക്ടർമാരെ കണ്ട് മടങ്ങേണ്ട അവസ്ഥയാണ്. ചില രോഗികൾ സ്വകാര്യ ആശുപത്രികളിൽ ചികിത്സ തേടേണ്ടതായും വന്നു.
അതേസമയം അധ്യാപനവും ബഹിഷ്കരിച്ച പശ്ചാത്തലത്തിൽ മെഡിക്കൽ കോളേജിലെ വിദ്യാർത്ഥികളുടെ പഠനവും പ്രതിസന്ധിയിലായ അവസ്ഥയാണ്. അതേസമയം അത്യാഹിത വിഭാഗങ്ങളെ സമരത്തിൽ നിന്ന് ഒഴിവാക്കിയിട്ടുണ്ട്.
ശമ്പളപരിഷ്കരണ കുടിശ്ശികയും ഡിഎ കുടിശ്ശികയും ഉടൻ നൽകുക, എൻട്രി കേഡറിലെ ശമ്പള അപാകതകൾ പരിഹരിക്കുക, ഡോക്ടർ ക്ഷാമം പരിഹരിക്കാൻ പുതിയ തസ്തികകൾ സൃഷ്ടിക്കുകതുടങ്ങിയ വിവിധ ആവശ്യങ്ങൾ ഉന്നയിച്ചാണ് സമരം.
