Kannur Private Bus Strike: യാത്രക്കാർ വലയും! കണ്ണൂർ ജില്ലയിൽ ഇന്ന് സ്വകാര്യ ബസ് പണിമുടക്ക്; പ്രതിഷേധം അണ്ടർ പാസിനായി

Kannur Private Bus Strike

കണ്ണൂർ: ജില്ലയിൽ ഇന്ന് (വ്യാഴം) സ്വകാര്യ ബസ് പണിമുടക്ക് (Private Bus Strike Kannur). ദേശീയപാത വികസനവുമായി ബന്ധപ്പെട്ട് നാദാൽ ഒകെയുപി സ്കൂളിന് സമീപം അണ്ടർപാസ് അനുവദിക്കണമെന്ന ആവശ്യമുയർത്തിയാണ് സമരം ആഹ്വാനം ചെയ്തിരിക്കുന്നത്. ജില്ലയിലെ മുഴുവൻ സ്വകാര്യ ബസുകളും ഇന്ന് പണിമുടക്കുമെന്ന് ബസ് ഓപ്പറേറ്റേഴ്സ് കോ-ഓർഡിനേഷൻ കമ്മിറ്റി അറിയിച്ചു. രാവിലെ മുതൽ വൈകുന്നേരം വരെയാണ് പണിമുടക്ക്.

അതേസമയം, നാദാൽ വഴി തലശ്ശേരിയിലേക്ക് സർവീസ് നടത്തുന്ന ബസുകളാണ് ഇന്ന് മുതൽ അനിശ്ചിതകാല പണിമുടക്ക് പ്രഖ്യാപിച്ചിരിക്കുന്നത്. ബസ് പണിമുടക്ക് ജില്ലയിലെ യാത്രാ സംവിധാനത്തെ സാരമായി ബാധിക്കും. നാദാൽ-തലശ്ശേരി റൂട്ടിലെ യാത്രക്കാർക്ക് ബദൽ യാത്രാ മാർ​ഗമെന്നോണം കെഎസ്ആർടിസിയുടെ സർവീസുകളെ മാത്രമെ ഇന്ന് ആശ്രയിക്കാൻ സാധിക്കു.

ALSO READ: കോഴിക്കോട്– വയനാട് ജില്ലകളെ ബന്ധിപ്പിക്കുന്ന സംസ്ഥാന പാത സത്യമാകുന്നു, ഡിപിആർ സമർപ്പിച്ചു

ദേശീയപാത 66-ന്റെ നിർമ്മാണം പുരോഗമിക്കുമ്പോൾ, നടാൽ ഒകെ യുപി സ്കൂളിന് സമീപം ഒരു അടിപ്പാത വേണമെന്നത് പ്രദേശവാസികളടക്കം ഉന്നയിക്കുന്ന ആവശ്യമാണ്. നിലവിലെ അശാസ്ത്രീയമായ രൂപരേഖ അനുസരിച്ച് അടിപ്പാത നിർമ്മിച്ചില്ലെങ്കിൽ, കണ്ണൂർ-തോട്ടട വഴി തലശ്ശേരിയിലേക്ക് പോകുന്ന ബസുകൾക്ക് ഏകദേശം ഏഴു കിലോമീറ്ററോളം അധികം ദൂരം സഞ്ചരിക്കേണ്ടി വരും.

ഇത്രയും ദൂരം അധികം ഓടുന്നത് ഇന്ധനച്ചെലവിൽ വലിയ വർദ്ധനവുണ്ടാക്കും. നിലവിലെ സാമ്പത്തിക പ്രതിസന്ധിക്കിടയിൽ ഈ അധിക ബാധ്യത താങ്ങാനാവില്ലെന്നാണ് ബസുടമകൾ വ്യക്തമാക്കുന്നത്. നിലവിൽ അടിപ്പാതയുമായി ബന്ധപ്പെട്ട് അനുകൂലമായ നടപടിയുണ്ടാകുന്നത് വരെ സമരവുമായി മുന്നോട്ട് പോകാനാണ് ബസ് ഓപ്പറേറ്റേഴ്‌സ് കോ-ഓർഡിനേഷൻ കമ്മിറ്റിയുടെ തീരുമാനം.