ഓർഡർ ചെയ്തത് എൽ.ഇ.ഡി ബൾബ്; കിട്ടിയത് മദ്യക്കുപ്പിയിലാക്കിയ മനുഷ്യമൂത്രം, സംഭവം പത്തനംതിട്ടയിൽ

പത്തനംതിട്ട: ഓൺലൈൻ വഴി എൽഇഡി ലൈറ്റ് ഓർഡർ ചെയ്ത യുവാക്കൾക്ക് ലഭിച്ചത് വിലകൂടിയ മദ്യക്കുപ്പിയിൽ ആക്കിയ മനുഷ്യമൂത്രമാണ്. 1000 യുടെ എൽഇഡി ലൈറ്റ് ആണ് ഇവർ ഓൺലൈനിൽ നിന്ന് ഓർഡർ ചെയ്തിരുന്നത്. കോന്നി അരുവാപുലം സ്വദേശികളായ യുവാക്കളാണ് ഓൺലൈൻ തട്ടിപ്പിന് ഇരയായി മാറിയത്. അരുവാപുലം സ്വദേശി ഓമനക്കുട്ടന് വേണ്ടിയാണ് സുഹൃത്തായ സനു ഫേസ്ബുക്ക് വഴി കണ്ട ഓൺലൈൻ ലിങ്ക് വഴി ലൈറ്റ് ഓർഡർ ചെയ്തത്.

ഇക്കഴിഞ്ഞ ഒക്ടോബർ 6 നാണ് ഓർഡർ നൽകിയത്. തുടർന്ന് ഇന്നലെ വൈകിട്ട് നാലു മണിക്ക് ശേഷം ഡെലിവറി ബോയ് ഓർഡർ എത്തിച്ചു നൽകുകയും ചെയ്തു. കയ്യിൽ കിട്ടിയ ബോക്സ് പൊട്ടിച്ചു നോക്കിയപ്പോഴാണ് തങ്ങൾ ചതിക്കപ്പെട്ട വിവരം ഇവർ അറിയുന്നത്. കൊറിയർ സർവീസ് വഴിയാണ് ഇവർക്ക് സാധനം ലഭിക്കുന്നത്. ഷാഡോ ഫോക്സ് ഇന്ത്യ എന്ന കമ്പനിയുടെ ഡെലിവറി ബോയ് ആണ് ഇവർക്ക് പാക്കറ്റ് എത്തിച്ചു നൽകിയത്. സാധനം കയ്യിൽ കിട്ടിയ ഉടൻ തന്നെ എൽഇഡി ലൈറ്റിന്റെ തുകയായ ആയിരം രൂപ ഡെലിവറി ബോയ്ക്ക് നൽകുകയും ചെയ്തു.

Also Read: തിരുവനന്തപുരത്ത് കുഴഞ്ഞുവീണ യുവാവും ആംബുലൻസിൽ കയറ്റാൻ സഹായിച്ച അയൽവാസിയും മരിച്ചു

അതിനുശേഷം കയ്യിൽ കിട്ടിയ പാക്കറ്റ് പൊട്ടിച്ചപ്പോൾ ആണ് ഞെട്ടിക്കുന്ന വിവരം അറിയുന്നത്. പാക്കറ്റ് തുറക്കുമ്പോൾ ആദ്യം കാണുന്നത് പ്രീമിയം മദ്യക്കുപ്പിയിൽ എന്തോ ഒരു ദ്രാവകമാണ്. പിന്നീട് ഇത് നോക്കിയപ്പോഴാണ് മനുഷ്യ മൂത്രമാണ് എന്ന് മനസ്സിലാകുന്നത്. തുടർന്ന് ഈ വിവരം കമ്പനിയെ അറിയിക്കുന്നതിനായി കവറിന് പുറത്തുള്ള നമ്പറിൽ ബന്ധപ്പെടാൻ ശ്രമിച്ചെങ്കിലും സാധിച്ചില്ല. പിന്നീട് വിശദമായി ഈ നമ്പർ പരിശോധിച്ചപ്പോഴാണ് നമ്പർ വ്യാജമാണെന്നും അതിനൊപ്പം ഉള്ള ഇ മെയിൽ ഐ.ഡി ഫേക്ക് ആണെന്നും മനസ്സിലാകുന്നത്.

പൊതു വിപണിയിൽ ഉയർന്ന വിലയുള്ള ലൈറ്റ് ആയിരം രൂപയ്ക്ക് ലഭിക്കുമെന്ന പരസ്യം ഫേസ്ബുക്ക് വഴിയാണ് യുവാക്കൾ കാണുന്നതും പോസ്റ്റിൽ ഉണ്ടായിരുന്ന ലിങ്ക് വഴി ഓർഡർ നൽകുന്നതും. ലൈറ്റിന് 9 മാസത്തെ ഗ്യാരണ്ടിയും വാഗ്ദാനം ചെയ്തിരുന്നു. പാഴ്സൽ ബോക്സ് അയച്ചു നൽകിയ കമ്പനിയുടെ മേൽവിസത്തിൽ ഉൾപ്പെടെ ക്രമക്കേടുകൾ ഉണ്ടെന്നാണ് യുവാക്കൾ പറയുന്നത്. സംഭവത്തിൽ കൺസ്യൂമർ കോടതിയെ സമീപിക്കാനാണ് യുവാക്കളുടെ തീരുമാനം. ഇതുമായി ബന്ധപ്പെട്ട് പോലീസിലും പരാതി നൽകുമെന്നും ഇവർ പറഞ്ഞു.

English Summary

Young men who ordered LED lights online received a bottle of expensive liquor containing human urine. They had placed an online order for 1,000 LED lights. The victims of this online scam are young men from Aruvapulam in Konni.