Railway Update: ട്രെയിൻ ഗതാഗതത്തിൽ നിയന്ത്രണം: നാളെ മുതൽ വിവിധ സർവീസുകൾ വഴിതിരിച്ചുവിടുന്നു

തിരുവനന്തപുരം: ട്രാക്ക് അറ്റകുറ്റപ്പണികൾ പ്രമാണിച്ച് സംസ്ഥാനത്തെ വിവിധ ട്രെയിൻ സർവീസുകളിൽ റെയിൽവേ മാറ്റങ്ങൾ പ്രഖ്യാപിച്ചു. പ്രധാനമായും കോട്ടയം വഴിയുള്ള സർവീസുകൾ ആലപ്പുഴ വഴി തിരിച്ചുവിടുമെന്നും ചില മെമു സർവീസുകൾ റദ്ദാക്കിയതായും അധികൃതർ അറിയിച്ചു.

ആലപ്പുഴ വഴി തിരിച്ചുവിടുന്ന ട്രെയിനുകൾ

സാധാരണ കോട്ടയം വഴി സർവീസ് നടത്തുന്ന താഴെ പറയുന്ന ട്രെയിനുകൾ ആലപ്പുഴ വഴി തിരിച്ചുവിടും:

• തിരുവനന്തപുരം എക്സ്പ്രസ് (16348)
• അമൃത എക്സ്പ്രസ് (16344)
• രാജ്യറാണി എക്സ്പ്രസ് (16350)

യാത്രക്കാരുടെ സൗകര്യാർത്ഥം ഈ ട്രെയിനുകൾക്ക് എറണാകുളം ജംഗ്ഷൻ, ആലപ്പുഴ, അമ്പലപ്പുഴ സ്റ്റേഷനുകളിൽ അധിക സ്റ്റോപ്പുകൾ അനുവദിച്ചിട്ടുണ്ട്.

റദ്ദാക്കിയവയും സർവീസ് അവസാനിപ്പിക്കുന്നവയും

ഷൊർണൂർ – നിലമ്പൂർ റോഡ് മെമു മെയ് 10, 17, 24, 31 തീയതികളിൽ ഈ സർവീസ് പൂർണ്ണമായും റദ്ദാക്കി. രാജ്യറാണി എക്സ്പ്രസ്  മെയ് 9, 16, 23, 30 തീയതികളിൽ തിരുവനന്തപുരം നോർത്തിൽ നിന്നുള്ള ഈ ട്രെയിൻ ഷൊർണൂർ ജംഗ്ഷനിൽ സർവീസ് അവസാനിപ്പിക്കും. ഷൊർണൂരിനും നിലമ്പൂരിനും ഇടയിൽ ഈ ദിവസങ്ങളിൽ ട്രെയിൻ സർവീസ് ഉണ്ടാകില്ല.

മറ്റു വഴിതിരിച്ചുവിടലുകൾ

മധുര, മാനാമധുര, വിരുതുനഗർ വഴി തിരിച്ചുവിടുന്ന സർവീസുകൾ:

• പാലക്കാട് – തിരുച്ചെന്തൂർ എക്സ്പ്രസ് (16731): മെയ് 7, 11, 14 തീയതികളിൽ.
• തിരുച്ചെന്തൂർ – പാലക്കാട് എക്സ്പ്രസ് (16732): മെയ് 8, 13 തീയതികളിൽ.

യാത്രക്കാർ റെയിൽവേയുടെ ഔദ്യോഗിക ആപ്പുകളോ വെബ്‌സൈറ്റോ പരിശോധിച്ച് സമയം ഉറപ്പുവരുത്തണമെന്ന് അധികൃതർ അഭ്യർത്ഥിച്ചു.

ALSO READ: ‘സഖാക്കൾക്ക് നിർഭയമായും സ്വതന്ത്രമായും അഭിപ്രായം പറയാം’; തോൽവി അപ്രതീക്ഷിതമെന്ന് എംവി ഗോവിന്ദൻ

റെയിൽവേയുടെ പുത്തൻ പരിഷ്കാരം

യാത്രക്കാർക്ക് ആശ്വാസകരമായ പുതിയ പരിഷ്കാരവുമായി ഇന്ത്യൻ റെയിൽവേ. റെയിൽവേയുടെ ’52 ആഴ്ചയിൽ 52 പരിഷ്കാരങ്ങൾ’ പദ്ധതിയുടെ ഭാഗമായി, ട്രെയിൻ പുറപ്പെടുന്നതിന് വെറും 30 മിനിറ്റ് മുമ്പ് വരെ ബോർഡിങ് സ്റ്റേഷൻ മാറ്റാൻ ഇനി യാത്രക്കാർക്ക് സാധിക്കും. മുൻപ് ഇത് ട്രെയിൻ പുറപ്പെടുന്നതിന് 24 മണിക്കൂർ മുമ്പെങ്കിലും ചെയ്യണമായിരുന്നു. കേന്ദ്ര റെയിൽവേ മന്ത്രി അശ്വിനി വൈഷ്ണവാണ് ഈ നിർണ്ണായക മാറ്റം പ്രഖ്യാപിച്ചത്. പുതിയ നിയമം വഴി യാത്രക്കാർക്ക് തങ്ങളുടെ കൺഫേംഡ് സീറ്റുകൾ നഷ്ടപ്പെടാതെ തന്നെ സൗകര്യപ്രദമായ മറ്റൊരു സ്റ്റേഷനിൽ നിന്ന് ട്രെയിൻ കയറാൻ സാധിക്കും.

പ്രധാന പ്രത്യേകതകൾ

ആദ്യ ചാർട്ട് തയ്യാറാക്കി കഴിഞ്ഞാലും ട്രെയിൻ പുറപ്പെടുന്നതിന് 30 മിനിറ്റ് മുമ്പ് വരെ മാറ്റം വരുത്താം.

• ബോർഡിങ് പോയിന്റ് മാറ്റുന്നതോടെ, പുതിയ സ്റ്റേഷൻ എത്തുന്നത് വരെ സീറ്റ് സുരക്ഷിതമായിരിക്കും. സാധാരണയായി യാത്രക്കാരൻ നിശ്ചിത സ്റ്റേഷനിൽ നിന്ന് കയറിയില്ലെങ്കിൽ സീറ്റ് മറ്റൊരാൾക്ക് നൽകാൻ ടിടിഇക്ക് അധികാരമുണ്ടായിരുന്നു. ഈ സാഹചര്യം പുതിയ മാറ്റത്തോടെ ഇല്ലാതാകും.
• ആദ്യ ചാർട്ടിൽ പഴയ സ്റ്റേഷൻ തന്നെയായിരിക്കും രേഖപ്പെടുത്തുകയെങ്കിലും, ട്രെയിൻ പുറപ്പെടുന്നതിന് തൊട്ടുമുമ്പ് തയ്യാറാക്കുന്ന രണ്ടാമത്തെ ചാർട്ടിൽ പുതിയ സ്റ്റേഷൻ രേഖപ്പെടുത്തും.
• കൺഫേംഡ് ടിക്കറ്റുള്ളവർക്കും ആർഎസി (RAC) ടിക്കറ്റുള്ളവർക്കും മാത്രമേ ഈ സൗകര്യം ലഭിക്കൂ. ഒരു ടിക്കറ്റിൽ ഒരു തവണ മാത്രമേ ബോർഡിങ് പോയിന്റ് മാറ്റാൻ സാധിക്കൂ.

English Summary

Indian Railways has significantly updated its boarding station rules under the ’52 Reforms in 52 Weeks’ project, now allowing passengers to change their boarding point up to 30 minutes before the train’s departure. This is a major shift from the previous rule that required changes to be made at least 24 hours in advance, ensuring that travelers with confirmed or RAC tickets can board from a more convenient station without losing their seats.