Sabarimala Gold Theft Case: ശബരിമല സ്വർണ്ണ മോഷണം: ഹൈക്കോടതി മറുപടി പറഞ്ഞതോടെ പ്രതിപക്ഷത്തിന്റെ ആരോപണങ്ങൾ വീണുടഞ്ഞു; എം ബി രാജേഷ്

തൃശ്ശൂർ: ശബരിമല സ്വർണ്ണ മോഷണത്തിൽ ഹൈക്കോടതി മറുപടി പറഞ്ഞതോടെ പ്രതിപക്ഷത്തിന്റെ എല്ലാ ആരോപണങ്ങളും വീണുടഞ്ഞു എന്ന് മന്ത്രി എം പി രാജേഷ്. പാറപ്പുറത്ത് ചില്ലുപാത്രം വീണുടഞ്ഞ അവസ്ഥയിലാണ് പ്രതിപക്ഷം എന്നും ജനങ്ങളുടെ വിശ്വാസം ഭരണപക്ഷം ആർജ്ജിച്ചതു കൊണ്ടാണ് ഒരു അവിശ്വാസം പോലും പ്രതിപക്ഷത്തിന് കൊണ്ടുവരാൻ കഴിയാതെന്നും എം ബി രാജേഷ് പറഞ്ഞു.

ഒരു തട്ടിക്കൂട്ട് കുറ്റപത്രം സമർപ്പിച്ച പ്രതികൾ വിചാരണയിൽ രക്ഷപ്പെട്ടു പോകട്ടെ എന്നാണോ പ്രതിപക്ഷം ആഗ്രഹിക്കുന്നത് എന്നും എം ബി രാജേഷ് ചോദിച്ചു. ശബരിമല സ്വർണ്ണ മോഷണ കേസിൽ യഥാർത്ഥ പ്രതികൾ രക്ഷപ്പെടണം എന്നാണ് പ്രതിപക്ഷത്തിന്റെ ആവശ്യമെന്ന് എംബി രാജേഷ് കഴിഞ്ഞ ദിവസവും പറഞ്ഞിരുന്നു.

അന്വേഷണം ശരിയായ ദിശയിൽ ആയാൽ പോറ്റിയിൽ അന്വേഷണം അവസാനിക്കില്ല എന്ന ഭയമാണ് സഭയിൽ പ്രതിപക്ഷം ഇത്തരത്തിലുള്ള കോപ്രായം കാണിക്കുവാൻ കാരണം. അതുകൊണ്ടാണ് പ്രതിപക്ഷത്തെ ഇങ്ങനെയൊക്കെ ചെയ്യുവാൻ പ്രേരിപ്പിക്കുന്നത് എന്നും കോൺഗ്രസ് നാടകം കളിക്കുകയാണെന്നും രാജേഷ് പറഞ്ഞു. സത്യം മുഖത്തടിക്കുമ്പോൾ പ്രതിപക്ഷ നേതാവും പ്രതിപക്ഷവും കണ്ണടച്ച് ഇരുട്ടാക്കുകയാണെന്നും ഹൈക്കോടതിയുടെ ദേവസ്വം ബെഞ്ചിനും മുകളിലാണ് താനെന്നാണ് പ്രതിപക്ഷ നേതാവിന്റെ വിചാരമെന്നും എം ബി രാജേഷ് കുറ്റപ്പെടുത്തി.