ഭാരം 7 കിലോ മാത്രം, പോഷകാഹാരക്കുറവുമൂലം ആലപ്പുഴയിൽ രണ്ടുവസ്സുകാരൻ മരിച്ചു

ആലപ്പുഴ: പോഷകാഹാരം കുറവുമൂലം കാർത്തികപ്പള്ളിയിൽ രണ്ടു വയസ്സുള്ള ആൺകുട്ടി മരിച്ചു. കാർത്തികപള്ളി വില്ലേജിൽ വലിയകുളങ്ങര തൈമൂട്ടിൽ രാജേഷിന്റെയും താരയുടെയും മകൻ രാഹുലാണ് മരണപ്പെട്ടത്. ഈ ദമ്പതികളുടെ ആറാമത്തെ കുഞ്ഞാണ് രാഹുൽ. പ്രസവത്തിനായി ആലപ്പുഴ ഗവ മെഡിക്കൽ കോളേജിൽ പ്രവേശിപ്പിച്ചിരിക്കുന്നതിനാൽ വീട്ടിൽ കുട്ടികളും പിതാവും മാത്രമാണ് ഉണ്ടായിരുന്നത്. ഇന്നലെ പിതാവ് രാജേഷിനൊപ്പം കിടന്നുറങ്ങിയ ആൺകുട്ടിയെ രാവിലെയാണ് മരിച്ച നിലയിൽ കണ്ടെത്തുന്നത്.

സംഭവത്തിൽ നാട്ടുകാർ സംശയം പ്രകടിപ്പിച്ചതിനെ തുടർന്ന് പോലീസ് ഇടപെട്ട് പോസ്റ്റ്മോർട്ടം നടത്തുകയായിരുന്നു. പോഷകാഹാര കുറവാണ് മരണകാരണമെന്ന് പോസ്റ്റുമോർട്ടത്തിൽ വ്യക്തമായി എന്ന് പോലീസ് അറിയിച്ചു. വാടക ഷെഡിൽ ഏറെ ദുരിതപൂർണ്ണമായ ജീവിതം നയിച്ചിരുന്ന അമ്മയെയും മക്കളെയും രണ്ടുമാസം മുൻപ് ജനപ്രതിനിധികൾ ഇടപെട്ട് പത്തനാപുരത്തെ ഗാന്ധിഭവനിൽ പ്രവേശിപ്പിച്ചിരുന്നു എങ്കിലും രണ്ടാഴ്ചയ്ക്കുശേഷം അവർ അവിടെ നിന്ന് ഭർത്താവിനൊപ്പം തിരികെ പോരുകയായിരുന്നു.