Summer health tips: ജാഗ്രത, കഠിനമായ ചൂട് മസ്തിഷ്കാഘാതത്തിന് കാരണമായേക്കാം; അറിഞ്ഞിരിക്കേണ്ട മുൻകരുതലുകൾ

ഉഷ്ണതരംഗം രൂക്ഷമാകുന്നതോടെ രാജ്യത്ത് മസ്തിഷ്കാഘാത കേസുകളിൽ വർധനവുണ്ടാകുന്നതായി ആരോഗ്യവിദഗ്ധർ. നിർജ്ജലീകരണവും ശരീരത്തിലെ രക്തചംക്രമണ വ്യവസ്ഥയിലുണ്ടാകുന്ന അമിത സമ്മർദ്ദവുമാണ് ഇതിന് പ്രധാന കാരണമാകുന്നത്. ഇത് എങ്ങനെ സംഭവിക്കുന്നു എന്ന വിശദമായ കാര്യ കാരണങ്ങൾ ഒരു പരിശോധിച്ചാലോ?

ചൂട് എങ്ങനെ സ്ട്രോക്കിന് കാരണമാകുന്നു?

ശരീരത്തിൽ നിന്ന് അമിതമായി ദ്രാവകം നഷ്ടപ്പെടുമ്പോൾ രക്തം സാധാരണയേക്കാൾ കട്ടിയുള്ളതാകുന്നു. ഇത് രക്തക്കുഴലുകളിൽ കട്ടകൾ രൂപപ്പെടാൻ കാരണമാവുകയും തലച്ചോറിലേക്കുള്ള രക്തപ്രവാഹം തടസ്സപ്പെടുത്തി സ്ട്രോക്കിലേക്ക് നയിക്കുകയും ചെയ്യുന്നു. ദാഹം തോന്നുന്നില്ലെങ്കിലും കൃത്യമായ ഇടവേളകളിൽ വെള്ളം കുടിക്കേണ്ടത് അത്യാവശ്യമാണ്.

ശരീരം തണുപ്പിക്കാനായി ചർമ്മത്തിലേക്കുള്ള രക്തപ്രവാഹം ശരീരം വർദ്ധിപ്പിക്കുന്ന സാഹചര്യമാണ് അടുത്തത്. ഇത് രക്തസമ്മർദ്ദം പെട്ടെന്ന് കുറയാനും ഹൃദയത്തിന് കൂടുതൽ ജോലിഭാരം നൽകാനും കാരണമാകുന്നു. ഉയർന്ന രക്തസമ്മർദ്ദമോ ഹൃദയസംബന്ധമായ അസുഖങ്ങളോ ഉള്ളവർക്ക് ഇത് വലിയ അപകടസാധ്യതയുണ്ടാക്കുന്നു. അമിതമായി വിയർക്കുമ്പോൾ ശരീരത്തിലെ അവശ്യ ലവണങ്ങളും ഇലക്ട്രോലൈറ്റുകളും നഷ്ടപ്പെടുന്ന അവസ്ഥയുണ്ടാകുന്നതും മറ്റൊരു കാരണമാണ്. ഇത് നാഡീവ്യൂഹത്തിന്റെയും ഹൃദയത്തിന്റെയും പ്രവർത്തനത്തെ ബാധിക്കുകയും ആശയക്കുഴപ്പം, തളർച്ച, ക്രമരഹിതമായ ഹൃദയമിടിപ്പ് എന്നിവയ്ക്ക് കാരണമാവുകയും ചെയ്യുന്നു.

Also Read – വെള്ളയോ കറുപ്പോ? ചൂടിനെ പ്രതിരോധിക്കാൻ ഏത് നിറമാണ് മികച്ചത്

പ്രായമായവർ, പുറംജോലികളിൽ ഏർപ്പെടുന്നവർ, പ്രമേഹം, രക്താതിസമ്മർദ്ദം, ഹൃദ്രോഗം എന്നിവയുള്ളവർ എല്ലാം ഈ പ്രശ്നം അഭിമുഖീകരിക്കാൻ സാധ്യത ഉള്ള വിഭാ​ഗമാണ്. അതിനാൽ ഇവരെല്ലാം പ്രത്യേകം ശ്രദ്ധിക്കേണ്ടതുണ്ട്.

തിരിച്ചറിയേണ്ട ലക്ഷണങ്ങൾ

• കഠിനമായ ക്ഷീണം, തലകറക്കം, ആശയക്കുഴപ്പം.
• സംസാരത്തിൽ അവ്യക്തത.
• പെട്ടെന്നുണ്ടാകുന്ന ശരീരതളർച്ച.
• അമിതമായ തലവേദന.

പ്രതിരോധ മാർഗ്ഗങ്ങൾ

• വെള്ളത്തിന് പുറമെ ഇളനീർ, മോര്, ഫ്രഷ് ജ്യൂസുകൾ എന്നിവ കുടിക്കുക.
• കഫീൻ അടങ്ങിയ പാനീയങ്ങളും മദ്യവും നിർജ്ജലീകരണം വർദ്ധിപ്പിക്കുമെന്നതിനാൽ ഇവ ഒഴിവാക്കുക.
• ഉച്ചസമയത്തെ കടുത്ത വെയിലിൽ പുറത്തിറങ്ങുന്നത് ഒഴിവാക്കുക.
• പഴങ്ങൾ (തണ്ണിമത്തൻ, ഓറഞ്ച്, വാഴപ്പഴം) ഭക്ഷണത്തിൽ ഉൾപ്പെടുത്തുക.

ഇതെല്ലാം ശ്രദ്ധിക്കണം

ശരീരം അമിതമായി ചൂടാകുന്നതിന്റെ പ്രാരംഭ ലക്ഷണമാണ് ഹീറ്റ് എക്‌സോഷൻ. ഇത് കൃത്യസമയത്ത് ചികിത്സിച്ചില്ലെങ്കിൽ മാരകമായ ഹീറ്റ് സ്ട്രോക്കിലേക്ക് നയിക്കാം. ഹീറ്റ് സ്ട്രോക്ക് ഉണ്ടാകുമ്പോൾ ശരീരതാപനില അതിലധികമോ ആയി ഉയരുകയും മസ്തിഷ്കം ഉൾപ്പെടെയുള്ള അവയവങ്ങളെ ബാധിക്കുകയും ചെയ്യുന്നു.

കടുത്ത ചൂടുള്ള സമയത്ത് (രാവിലെ 10 മുതൽ വൈകിട്ട് 4 വരെ) കഠിനമായ വ്യായാമങ്ങൾ ഒഴിവാക്കണം. ഇത് നിർജ്ജലീകരണത്തിനും ഹൃദയമിടിപ്പ് അമിതമായി വർദ്ധിക്കാനും കാരണമാകും. വ്യായാമം പുലർച്ചെയോ വൈകുന്നേരമോ ആക്കുന്നതാണ് ഉചിതം. അയഞ്ഞ കോട്ടൺ വസ്ത്രങ്ങൾ ധരിക്കുന്നത് വായുസഞ്ചാരം വർദ്ധിപ്പിക്കുകയും വിയർപ്പ് ബാഷ്പീകരിക്കാൻ സഹായിക്കുകയും ചെയ്യും. കൂടാതെ, വെയിലത്ത് ഇറങ്ങുമ്പോൾ സൺസ്‌ക്രീൻ ഉപയോഗിക്കുന്നത് സൂര്യതാപം തടയാൻ സഹായിക്കും. ഒരാൾക്ക് അമിതമായ ചൂടുമൂലം ബോധക്ഷയമോ തളർച്ചയോ അനുഭവപ്പെട്ടാൽ ഉടൻ തണലുള്ള ഇടത്തേക്ക് മാറ്റുക, നനഞ്ഞ തുണി ഉപയോഗിച്ച് ശരീരം തുടയ്ക്കുക, ബോധമുണ്ടെങ്കിൽ മാത്രം വെള്ളം നൽകുക എന്നിവ പ്രധാനമാണ്.