Ranji Trophy 2026: അപരാജിത സെഞ്ചുറിയുമായി രോഹൻ; ഗോവയ്ക്കെതിരെ കേരളം ശക്തമായ നിലയിൽ
Ranji Trophy Kerala vs Goa: രഞ്ജി ട്രോഫിയിൽ ഗോവയ്ക്കെതിരെ കേരളം പിടിമുറുക്കുന്നു. സെഞ്ചുറിയടിച്ച് നിൽക്കുന്ന രോഹൻ കുന്നുമ്മലാണ് കേരളത്തെ മുന്നോട്ടുനയിക്കുന്നത്.
രഞ്ജി ട്രോഫിയിലെ അവസാന ഗ്രൂപ്പ് മത്സരത്തിൽ ഗോവയ്ക്കെതിരെ കേരളം ശക്തമായ നിലയിൽ. എലീറ്റ് ഗ്രൂപ്പ് ബിയിൽ നടന്ന മത്സരത്തിൻ്റെ രണ്ടാം ദിനം അവസാനിക്കുമ്പോൾ കേരളം രണ്ട് വിക്കറ്റ് നഷ്ടത്തിൽ 237 റൺസെന്ന നിലയിലാണ്. ആദ്യ ഇന്നിംഗ്സിൽ ഗോവ 355 റൺസിന് ഓളൗട്ടായിരുന്നു. മറുപടി ബാറ്റിംഗിൽ അപരാജിത സെഞ്ചുറിയുമായി കുതിയ്ക്കുന്ന രോഹൻ കുന്നുമ്മലാണ് കേരള ഇന്നിംഗ്സ് മുന്നോട്ടുനയിക്കുന്നത്.
86 റൺസ് നേടിയ സുയാഷ് പ്രഭുദേശായ് ആണ് ഗോവൻ ഇന്നിംഗ്സിൽ ടോപ്പ് സ്കോറർ ആയത്. സമർ ധദുഭാഷി (55 നോട്ടൗട്ട്), യഷ് കസ്വങ്കർ (50) എന്നിവരും തിളങ്ങി. കേരളത്തിനായി അങ്കിത് ശർമ്മ അഞ്ച് വിക്കറ്റ് വീഴ്ത്തിയപ്പോൾ ബേസിൽ എൻപിയ്ക്ക് രണ്ട് വിക്കറ്റുണ്ട്. മറുപടി ബാറ്റിംഗിനിറങ്ങിയ കേരളത്തിന് ഓപ്പണർമാരായ രോഹൻ കുന്നുമ്മലും അഭിഷേക് ജെ നായരും ചേർന്ന് നൽകിയത് തകർപ്പൻ തുടക്കമാണ്. 97 റൺസിൻ്റെ കൂട്ടുകെട്ടിന് ശേഷം അഭിഷേക് (32) മടങ്ങി. രണ്ടാം വിക്കറ്റിൽ രോഹനുമായി ചേർന്ന് സച്ചിൻ ബേബിയും കേരള സ്കോർ മുന്നോട്ടുനയിച്ചു. 86 റൺസ് നീണ്ട കൂട്ടുകെട്ടിന് ശേഷം 37 റൺസ് നേടിയ സച്ചിൻ ബേബിയും മടങ്ങി.
Also Read: Sanju Samson: തിലക് തിരിച്ചെത്തുന്നു; സഞ്ജുവിന്റെ നില പരുങ്ങലില്; കാര്യവട്ടത്ത് ‘വിധിയെഴുത്ത്’
പങ്കാളികൾ മടങ്ങിയെങ്കിലും ആക്രമിച്ചുകളിച്ച രോഹൻ ഇതിനിടെ ഫിഫ്റ്റിയും സെഞ്ചുറിയും കടന്ന് കുതിച്ചു. നാലാം നമ്പരിലെത്തിയ സൽമാൻ നിസാർ രോഹന് ഉറച്ച പിന്തുണയാണ് നൽകിയത്. ഇരുവരും ചേർന്ന് മൂന്നാം വിക്കറ്റിൽ ഇതുവരെ അപരാജിതമായ 54 റൺസിൻ്റെ കൂട്ടുകെട്ടിലാണ് പങ്കാളികളായിരിക്കുന്നത്. 154 പന്തിൽ 13 ബൗണ്ടറിയും അഞ്ച് സിക്സറും സഹിതം 132 റൺസ് നേടിയ രോഹൻ കുന്നുമ്മലും 56 പന്തിൽ 25 റൺസ് നേടിയ സൽമാൻ നിസാറും നോട്ടൗട്ടാണ്.
ഗോവയ്ക്കെതിരായ ഈ കളി വിജയിക്കാനായില്ലെങ്കിൽ കേരളം പ്ലേറ്റ് ഗ്രൂപ്പിലേക്ക് പിന്തള്ളപ്പെടും. സീസണിൽ ഇതുവരെ കേരളം ഒരു കളി പോലും ജയിച്ചിട്ടില്ല.
