Hajj 2026: ഹജ്ജ് തീർത്ഥാടകർക്ക് ആരോഗ്യ ജാഗ്രതാനിർദ്ദേശം നൽകി അബുദാബി; മുൻകൂട്ടിയുള്ള തയ്യാറെടുപ്പുകൾ അനിവാര്യം
Hajj Pilgrims to Prioritise Medical Checks and Vaccinations: ഹജ്ജ് കർമ്മങ്ങളിലെ ശാരീരിക അധ്വാനം കണക്കിലെടുത്ത് യാത്രയ്ക്ക് മൂന്ന് ആഴ്ച മുൻപ് തന്നെ ലഘുവായ വ്യായാമങ്ങളിലൂടെ കായികക്ഷമത വർദ്ധിപ്പിക്കാൻ ശ്രമിക്കണം. നിർജ്ജലീകരണത്തിന് സാധ്യതയുള്ള മരുന്നുകൾ കഴിക്കുന്നവർ ഡോക്ടറുടെ ഉപദേശപ്രകാരം ക്രമീകരണങ്ങൾ വരുത്തണം.
അബുദാബി: ഹജ്ജ് തീർത്ഥാടനത്തിന് തയ്യാറെടുക്കുന്നവർ ആരോഗ്യകാര്യങ്ങളിൽ അതീവ ജാഗ്രത പാലിക്കണമെന്ന് അബുദാബി പബ്ലിക് ഹെൽത്ത് സെന്റർ (A D P H C) നിർദ്ദേശിച്ചു. യാത്രാ തയ്യാറെടുപ്പുകൾക്കൊപ്പം തന്നെ കൃത്യമായ വൈദ്യപരിശോധനയും വാക്സിനേഷനും പൂർത്തിയാക്കണമെന്നാണ് അധികൃതരുടെ അറിയിപ്പ്.
പ്രധാന നിർദ്ദേശങ്ങൾ
- വിദേശയാത്രയ്ക്ക് മുൻപ് ഡോക്ടറെ കണ്ട് ആരോഗ്യസ്ഥിതി തൃപ്തികരമാണെന്ന് ഉറപ്പുവരുത്തണം. പ്രത്യേകിച്ച് വിട്ടുമാറാത്ത രോഗങ്ങളുള്ളവർ കൃത്യമായ പരിശോധന നടത്തണം.
- സ്ഥിരമായി കഴിക്കുന്ന മരുന്നുകൾ ആവശ്യമായ അളവിൽ ഒറിജിനൽ പാക്കറ്റിൽ തന്നെ കരുതണം. ചികിത്സാ വിവരങ്ങൾ, മരുന്നിന്റെ അളവ് എന്നിവ രേഖപ്പെടുത്തിയ മെഡിക്കൽ റിപ്പോർട്ട് കയ്യിൽ വെക്കുന്നത് അടിയന്തര ഘട്ടങ്ങളിൽ സഹായകമാകും.
- നിർബന്ധിതവും ശുപാർശ ചെയ്യപ്പെട്ടതുമായ എല്ലാ വാക്സിനുകളും യാത്രയ്ക്ക് കുറഞ്ഞത് 10 ദിവസം മുൻപെങ്കിലും എടുത്തിരിക്കണം. മെഡിക്കൽ റെക്കോർഡുകൾ അപ്ഡേറ്റ് ചെയ്യാൻ അടുത്തുള്ള സർക്കാർ ആരോഗ്യ കേന്ദ്രം സന്ദർശിക്കണം.
- ഹജ്ജ് കർമ്മങ്ങളിലെ ശാരീരിക അധ്വാനം കണക്കിലെടുത്ത് യാത്രയ്ക്ക് മൂന്ന് ആഴ്ച മുൻപ് തന്നെ ലഘുവായ വ്യായാമങ്ങളിലൂടെ കായികക്ഷമത വർദ്ധിപ്പിക്കാൻ ശ്രമിക്കണം.
- നിർജ്ജലീകരണത്തിന് സാധ്യതയുള്ള മരുന്നുകൾ കഴിക്കുന്നവർ ഡോക്ടറുടെ ഉപദേശപ്രകാരം ക്രമീകരണങ്ങൾ വരുത്തണം.
- രോഗപ്രതിരോധ ശേഷി വർദ്ധിപ്പിക്കുന്നതിനായി സമീകൃതാഹാരം ശീലിക്കണമെന്നും ഔദ്യോഗിക സോഷ്യൽ മീഡിയ ചാനലുകളിലൂടെ പങ്കുവെച്ച മാർഗ്ഗനിർദ്ദേശത്തിൽ സെന്റർ വ്യക്തമാക്കി.
ഹജ്ജ് യാത്രയ്ക്ക് അധിക തുക നൽകണം
തീർഥാടകരുടെ ആരോഗ്യത്തിന് പ്രഥമ പരിഗണന നൽകിക്കൊണ്ട് സൗദി ഫുഡ് ആൻഡ് ഡ്രഗ് അതോറിറ്റി വിപുലമായ പദ്ധതികൾ പ്രഖ്യാപിച്ചു. 24 മണിക്കൂർ നിരീക്ഷണത്തിനു കര, കടൽ, വ്യോമ അതിർത്തികളിൽ പ്രത്യേക സാങ്കേതിക സംഘങ്ങൾ നിലയുറപ്പിച്ചു. കഴിഞ്ഞ മാസങ്ങളിൽ മാത്രം 1,400-ലധികം വെയർഹൗസുകളിലും ഫാക്ടറികളിലും അതോറിറ്റി പരിശോധന പൂർത്തിയാക്കി. മക്ക, മദീന മുനിസിപ്പാലിറ്റികളുമായി ചേർന്ന് കാറ്ററിംഗ് തൊഴിലാളികൾക്കും ഇൻസ്പെക്ടർമാർക്കുമായി പ്രത്യേക വർക്ക്ഷോപ്പുകൾ സംഘടിപ്പിച്ചു.
പാസ്പോർട്ടിന് പകരം ഇനി ‘ഡിജിറ്റൽ ഐഡന്റിറ്റി’
തീർഥാടകർക്ക് സൗദി അറേബ്യയ്ക്കുള്ളിലെ യാത്രകൾ സുഗമമാക്കാൻ ‘ഡിജിറ്റൽ വിസിറ്റർ ഐഡന്റിറ്റി’ സംവിധാനം സൗദി ജവാസത്ത് (പാസ്പോർട്ട് വിഭാഗം) ഏർപ്പെടുത്തി. തീർഥാടകർക്ക് അബ്ഷർ (Absher) പ്ലാറ്റ്ഫോം വഴി ഈ ഡിജിറ്റൽ രേഖ സ്വന്തമാക്കാം. രാജ്യത്തിനകത്തെ യാത്രകളിൽ പാസ്പോർട്ടിന് പകരമുള്ള ഔദ്യോഗിക രേഖയായി ഇതിനെ ഉപയോഗിക്കാം. പാസ്പോർട്ട് നഷ്ടപ്പെടാനുള്ള സാധ്യത കുറയ്ക്കാനും സുരക്ഷാ പരിശോധനകൾ വേഗത്തിലാക്കാനും ഇത് സഹായിക്കും. ഈ പുതിയ ക്രമീകരണങ്ങളിലൂടെ ലോകത്തിന്റെ വിവിധ ഭാഗങ്ങളിൽ നിന്നുള്ള തീർഥാടകർക്ക് സുരക്ഷിതവും സുഗമവുമായ ഹജ്ജ് അനുഭവം നൽകാനാണ് സൗദി അറേബ്യ ലക്ഷ്യമിടുന്നത്.
English Summary
The Abu Dhabi Public Health Centre has urged residents planning to perform Hajj to prioritise early medical preparation, including consulting doctors, reviewing medications and ensuring required vaccinations are taken ahead of travel.
