UAE food safety: സുരക്ഷിതമായ ഭക്ഷണം ഉറപ്പ്, യുഎഇയിലെ ആദ്യ അത്യാധുനിക വൈറസ് പരിശോധനാ ലാബ് തുറന്നു
UAE's first Viru-Genetics Lab to detect foodborne viruses: പ്രതിദിനം 60 സാമ്പിളുകൾ വരെ പരിശോധിക്കാൻ ലാബിന് ശേഷിയുണ്ട്. അടിയന്തര ഘട്ടങ്ങളിൽ ഇത് 100 സാമ്പിളുകൾ വരെയായി വർധിപ്പിക്കാം. ലോകത്തിലെ ഏറ്റവും മികച്ച മോളിക്യുലാർ അനാലിസിസ് രീതികളിലൊന്നായ ഡിജിറ്റൽ പി സി ആർ ആണ് ഇവിടെ ഉപയോഗിക്കുന്നത്. നോറോ വൈറസ്, ഹെപ്പറ്റൈറ്റിസ് എ, ഇ തുടങ്ങിയവയുടെ സാന്നിധ്യം സൂക്ഷ്മമായി കണ്ടെത്താൻ സാധിക്കും.
ദുബായ്: ഭക്ഷണത്തിലൂടെ പകരുന്ന വൈറസുകളെ അതിവേഗം തിരിച്ചറിയാൻ ലക്ഷ്യമിട്ട് ദുബായ് മുനിസിപ്പാലിറ്റി അത്യാധുനിക ജിനോമിക് സാങ്കേതികവിദ്യയുമായി പുതിയ ലാബ് തുറന്നു. ദുബായ് സെൻട്രൽ ലബോറട്ടറിക്ക് കീഴിൽ സജ്ജമാക്കിയ വൈറു ജനറ്റിക്സ് ലാബ് യു എ ഇയിലെ തന്നെ ഇത്തരത്തിലുള്ള ആദ്യ സംരംഭമാണ്. നഗരത്തിലെ ഭക്ഷ്യസുരക്ഷാ മാനദണ്ഡങ്ങൾ രാജ്യാന്തര നിലവാരത്തിലേക്ക് ഉയർത്തുക എന്ന ലക്ഷ്യത്തോടെയാണ് ഈ ചുവടുവെപ്പ്.
പ്രധാന സവിശേഷതകൾ
- പ്രതിദിനം 60 സാമ്പിളുകൾ വരെ പരിശോധിക്കാൻ ലാബിന് ശേഷിയുണ്ട്. അടിയന്തര ഘട്ടങ്ങളിൽ ഇത് 100 സാമ്പിളുകൾ വരെയായി വർധിപ്പിക്കാം.
- ലോകത്തിലെ ഏറ്റവും മികച്ച മോളിക്യുലാർ അനാലിസിസ് രീതികളിലൊന്നായ ഡിജിറ്റൽ പി സി ആർ ആണ് ഇവിടെ ഉപയോഗിക്കുന്നത്.
- നോറോ വൈറസ്, ഹെപ്പറ്റൈറ്റിസ് എ, ഇ തുടങ്ങിയവയുടെ സാന്നിധ്യം സൂക്ഷ്മമായി കണ്ടെത്താൻ സാധിക്കും.
- പാൽ ഉൽപ്പന്നങ്ങൾ, സമുദ്രവിഭവങ്ങൾ, ജ്യൂസുകൾ, പച്ചക്കറികൾ എന്നിവയിലെ വൈറസ് സാന്നിധ്യം എത്ര കുറഞ്ഞ അളവിലാണെങ്കിലും തിരിച്ചറിയാം.
ഭക്ഷ്യസുരക്ഷയിൽ പുതിയ മാതൃക
ഐഎസ്ഒ (I S O) മാനദണ്ഡങ്ങൾ പാലിച്ച് പ്രവർത്തിക്കുന്ന ഈ ലാബ്, വൈറസുകളെക്കുറിച്ചുള്ള ജനിതക വിവരങ്ങൾ ശേഖരിക്കാനും അവയുടെ ഒരു ദേശീയ ഡാറ്റാബേസ് തയ്യാറാക്കാനും സഹായിക്കും. ഇതിനായി സർവ്വകലാശാലകളുമായും ഗവേഷണ കേന്ദ്രങ്ങളുമായും സഹകരിച്ച് പ്രവർത്തിക്കുമെന്ന് ദുബായ് സെൻട്രൽ ലബോറട്ടറി ഡയറക്ടർ ഹിന്ദ് മഹ്മൂദ് അഹമ്മദ് അറിയിച്ചു.
വളരെ കുറഞ്ഞ സമയത്തിനുള്ളിൽ കൃത്യമായ പരിശോധനാഫലം നൽകാൻ കഴിയുമെന്നത് ഭക്ഷ്യവസ്തുക്കളുടെ പരിശോധന വേഗത്തിലാക്കാനും അടിയന്തര തീരുമാനങ്ങൾ ഉടനടി എടുക്കാനും അധികൃതരെ സഹായിക്കും. ഭക്ഷ്യസുരക്ഷാ രംഗത്ത് ലോകത്തിന് തന്നെ മാതൃകയാവുന്ന ജിനോമിക് സംവിധാനമാണ് ഇതിലൂടെ ദുബായ് നടപ്പിലാക്കുന്നത്.
ഹജ്ജ് തീർത്ഥാടകർക്ക് ആരോഗ്യ ജാഗ്രതാ നിർദ്ദേശം
ഹജ്ജ് തീർത്ഥാടനത്തിന് പുറപ്പെടുന്നവർ ആരോഗ്യകാര്യങ്ങളിൽ അതീവ ജാഗ്രത പാലിക്കണമെന്ന് അബുദാബി പബ്ലിക് ഹെൽത്ത് സെന്റർ നിർദ്ദേശിച്ചു. ശാരീരിക അധ്വാനം ഏറെയുള്ള ഹജ്ജ് കർമ്മങ്ങൾ സുഗമമായി പൂർത്തിയാക്കാൻ കൃത്യമായ വൈദ്യപരിശോധനയും മുൻകരുതലുകളും അത്യാവശ്യമാണെന്ന് അധികൃതർ വ്യക്തമാക്കി. നിർജ്ജലീകരണത്തിന് സാധ്യതയുള്ള മരുന്നുകൾ ഉപയോഗിക്കുന്നവർ ഡോക്ടറുടെ നിർദ്ദേശപ്രകാരം ക്രമീകരണങ്ങൾ വരുത്തേണ്ടതുണ്ട്. പ്രതിരോധശേഷി വർദ്ധിപ്പിക്കാൻ സമീകൃതാഹാരം ശീലിക്കണമെന്നും ഔദ്യോഗിക സോഷ്യൽ മീഡിയ ചാനലുകളിലൂടെ പുറത്തിറക്കിയ മാർഗ്ഗനിർദ്ദേശത്തിൽ സെന്റർ വ്യക്തമാക്കി.
യാത്രയ്ക്ക് മുൻപ് ഡോക്ടറെ കണ്ട് ആരോഗ്യസ്ഥിതി തൃപ്തികരമാണെന്ന് ഉറപ്പുവരുത്തുക. വിട്ടുമാറാത്ത രോഗങ്ങളുള്ളവർ പ്രത്യേക പരിശോധന നടത്തണം. നിർബന്ധിതവും ശുപാർശ ചെയ്യപ്പെട്ടതുമായ എല്ലാ വാക്സിനുകളും യാത്രയ്ക്ക് കുറഞ്ഞത് 10 ദിവസം മുൻപെങ്കിലും എടുത്തിരിക്കണം. സ്ഥിരമായി കഴിക്കുന്ന മരുന്നുകൾ ആവശ്യമായ അളവിൽ ഒറിജിനൽ പാക്കറ്റിൽ തന്നെ കരുതുക. മരുന്നിന്റെ വിവരങ്ങൾ അടങ്ങിയ മെഡിക്കൽ റിപ്പോർട്ട് കയ്യിൽ വെക്കുന്നത് അടിയന്തര ഘട്ടങ്ങളിൽ സഹായകമാകും.
English Summary
Dubai Municipality has launched the UAE’s first ‘Viru-Genetics Lab’ featuring cutting-edge genomic technology to detect foodborne viruses swiftly. Using advanced Digital PCR technology, the lab can analyse up to 100 samples daily, ensuring the highest standards of public health and food safety in the city.
