Dubai RTA update: ഇനി പഴയ ബൈക്കുകളും ഓടിക്കാം, ഡെലിവറി ബൈക്കുകളുടെ രജിസ്ട്രേഷൻ പുതുക്കാൻ പുതിയ ഇളവുകളുമായി ദുബായ് ആർടിഎ
Dubai RTA Extends Operational Life of Delivery Bikes: ഡെലിവറി ജീവനക്കാർക്കായി പ്രത്യേക വിശ്രമകേന്ദ്രങ്ങൾ, ചാർജിങ് സ്റ്റേഷനുകൾ, മഞ്ഞ നിറത്തിലുള്ള നമ്പർ പ്ലേറ്റുകൾ എന്നിവ നേരത്തെ തന്നെ ആർടിഎ നിർബന്ധമാക്കിയിരുന്നു.
ദുബായ്: നഗരത്തിലെ ഡെലിവറി ബൈക്കുകളുടെ പ്രവർത്തന കാലാവധി നീട്ടുന്നതിനായി പുതിയ സാങ്കേതിക പരിശോധനാ മാനദണ്ഡങ്ങൾ ദുബായ് റോഡ് ഗതാഗത അതോറിറ്റി പുറത്തിറക്കി. നിലവിലെ ചട്ടപ്രകാരം കാലാവധി പൂർത്തിയാക്കിയ ബൈക്കുകൾക്ക്, നിശ്ചിത സുരക്ഷാ പരിശോധനകൾക്ക് വിധേയമായി ഒരു വർഷത്തേക്ക് കൂടി രജിസ്ട്രേഷൻ പുതുക്കി നൽകാനാണ് തീരുമാനം. ഈ നീക്കം ഡെലിവറി മേഖലയിലെ ചെറുകിട കമ്പനികൾക്കും സ്റ്റാർട്ടപ്പുകൾക്കും വലിയ സാമ്പത്തിക ആശ്വാസമാകുമെന്ന് വിലയിരുത്തപ്പെടുന്നു.
അഞ്ചാം വർഷത്തിലേക്ക് പ്രവേശിക്കുന്ന ബൈക്കുകൾക്ക് നിബന്ധനകളോടെ ഒരു വർഷം കൂടി പ്രവർത്തിക്കാം. രാജ്യാന്തര നിലവാരത്തിലുള്ള സാങ്കേതിക പരിശോധനകൾക്ക് ശേഷം മാത്രമായിരിക്കും പ്രവർത്തനാനുമതി നൽകുക. റോഡ് സുരക്ഷയിൽ വിട്ടുവീഴ്ച ചെയ്യാതെ കമ്പനികളുടെ പ്രവർത്തനച്ചെലവ് കുറയ്ക്കുക എന്നതാണ് ഉദ്ദേശം.
അപേക്ഷിക്കേണ്ട രീതി
ഡെലിവറി കമ്പനികൾക്ക് ലളിതമായ ഘട്ടങ്ങളിലൂടെ ഈ സേവനം പ്രയോജനപ്പെടുത്താം. ഇതിനായി
- ആർടിഎ വെബ്സൈറ്റിലെ കമ്പനി അക്കൗണ്ട് വഴി ലോഗിൻ ചെയ്യുക.
- ‘ഡെലിവറി ബൈക്ക്സ് ഓപ്പറേഷൻൽ ലൈഫ് എക്സ്റ്റൻഷൻ’ എന്ന ഓപ്ഷൻ ക്ലിക്ക് ചെയ്യുക.
- കാലാവധി പൂർത്തിയാകാറായ ബൈക്കുകൾ ലിസ്റ്റ് ചെയ്യുക.
- നിശ്ചിത കേന്ദ്രങ്ങളിൽ സാങ്കേതിക പരിശോധന പൂർത്തിയാക്കി രജിസ്ട്രേഷൻ പുതുക്കുക.
ഡെലിവറി ജീവനക്കാർക്കായി പ്രത്യേക വിശ്രമകേന്ദ്രങ്ങൾ, ചാർജിങ് സ്റ്റേഷനുകൾ, മഞ്ഞ നിറത്തിലുള്ള നമ്പർ പ്ലേറ്റുകൾ എന്നിവ നേരത്തെ തന്നെ ആർടിഎ നിർബന്ധമാക്കിയിരുന്നു. ഇതിന് പിന്നാലെ എത്തുന്ന പുതിയ പരിഷ്കാരം ദുബായുടെ ലോജിസ്റ്റിക്സ് മേഖലയ്ക്ക് കൂടുതൽ കരുത്തുപകരും.
