UAE school fees: ദുബായിൽ സ്കൂൾ ഫീസ് അടയ്ക്കാൻ ഇനി ബുദ്ധിമുട്ടേണ്ട; രക്ഷിതാക്കൾക്കായി പുതിയ ഇളവുകൾ

Representational Image

ദുബായ്: യുഎഇയിലെ പ്രവാസി കുടുംബങ്ങളുടെ പ്രധാന ചെലവുകളിലൊന്നായ സ്കൂൾ ഫീസുകൾ കൈകാര്യം ചെയ്യുന്നതിൽ രക്ഷിതാക്കൾക്ക് ആശ്വാസവുമായി ദുബായിലെ പ്രമുഖ സ്കൂളുകൾ. സാമ്പത്തിക ബുദ്ധിമുട്ടുകൾ നേരിടുന്ന കുടുംബങ്ങളെ സഹായിക്കുന്നതിനായി ഫ്ലെക്സിബിൾ പേയ്‌മെന്റ് പ്ലാനുകൾ, സ്കോളർഷിപ്പുകൾ, ഫീസുകളിൽ ഇളവ് എന്നിവയുമായാണ് സ്കൂൾ അധികൃതർ മുന്നോട്ട് വന്നിരിക്കുന്നത്.

ഇന്ത്യൻ ഹൈ സ്കൂൾ: പത്തുവർഷമായി ഫീസ് വർധനവില്ല

ദുബായിലെ ഇന്ത്യൻ ഹൈ സ്കൂൾ ഗ്രൂപ്പ് കഴിഞ്ഞ പത്ത് വർഷമായി ട്യൂഷൻ ഫീസിൽ വർധനവ് വരുത്തിയിട്ടില്ലെന്നത് ശ്രദ്ധേയമാണ്. കെ.എച്ച്.ഡി.എ (KHDA) ഫീസ് വർധിപ്പിക്കാൻ അനുമതി നൽകിയിട്ടും, സാധാരണക്കാർക്ക് വിദ്യാഭ്യാസം അപ്രാപ്യമാകരുത് എന്ന ലക്ഷ്യത്തോടെയാണ് ഈ തീരുമാനമെന്ന് സി.ഇ.ഒ പുനിത് എം.കെ വാസു പറഞ്ഞു. സാമ്പത്തിക ബുദ്ധിമുട്ടുള്ളവർക്ക് ഫീസ് മാസതവണകളായി അടക്കാൻ സൗകര്യമുണ്ട്. ഓൺലൈൻ പഠനം നടക്കുന്ന ദിവസങ്ങളിൽ ബസ് ഫീസ് ഈടാക്കില്ല. ഗർഹൂദ് ക്യാമ്പസിൽ നിന്നും ഊദ് മേത്തയിലേക്ക് മാറുന്ന വിദ്യാർത്ഥികൾക്ക് ഫീസ് അടക്കാൻ 9 മാസത്തെ സാവകാശം നൽകുന്നു.

ജെംസ് എജ്യുക്കേഷൻ : വ്യക്തിഗത സഹായങ്ങൾ

ലോകത്തിലെ ഏറ്റവും വലിയ സ്കൂൾ ശൃംഖലയായ ജെംസ് എജ്യുക്കേഷൻ, ഓരോ കുടുംബത്തിന്റെയും സാഹചര്യം കണക്കിലെടുത്ത് പ്രത്യേക സഹായങ്ങളാണ് നൽകുന്നത്. ജെംസ് സ്കൂളുകളിലെ രക്ഷിതാക്കൾക്ക് ഫീസ് മാസതവണകളായി അടക്കാനുള്ള സൗകര്യമുണ്ടെന്ന് ഗ്രൂപ്പ് സി.ഇ.ഒ ഡിനോ വർക്കി വ്യക്തമാക്കി. സാമ്പത്തിക പ്രതിസന്ധിയുള്ളവർക്ക് സ്കൂൾ കമ്മ്യൂണിറ്റിക്കുള്ളിലെ വിവിധ സഹായ പദ്ധതികളും ലഭ്യമാണ്.

Also Read – UAE School Holiday: ദുബായിലെ സ്വകാര്യ വിദ്യാലയങ്ങൾക്ക് പെരുന്നാൾ അവധി പ്രഖ്യാപിച്ചു; മെയ് 25 മുതൽ ക്ലാസുകൾ ഉണ്ടാകില്ല

ക്രീഡൻസ് ഹൈസ്കൂൾ: സ്കോളർഷിപ്പുകളും ഡിസ്കൗണ്ടുകളും

കെ.എച്ച്.ഡി.എ നിയമപ്രകാരം ഓരോ ടേമിലും ഫീസ് അടയ്ക്കണമെങ്കിലും, ആവശ്യക്കാരായ രക്ഷിതാക്കൾക്ക് പ്രതിമാസ പേയ്‌മെന്റ് ഓപ്ഷൻ നൽകാറുണ്ടെന്ന് ക്രീഡൻസ് ഹൈസ്കൂൾ പ്രിൻസിപ്പൽ ദീപിക ഥാപ്പർ സിംഗ് അറിയിച്ചു. ഒരേ വീട്ടിലെ ഒന്നിലധികം കുട്ടികൾ പഠിക്കുന്നുണ്ടെങ്കിൽ ഫീസിൽ ഇളവ് നൽകുന്നു. 11, 12 ക്ലാസ്സുകളിലെ അർഹരായ വിദ്യാർത്ഥികൾക്ക് സ്കോളർഷിപ്പ് സൗകര്യവുമുണ്ട്.

രക്ഷിതാക്കൾ ശ്രദ്ധിക്കാൻ

സാമ്പത്തിക ബുദ്ധിമുട്ട് നേരിടുന്ന രക്ഷിതാക്കൾ സ്കൂൾ അധികൃതരുമായി നേരിട്ട് ആശയവിനിമയം നടത്തണമെന്ന് അധികൃതർ നിർദ്ദേശിക്കുന്നു. മുൻകൂട്ടി സംസാരിക്കുന്നതിലൂടെ മികച്ച പരിഹാരങ്ങൾ കണ്ടെത്താനും കുട്ടികളുടെ പഠനം തടസ്സമില്ലാതെ മുന്നോട്ട് കൊണ്ടുപോകാനും സാധിക്കുമെന്ന് സ്കൂൾ മേധാവികൾ ഓർമ്മിപ്പിച്ചു.

English Summary

Leading private schools in Dubai, including the Indian High School and GEMS Education, are offering flexible monthly payment plans and scholarships to help families manage rising educational costs. These institutions emphasize open communication and tailored financial solutions, with some even maintaining frozen tuition and transport fees to ensure quality education remains accessible to all.