Oman Announces Ramadan: ഒമാനിൽ റമസാൻ മാസപ്പിറവി മുൻകൂട്ടി പ്രഖ്യാപിച്ചു, ഇത് ചരിത്രത്തിലാദ്യം
Oman Announces Ramadan Start Date: റമദാൻ മാസത്തിന്റെ വരവറിയിച്ചുകൊണ്ട് മന്ത്രാലയം സുൽത്താൻ ഹൈതം ബിൻ താരിഖിനും ഒമാനിലെ ജനങ്ങൾക്കും ലോകമെമ്പാടുമുള്ള മുസ്ലീങ്ങൾക്കും ആശംസകൾ നേർന്നു.
മസ്കത്ത്: ഒമാനിൽ ഈ വർഷത്തെ പരിശുദ്ധ റമദാൻ വ്രതാരംഭം ഫെബ്രുവരി 19 വ്യാഴാഴ്ചയായിരിക്കുമെന്ന് ഔഖാഫ്, മതകാര്യ മന്ത്രാലയം ഔദ്യോഗികമായി അറിയിച്ചു. ചരിത്രത്തിലാദ്യമായാണ് മാസപ്പിറവി നിരീക്ഷിക്കുന്നതിന് മുൻപുതന്നെ ജ്യോതിശാസ്ത്ര കണക്കുകൾ ആധാരമാക്കി ഒമാൻ റമദാൻ തീയതി മുൻകൂട്ടി പ്രഖ്യാപിക്കുന്നത്.
ഹിജ്രി മാസപ്പിറവി നിരീക്ഷിക്കുന്നതിനുള്ള പ്രധാന കമ്മിറ്റിയാണ് ബുധനാഴ്ച വൈകിട്ടോടെ ഈ പ്രഖ്യാപനം നടത്തിയത്. ശഅബാൻ 29-ആം ദിവസമായ ഫെബ്രുവരി 17 ചൊവ്വാഴ്ച സൂര്യാസ്തമയ സമയത്ത് ഒമാന്റെ ഒരു ഭാഗത്തും മാസപ്പിറവി ദൃശ്യമാകാൻ സാധ്യതയില്ലെന്ന് സമിതി വിലയിരുത്തി. ശാസ്ത്രീയമായ തെളിവുകൾ പ്രകാരം ചന്ദ്രൻ അസ്തമയത്തിന് മുൻപോ അല്ലെങ്കിൽ ഒപ്പമോ മറയുന്നതിനാൽ അന്ന് മാസപ്പിറവി ദർശനം അസാധ്യമാണ്.
ഇതനുസരിച്ച് ഫെബ്രുവരി 18 ബുധനാഴ്ച ശഅബാൻ 30 പൂർത്തിയാക്കി 19-ന് റമദാൻ ഒന്ന് ആരംഭിക്കും. ശാസ്ത്രീയ നിഗമനങ്ങളും മതപരമായ നിരീക്ഷണങ്ങളും തമ്മിലുള്ള വൈരുദ്ധ്യം ഒഴിവാക്കാനാണ് ഇത്തവണ നേരത്തെ തന്നെ പ്രഖ്യാപനം നടത്തിയത്.
റമദാൻ മാസത്തിന്റെ വരവറിയിച്ചുകൊണ്ട് മന്ത്രാലയം സുൽത്താൻ ഹൈതം ബിൻ താരിഖിനും ഒമാനിലെ ജനങ്ങൾക്കും ലോകമെമ്പാടുമുള്ള മുസ്ലീങ്ങൾക്കും ആശംസകൾ നേർന്നു.
