ഷാർജയിൽ പെയ്ഡ് പാർക്കിങ് സമയക്രമത്തിൽ മാറ്റം; പുതിയ നിയമം ജൂലൈ ഒന്ന് മുതൽ പ്രാബല്യത്തിൽ!

പ്രതീകാത്മക ചിത്രം

ഷാർജ: എമിറേറ്റിലെ വാഹന ഉടമകളുടെയും യാത്രക്കാരുടെയും ശ്രദ്ധയ്ക്ക്, പെയ്ഡ് പാർക്കിങ് സമയക്രമത്തിൽ സുപ്രധാന മാറ്റങ്ങൾ വരുത്തി ഷാർജ മുൻസിപ്പാലിറ്റി. പുതിയ അറിയിപ്പ് അനുസരിച്ച് ഷാർജയിലെ എല്ലാ പെയ്ഡ് പാർക്കിങ് സോണുകളിലും പാർക്കിംഗിനുള്ള സമയപരിധി അർദ്ധരാത്രി 12 വരെയാക്കി ദീർഘിപ്പിച്ചു. ജൂലൈ ഒന്ന് മുതലാണ് ഈ പുതിയ സമയക്രമം പ്രാബല്യത്തിൽ വരുന്നത്. പുതിയ സമയക്രമം വരുന്നതോടെ രാവിലെ 8 മണി മുതൽ അർദ്ധരാത്രി 12 മണി വരെയായിരിക്കും പെയ്ഡ് പാർക്കിങ് സമയം. ഷാർജ സിറ്റി, കൽബ, ഖോർഫക്കാൻ, അൽ ദൈദ് എന്നിവിടങ്ങളിലെ എല്ലാ പാർക്കിങ് മേഖലകൾക്കും ഈ മാറ്റം ബാധകമാണ്.

പാർക്കിങ് സമയം രാത്രി 12 മണി വരെ ദീർഘിപ്പിച്ചെങ്കിലും, വെള്ളിയാഴ്ചകളിലും മറ്റ് ഔദ്യോഗിക പൊതു അവധി ദിവസങ്ങളിലും നിലവിലുള്ളതുപോലെ പാർക്കിങ് സൗജന്യമായി തന്നെ തുടരുന്നതാണ്. എന്നാൽ, ആഴ്ചയിൽ ഏഴ് ദിവസവും ഫീസ് ഈടാക്കുന്ന പ്രത്യേക സോണുകൾക്ക് ഇത് ബാധകമല്ല. ഇത്തരം പ്രത്യേക ബോർഡുകൾ സ്ഥാപിച്ചിട്ടുള്ള സ്ഥലങ്ങളിൽ അവധി ദിവസങ്ങളിലും പാർക്കിങ് ഫീസ് നൽകേണ്ടതുണ്ട്.

എമിറേറ്റിൽ വർദ്ധിച്ചുവരുന്ന തിരക്കും, വികസനവും പരിഗണിച്ചാണ് ഈ തീരുമാനമെന്ന് പബ്ലിക് പാർക്കിങ് ഡിപ്പാർട്ട്മെന്റ് ഡയറക്ടർ ഹമദ് അൽ ഖായിദ് വ്യക്തമാക്കി. നഗരത്തിലെ വാണിജ്യ, വിനോദസഞ്ചാര മേഖലകളിലുണ്ടായ വലിയ കുതിച്ചുചാട്ടം ഈ മാറ്റത്തിന് കാരണമായി. പുതിയ നിയമം വരുന്നതോടെ അനധികൃതമായി ദീർഘനേരം വാഹനങ്ങൾ പാർക്ക് ചെയ്യുന്നത് തടയാനും കൂടുതൽ പേർക്ക് പാർക്കിങ് ലഭ്യത ഉറപ്പാക്കാനും സാധിക്കുമെന്ന് അധികൃതർ ചൂണ്ടിക്കാട്ടുന്നു.

Also Read: Etihad Rail: എത്തിഹാദ് റെയിൽ ടിക്കറ്റ് ബുക്കിങ് ആരംഭിച്ചു; ടിക്കറ്റ് ക്ലാസ്സുകൾ ഇങ്ങനെ, നിരക്കുകളിൽ 50 ശതമാനം ഇളവ്!

നിലവിൽ ഷാർജയിൽ ഏകദേശം 1,24,000 പെയ്ഡ് പബ്ലിക് പാർക്കിങ് കേന്ദ്രങ്ങളാണ് ഉള്ളത്. പാർക്കിങ് സമയം നീട്ടിയെങ്കിലും സീസണൽ സബ്സ്ക്രിപ്ഷൻ എടുത്തവർക്ക് നിരക്കുകളിൽ വർദ്ധനവുണ്ടാകില്ല എന്ന് മുൻസിപ്പാലിറ്റി ഉറപ്പുനൽകി. സബ്സ്ക്രിപ്ഷൻ ഉള്ളവർക്ക് മുൻപ് പ്രതിദിനം 14 മണിക്കൂർ ലഭിച്ചിരുന്ന ഇളവ് ഇനിമുതൽ 16 മണിക്കൂറായി വർദ്ധിക്കുന്നത് ഇവർക്ക് കൂടുതൽ ഗുണകരമായി മാറുമെന്നും അധികൃതർ അറിയിച്ചു. പിഴകൾ ഒഴിവാക്കാൻ പൊതുജനങ്ങൾ പുതിയ പാർക്കിങ് സമയക്രമം കൃത്യമായി പാലിക്കണമെന്ന് ഷാർജ മുൻസിപ്പാലിറ്റി അഭ്യർത്ഥിച്ചു.

ഫീസ് അടയ്ക്കാൻ വിപുലമായ ഡിജിറ്റൽ സൗകര്യങ്ങൾ ഒരുക്കിയിട്ടുണ്ട്. എസ്.എം.എസ് സേവനം, ഡിജിറ്റൽ ഷാർജ ആപ്പ് എന്നിവ വഴി പാർക്കിംഗ് ഫീസ് അടയ്ക്കാം. കൂടാതെ മുൻസിപ്പാലിറ്റിയുടെ സീസണൽ സബ്സ്ക്രിപ്ഷനുകളും പ്രയോജനപ്പെടുത്താവുന്നതാണ്. നഗരത്തിലെ ഗതാഗത സൗകര്യങ്ങൾ മികച്ചതാക്കാൻ എല്ലാവരുടെയും സഹകരണം ആവശ്യമാണെന്നും പുതിയ മാറ്റങ്ങൾ എമിറേറ്റിൻ്റെ വളർച്ചയ്ക്ക് കരുത്തേകുമെന്നും അധികൃതർ കൂട്ടിച്ചേർത്തു.

English Summary

Starting July 1, the Sharjah Municipality is extending its paid public parking hours across the emirate, with fees now applicable from 8 AM until midnight (12 AM). This new rule unifies the operating hours for all paid parking zones, including those with yellow and blue signboards, in Sharjah city, Kalba, Khorfakkan, and Al Dhaid. The decision aims to improve parking availability during late hours, especially near commercial and dining areas, and to curb random parking. Parking will continue to be free on Fridays and public holidays, except in designated seven-day paid zones.